கடல் போல காட்சியளிக்கும் மும்பை விமானநிலையம் என்று பரவும் வீடியோ உண்மையா?

கனமழை காரணமாக மும்பை விமான நிலையத்தில் தண்ணீர் தேங்கியிருப்பதாக ஒரு வீடியோ சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

விமான நிலையத்தில் தண்ணீர் தேங்கி நிற்கும் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “மும்பையில் பெய்த கனமழை காரணமாக மும்பை விமான நிலையம் கடலாகவும், அங்கு நிறுத்தப்பட்டுள்ள விமானங்கள் கப்பலாகவும் மாறி இருக்கிறது. கனமழை காரணமாக சுமார் 250 விமானங்கள் தாமதமாக இயக்கப்படுவதோடு, விமான நிலையத்தின் ரன் வே முழுக்க மழைநீர் தேங்கி நிற்கிறது” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

சில வருடங்களுக்கு முன்பு சென்னையில் கன மழை பெய்த போது சென்னை விமான நிலையத்தில் கடல் போன்று தண்ணீர் தேங்கி இருந்தது. அப்போது வெளியான வீடியோ போலவே இந்த வீடியோவும் இருந்தது. ஏற்கனவே பார்த்த வீடியோ போல இருந்ததால், இது தொடர்பாக ஆய்வு செய்தோம்.

கூகுளில் சென்னை விமான நிலையம், மழை நீர் என சில அடிப்படை வார்த்தைகளைப் பயன்படுத்தித் தேடினோம். அப்போது 2023 டிசம்பர் 4ம் தேதி இந்த வீடியோவை ஊடகங்கள் பலவும் வெளியிட்டிருந்ததைக் காண முடிந்தது. அதில், மிக்ஜாம் புயல் காரணமாக சென்னை விமானநிலையத்தின் ஓடுபாதையில் மழை நீர் தேங்கியது என்று குறிப்பிடப்பட்டிருந்தது.

VIDEO | Runway at Chennai Airport inundated amid incessant rainfall in the city, triggered by Cyclone Michaung. pic.twitter.com/Cx6583pZgG

— Press Trust of India (@PTI_News) December 4, 2023

Archive

இதே வீடியோவை பிடிஐ செய்தி நிறுவனம் மற்றும் ஆங்கில ஊடகங்களும் 2023ம் ஆண்டு வெளியிட்டிருந்தன. இதன் மூலம் நாம் ஆய்வுக்கு எடுத்துக்கொண்ட வீடியோ மும்பை விமான நிலையம் இல்லை என்பது உறுதியாகிறது.

முடிவு:

இது 2023ம் ஆண்டு மிக்ஜாம் புயலில் சென்னை விமானநிலையம் பாதிக்கப்பட்ட போது எடுக்கப்பட்ட வீடியோவை 2025ல் மும்பை விமான நிலையம் என்று தவறாக சமூக ஊடகங்களில் பகிர்ந்து வருவதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I X Post I Google News Channel I Instagram