சமீபத்தில் அமெரிக்காவுக்கு சென்ற மோடிக்கு கிடைத்த வரவேற்பு என்று மோடியின் உருவ பொம்மைக்கு செருப்பு மாலை மாட்டப்பட்ட வீடியோ ஒன்று சமூக ஊடகங்களில் பகிரப்பட்டு வருகிறது. அது பற்றி ஆய்வு செய்தோம்.
தகவலின் விவரம்:
உண்மைப் பதிவைக் காண: Facebook I Archive
நரேந்திர மோடியின் உருவ பொம்மைக்குச் செருப்பு மாலை அணிவிக்கப்பட்டு ஊர்வலமாக கொண்டு செல்லும் வீடியோ பகிரப்பட்டுள்ளது. உருவ பொம்மையின் மீது “இந்திய பயங்கரவாதத்தின் முகம்” என்று ஆங்கிலத்தில் எழுதப்பட்டுள்ளது. நிலைத் தகவலில், “அமெரிக்காவில் மோடிக்கு கிடைத்த வரவேற்பு. இதுபோன்ற வரவேற்பு எந்த இந்திய பிரதமரும் கிடைத்தது இல்லை” என்று குறிப்பிடப்பட்டிருந்தது.
இந்த பதிவை Binu Paul என்ற ஃபேஸ்புக் ஐடி கொண்டவர் 2023 ஜூன் 26ம் தேதி பதிவிட்டுள்ளார். இவரைப் போல பலரும் இந்த வீடியோவை தங்கள் சமூக ஊடக பக்கங்களில் பதிவிட்டு வருகின்றனர்.
உண்மை அறிவோம்:
2023 ஜூன் மாதம் இந்திய பிரதமர் நரேந்திர மோடி அமெரிக்கா, எகிப்து ஆகிய நாடுகளுக்கு அரசு முறை சுற்றுப்பயணம் மேற்கொண்டிருந்தார். அமெரிக்காவுக்கு சென்ற மோடி, அந்நாட்டு நாடாளுமன்றத்தில் உரையாற்றினார். மோடிக்கு சிறப்பான வரவேற்பு அளிக்கப்பட்டதாக செய்திகள் வெளியாகி இருந்தது. இந்த நிலையில் அவருக்கு அங்கு மிகக் கடுமையான எதிர்ப்பும் கிளம்பியதாக சமூக ஊடகங்களில் சிலர் பதிவிட்டு வருகின்றனர்.
மோடிக்கு எதிர்ப்பு தெரிவித்து அங்கு அவரது உருவ பொம்மைக்கு செருப்பு மாலை அணிவிக்கப்பட்டது என்று ஒரு வீடியோ பகிரப்பட்டுள்ளது. வீடியோவில் 2023ல் தற்போது அமெரிக்கா சென்ற போது எடுக்கப்பட்டது என்று குறிப்பிடப்படவில்லை. ஆனால், பொதுவாக வீடியோ பகிரப்பட்டுள்ளது. இந்த வீடியோவை ஆய்வு செய்தோம்.
வீடியோவை புகைப்படமாக மாற்றி கூகுள் ரவர்ஸ் இமேஜ் தேடலில் பதிவேற்றித் தேடினோம். அப்போது, இந்த வீடியோ 2019ம் ஆண்டிலிருந்து சமூக ஊடகங்களில் பதிவிடப்பட்டு வந்திருப்பதைக் காண முடிந்தது.
2019 செப்டம்பரில் இந்த வீடியோ முதலில் சமூக ஊடகங்களில் பதிவிட்டது போலத் தெரிந்தது. 2019 செப்டம்பரில் மோடி அமெரிக்காவுக்கு சென்றாரா என்று தேடிப் பார்த்தோம். 20199ல் அவர் அமெரிக்காவுக்கு சென்று ஹெவ்டி மோடி நிகழ்ச்சியில் பங்கேற்றிருப்பது தெரிந்தது. அப்போது அவருக்கு எதிராக நடந்த போராட்டத்தின் போது இந்த வீடியோ எடுக்கப்பட்டிருப்பது தெரிந்தது. இது தொடர்பாக ஃபேக்ட் கிரஸண்டோ மலையாளத்தில் 2021ம் ஆண்டு கட்டுரை வெளியாகி இருப்பதும் தெரிந்த்தது.
அமெரிக்காவில் மோடிக்கு எதிராக மக்கள் போராட்டம் நடத்திய வீடியோ உண்மையானதுதான். ஆனால் 2023ல் இந்த வீடியோ எடுக்கப்பட்டது இல்லை. 2019ல் எடுக்கப்பட்ட வீடியோவை மோடி 2023ல் அமெரிக்கா சென்ற சூழலில் தற்போது நடந்தது போன்று பகிர்ந்திருப்பது தெளிவாகிறது. இதன் அடிப்படையில் இந்த பதிவு தவறான புரிதலை ஏற்படுத்தும் வகையில் அமைந்திருப்பது உறுதியாகிறது.
முடிவு:
அமெரிக்காவில் மோடி வருகையைக் கண்டித்து அவரின் உருவ பொம்மைக்கு செருப்பு மாலை அணிவித்த மக்கள் என்று பரவும் வீடியோ 2023ல் எடுக்கப்பட்டது இல்லை என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.
சமூக ஊடகங்களில் எங்களை பின் தொடர விரும்பினால்…
Facebook I Twitter I Google News Channel
Title:நரேந்திர மோடிக்கு அமெரிக்காவில் கிடைத்த வரவேற்பு என்று பரவும் பழைய வீடியோவால் சர்ச்சை…
Written By: Chendur PandianResult: Missing Context
