1900ம் ஆண்டு சேலத்தில் இருந்த சைக்கிள் கடை என்று பரவும் புகைப்படம் உண்மையா?

1900ம் ஆண்டில் சேலம் மற்றும் கோவையிலிருந்த சைக்கிள் பழுது பார்க்கும் கடை என்று ஒரு புகைப்படம் சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook 1 I Facebook 2 I Archive

பழைய கால பின் சக்கரம் பெரிதாக இருக்கும் சைக்கிள்கள் இருக்கும் கடை ஒன்றின் புகைப்படம் பகிரப்பட்டுள்ளது. அதில் ஆங்கிலத்தில், “ஸ்மித் பை சைக்கிள் வொர்க்ஸ்” என்று எழுதப்பட்டிருந்தது. நிலைத் தகவலில், “1900 சேலம் கோட்டை அருகே இருந்த மிதிவண்டி பழுது பார்க்கும் கடை” என்று குறிப்பிடப்பட்டிருந்தது. 

இதே புகைப்படத்தை “1900 கோவை மணிக்கூண்டு அருகே இருந்த மிதிவண்டி பழுது பார்க்கும் கடை…” என்று குறிப்பிட்டு வேறு சிலர் சமூக ஊடகங்களில் பகிர்ந்து வருகின்றனர்.

உண்மை அறிவோம்:

புகைப்படத்தில் உள்ளவர்களைப் பார்க்கும் போதே இது இந்தியாவில் எடுக்கப்பட்டதாக இருக்க வாய்ப்பில்லை என்பது தெரிகிறது. இந்த பதிவை வௌியிட்டவர் தெரியாமல் பதிவிட்டாரா அல்லது நையாண்டிக்காகப் பதிவிட்டாரா என்று தெரியவில்லை. பலரும் இதை லைக் செய்து வருகின்றனர். இவரைப் போல பலரும் இந்த புகைப்படத்தைப் பதிவிட்டு சேலம் என்று குறிப்பிட்டுள்ளனர். பெரும்பாலான பதிவுகளில் இது வெளிநாடு என்று குறிப்பிட்டு சிலராவது பதிவிட்டிருந்தனர். ஆனால், நாம் ஆய்வுக்கு எடுத்துக்கொண்ட பதிவில் அப்படி இல்லை. மேலும், இவரைப் போல நையாண்டி, நக்கல் என எதுவும் இன்றி பலரும் இந்த புகைப்படம் ‘சேலத்தில் எடுக்கப்பட்டது’ என்று பதிவிட்டு வருகின்றனர்.

1900ம் ஆண்டு என்பது ஆங்கிலேயர்கள் இந்தியாவை ஆட்சி செய்த காலம். அப்போது அதிக அளவில் ஆங்கிலேயர்கள் இந்தியாவில் வசித்து வந்தனர். எனவே, இந்த தகவல் உண்மை என்று கருதி பதிவிட்டுள்ளார்களா என்ற சந்தேகத்தின் பேரில் இந்த புகைப்படத்தை ஆய்வு செய்தோம்.

இந்த புகைப்படத்தைக் கூகுள் லென்ஸ் தளத்தில் பதிவேற்றி தேடினோம். அப்போது இந்த இந்த புகைப்படம் இங்கிலாந்தின் பிரைட்டன் (Brighton) என்ற ஊரில் செயல்பட்டு வந்த ஜே டபிள்யூ வால்ட்ரான் ஸ்மித் & சைக்கிள் ஒர்க்ஸ்  (J W Waldron’s Smith & Bicycle Works) என்ற கடை என்று குறிப்பிட்டு வௌியான பல செய்திகள், ட்வீட்கள் நமக்குக் கிடைத்தன.

For your weekly does of Brighton & Hove's history, we have J W Waldron's Smith & Bicycle Works.

Waldron's occupied the ramshackle building on Gardner Street from 1874-1903. They had a steep ladder leading to the upper floors where penny farthings were stored.#ThrowbackThursday pic.twitter.com/kEhocaSO8t

— Brighton Museums (@BrightonMuseums) November 3, 2022

Archive

இந்த புகைப்படத்தை Brighton Museums என்ற எக்ஸ் தள பக்கம் 2022ம் ஆண்டு பதிவிட்டிருந்தது. இது இங்கிலாந்தின் பிரைட்டன் நகரில் செயல்படும் ஒரு அருங்காட்சியகம் ஆகும். அது வெளியிட்டிருந்த பதிவில், “1874-1903 வரை கார்ட்னர் தெருவில் உள்ள ராம்ஷேக் கட்டிடத்தை வால்ட்ரான் பயன்படுத்தி வந்தார். அவர்கள் மேல் தளங்களுக்குச் செல்லும் செங்குத்தான ஏணியைக் கொண்டிருந்தனர். அங்கு பென்னி ஃபார்திங்ஸ் (penny farthings) சேமிக்கப்பட்டது” என்று குறிப்பிடப்பட்டிருந்தது. முன்புற சக்கரம் பெரிதாகவும் பின்புற சக்கரம் சிறிதாகவும் இருக்கும் பழங்கால சைக்கிளுக்கு பெயர் பென்னி ஃபார்திங்ஸ் என்பது தெரியவந்தது.

உண்மைப் பதிவைக் காண: pixstory.com I Archive 1 I ebay.com I Archive 2

மேலும், பழங்கால புகைப்படங்கள், பொருட்கள் விற்பனை செய்யப்படும் தளங்களிலும் கூட இந்த புகைப்படம் வெளியாகி இருந்தது. அவற்றிலும் கூட இது பிரைட்டன்னில் 1900ம் காலகட்டத்தில் எடுக்கப்பட்டது என்று குறிப்பிடப்பட்டிருந்தது. இவை எல்லாம் இந்த புகைப்படம் கோவையிலோ, சேலத்திலோ எடுக்கப்பட்டது இல்லை என்பதை உறுதி செய்தன. இவற்றின் அடிப்படையில் நாம் ஆய்வுக்கு எடுத்துக்கொண்ட பதிவில் குறிப்பிடப்பட்டுள்ள தகவல் தவறானது என்பது உறுதியாகிறது.

முடிவு:

இங்கிலாந்தின் பிரைட்டனில் எடுக்கப்பட்ட சைக்கிள் கடை ஒன்றின் பழைய புகைப்படத்தை தமிழ்நாட்டின் சேலத்தில் எடுக்கப்பட்டது என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I X Post I Google News Channel I Instagram