ஊட்டியில் அணை கட்ட கோரி தமிழ் இளைஞர்கள் போராட்டம் என்று பரவும் வதந்தியால் சர்ச்சை…

‘’ ஊட்டியில் அணை கட்ட கோரி தமிழ் இளைஞர்கள் போராட்டம்’’ என்று கூறி சமூக வலைதளங்களில் பகிரப்படும் ஒரு செய்தி பற்றி ஆய்வு செய்தோம். 

தகவலின் விவரம்:

இதனை வாசகர்கள் நமக்கு வாட்ஸ்ஆப் வழியே (+919049044263 & +919049053770) அனுப்பி, உண்மையா என்று சந்தேகம் கேட்டனர். 

பலரும் இதனை உண்மை என நம்பி ஷேர் செய்து வருகின்றனர்.  

உண்மை அறிவோம்:

மேற்கண்ட செய்தி உண்மையா என்று நாம் தமிழ்நாடு காவல்துறையின் டிஜிபி அலுவலகத்தைத் தொடர்பு கொண்டு விளக்கம் கேட்டோம். ‘’இவ்வாறு எந்த போராட்டமும் ஊட்டி சுற்றுவட்டாரத்தில் தற்போது நடைபெறவில்லை. சில ஆண்டுகளுக்கு முன் இதுபோன்ற வதந்தி சமூக வலைதளங்களில் பகிரப்பட்டது. அப்போதே நாம் இதுபற்றி எச்சரிக்கை வெளியிட்டிருந்தோம். தற்போது காவிரி விவகாரம் வெடித்துள்ளதால், சிலர் பழைய வதந்தியை புதியதுபோல மீண்டும் பரப்ப தொடங்கியுள்ளனர். இது சட்டப்படி குற்றமாகும்,’’ என்றனர். 

அடுத்தப்படியாக, நாம் நீலகிரி மாவட்ட ஆட்சியர் அலுவலகத்தைத் தொடர்பு கொண்டு பேசினோம். அப்போது, ‘’ நிலக்கோட்டை மற்றும் கூடலூர் (தமிழ்நாடு) பகுதிகளில் உற்பத்தியாகி, கர்நாடகா எல்லைக்குள் நுழைந்து மீண்டும் தமிழ்நாட்டை அடைந்து, முதுமலை, தெங்குமரஹடா வழியாகப் பவானிசாகர் நீர்த்தேக்கத்தில் சங்கமிக்கும் மோயாறு பற்றியே இவ்வாறு வதந்திகள் பரப்பப்படுகிறது. இந்த ஆற்றின் புவியியல் அமைப்பு பற்றி தெரிந்த யாரும் இப்படி பேச மாட்டார்கள். ஆம், பெருமளவு தமிழ்நாடு – கர்நாடகா எல்லைக் கோட்டிலேயே இந்த ஆறு அடர்ந்த வனப்பகுதியில் மாறி மாறி பயணித்து, இறுதியாக, பவானிசாகர் வந்தடைகிறது. இதில் அணை கட்டுவது சாத்தியமற்ற விசயம்,’’ என்று நமக்கு அதிகாரிகள் தெரிவித்தனர். 

எனவே, அடிப்படை ஆதாரமின்றி ஒரு வதந்தியை பல ஆண்டுகளாகச் சமூக வலைதளங்களில் பகிர்ந்து வருகின்றனர் என்று சந்தேகமின்றி உறுதி செய்யப்படுகிறது.  

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம். 

எங்களது சமூக வலைதள பக்கங்களை பின்தொடர…

Facebook Page I Twitter PageI Google News Channel I Instagram