இஸ்ரேல் நாட்டின் ஹைஃபா நகர் அருகில் உள்ள ரசாயன ஆலையை ஹிஸ்புல்லா அமைப்பு தாக்கியதாக ஒரு வீடியோ சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.
தகவலின் விவரம்:
உண்மைப் பதிவைக் காண: Facebook I Archive
எங்கோ ஒரு இடத்தில், வெடிப்பு ஏற்பட்டு நெருப்பு பிழம்பாக எழும் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “ஹிஸ்புல்லா முதலில் ஹைஃபாவின் தெற்கே உள்ள பெட்ரோ கெமிக்கல் ஆலையைத் தாக்கியது. இந்த வீடியோ ஆக்கிரமிக்கப்பட்ட பாலஸ்தீனத்திற்குள் இருந்து எடுக்கப்பட்டது” என்று குறிப்பிடப்பட்டிருந்தது. இந்த வீடியோ பதிவைப் பலரும் சமூக ஊடகங்களில் பகிர்ந்து வருகின்றனர்.
உண்மை அறிவோம்:
காஸா, லெபனான், ஈரான் மீது இஸ்ரேல் தொடர்ந்து தாக்குதல் நடத்தி வருவதாக, செய்திகள் வந்துகொண்டிருக்கின்றன. இந்த சூழலில் இஸ்ரேலைத் தாக்கிய ஹிஸ்புல்லா என்று சிலர் சமூக ஊடகங்களில் மேற்கண்டவாறு வீடியோ பதிவிட்டு வருகின்றனர்.
இஸ்ரேல் ஆக்கிரமித்துள்ள பாலஸ்தீன பகுதியில் உள்ள இஸ்ரேல் அரசுக்கு சொந்தமான ரசாயன ஆலை மீது லெபனான் நாட்டைச் சார்ந்த ஹிஸ்புல்லா பயங்கரவாத அமைப்பு தாக்குதல் நடத்தியதாகப் பதிவிடப்பட்டுள்ளது. இந்த தகவல் உண்மையா என்று அறிய ஆய்வு செய்தோம்.
நாம் ஆய்வுக்கு எடுத்துக்கொண்ட வீடியோ காட்சியை புகைப்படங்களாக மாற்றி கூகுள் லென்ஸ் தளத்தில் பதிவேற்றி தேடினோம். அப்போது செப்டம்பர் மாத இறுதியில் இருந்து இந்த வீடியோ சமூக ஊடகங்களில் பகிரப்பட்டு வந்திருப்பதைக் காண முடிந்தது. அரபு மொழியில் வெளியிடப்பட்ட எக்ஸ் தள பதிவு ஒன்றை மொழிமாற்றம் செய்து பார்த்தோம். அதில் “ஹொடைடாவின் மின்சாரம் மற்றும் துறைமுகங்கள் மீது இஸ்ரேல் தாக்குதல்” என்று குறிப்பிடப்பட்டிருந்தது.
தொடர்ந்து தேடிய போது ஆங்கில மொழியில் வெளியான பதிவுகளும் நமக்குக் கிடைத்தன. அதில், ஏமன் நாட்டின் ஹவுதி கட்டுப்பாட்டில் உள்ள துறைமுகம் மற்றும் மின்சார விநியோக அமைப்புகள் மீது இஸ்ரேல் தாக்குதல் நடத்தியது என்று குறிப்பிடப்பட்டிருந்தது. இதன் மூலம் இஸ்ரேல் மீது ஹிஸ்புல்லா நடத்திய தாக்குதல் இது இல்லை என்பது உறுதியானது.
ஹொடைடா, ஏமன், இஸ்ரேல் தாக்குதல் என சில அடிப்படை வார்த்தைகளை கூகுளில் டைப் செய்து தேடினோம். அப்போது Reuters உள்ளிட்ட சர்வதேச ஊடகங்களில் இது தொடர்பாக நாம் ஆய்வுக்கு எடுத்துக்கொண்ட வீடியோவுடன் கூடிய செய்திகள் நமக்குக் கிடைத்தன. அவை அனைத்திலும் இந்த சம்பவம் ஏமன் மீது இஸ்ரேல் நடத்திய தாக்குதல் என்றே குறிப்பிடப்பட்டிருந்தது. இவை எல்லாம் நாம் ஆய்வுக்கு எடுத்துக்கொண்ட பதிவில் குறிப்பிட்டுள்ள தகவல் தவறானது என்பதை உறுதி செய்தன.
உண்மைப் பதிவைக் காண: theguardian.com I Archive
இஸ்ரேல் ஏமன் நாட்டில் ஹவுதி கட்டுப்பாட்டில் உள்ள துறைமுக நகரின் மீது நடத்திய தாக்குதல் காட்சியை இஸ்ரேல் மீது ஹிஸ்புல்லா தாக்கியதாக தவறான தகவலை சேர்த்து பகிர்ந்திருப்பது தெளிவாகிறது. இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.
முடிவு:
ஏமன் கிளர்ச்சியாளர்கள் கட்டுப்பாட்டில் உள்ள பகுதி மீது இஸ்ரேல் நடத்திய தாக்குதலை இஸ்ரேல் மீது ஹிஸ்புல்லா நடத்திய தாக்குதல் என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.
சமூக ஊடகங்களில் எங்களை பின் தொடர விரும்பினால்…
Facebook I X Post I Google News Channel I Instagram
Title:இஸ்ரேலின் ரசாயன ஆலையை தாக்கிய ஹிஸ்புல்லா என்று பரவும் வீடியோ உண்மையா?
Fact Check By: Chendur PandianResult: False
