‘பல்லடம் பாஜக மாநாட்டில் மது விநியோகம்’ என்று பரவும் பழைய வீடியோ!

பல்லடம் பாஜக மாநாட்டில் மது விநியோகம் செய்யப்பட்டது என்று ஒரு வீடியோ சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

பாரதிய ஜனதா கட்சி துண்டு, தொப்பி அணிந்தவர்கள் டம்ளரில் மதுவை ஊற்றும் வீடியோ ஃபேஸ்புக்கில் பகிரப்பட்டுள்ளது. நிலைத் தகவலில், “பல்லடத்தில் அண்ணாமலை மதுவை ஒழித்தபோது…😳😳” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மைப் பதிவைக் காண: twitter.com I Archive

உண்மை அறிவோம்:

தமிழ்நாடு பாஜக தலைவர் அண்ணாமலை என் மண், என் மக்கள் என்ற பெயரில் தமிழகம் முழுவதும் பயணம் மேற்கொண்டார். இதன் நிறைவு திருப்பூர் மாவட்டம் பல்லடத்தில் 2024 பிப்ரவரி 27ம் தேதி நடந்தது. பாஜக தலைவரும் பிரதமருமான நரேந்திர மோடி இந்த நிகழ்ச்சியில் பங்கேற்றார்.

இந்த சூழலில் பல்லடத்தில் நடந்த பாஜக மாநாட்டில் மது விநியோகம் செய்யப்பட்டதாகப் பழைய வீடியோவை பலரும் சமூக ஊடகங்களில் பதிவிட ஆரம்பித்துள்ளனர். இந்த வீடியோவை வைத்து ஏற்கனவே நம்முடைய ஃபேக்ட் கிரஸண்டோ தமிழில் கட்டுரை வெளியிட்டிருந்தோம். எனவே, இந்த வீடியோ பல்லடத்தில் எடுக்கப்பட்டது இல்லை என்பதை உறுதி செய்ய ஆதாரங்களைத் தேடினோம்.

இந்த வீடியோவை புகைப்படங்களாக மாற்றி கூகுள் ரிவர்ஸ் இமேஜ் தேடலில் பதிவேற்றித் தேடினோம். அப்போது 2021ம் ஆண்டு டிசம்பர் மாதம் இந்த வீடியோவை பலரும் எக்ஸ் தளத்தில் (ட்விட்டர்) பதிவிட்டிருந்ததைக் காண முடிந்தது. அதில், இந்த வீடியோ உத்தரப்பிரதேசத்தில் எடுக்கப்பட்டதாகக் குறிப்பிடப்பட்டிருந்தது. அதே நேரத்தில் சில ஊடகங்களும் இந்த வீடியோவை தங்கள் யூடியூப் பக்கத்தில் வெளியிட்டிருந்தன.

உண்மைப் பதிவைக் காண: bhaskar.com I Archive

அந்த செய்திகளைப் பார்த்தபோது, இந்த வீடியோ உத்தரகண்ட் மாநிலத்தில் எடுக்கப்பட்டது என்று தெரிந்தது. அந்த செய்தியைப் பார்த்தோம். அதில், உத்தரப்பிரதேச பாஜக தொண்டர்கள் மது அருந்துவதாகக் காங்கிரஸ் கட்சி குற்றம்சாட்டி இந்த வீடியோவை சமூக ஊடகங்களில் பதிவிட்டுள்ளது. ஆனால் உத்தரகண்ட் மாநிலம் ஹரித்துவாரில் நடந்த பாஜக தேசிய தலைவர் ஜே.பி.நட்டா பங்கேற்ற நிகழ்ச்சியில் கலந்துகொண்ட பாஜக தொண்டர்கள் மது அருந்திய வீடியோ இது என்று குறிப்பிடப்பட்டிருந்தது. 

பல்லடம் பாஜக மாநாடு 2024 பிப்ரவரி 27ம் தேதி நடந்தது. ஆனால் இந்த வீடியோ 2021ம் ஆண்டிலிருந்து சமூக ஊடகங்களில் பகிரப்பட்டு வருகிறது. இதன் மூலம் பல்லடத்தில் நடந்த பாஜக கூட்டத்தில் பாஜக தொண்டர்களுக்கு மது விநியோகிக்கப்பட்ட காட்சி என்று பரவும் வீடியோ தவறானது என்று உறுதி செய்யப்படுகிறது.

முடிவு:

2021ம் ஆண்டு உத்தரகண்ட் மாநிலத்தில் பாஜக தேசியத் தலைவர் நட்டா பங்கேற்ற கூட்டத்தில் பங்கேற்ற பாஜக தொண்டர்களுக்கு மது விநியோகிக்கப்பட்ட வீடியோவை 2024ம் ஆண்டு பல்லடத்தில் நடந்த பாஜக மாநாட்டில் மது விநியோகிக்கப்பட்டதாக தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel