பிரான்சில் மோடியை வரவேற்க ஒருவர் மட்டுமே வந்ததாக பரவும் தகவல் உண்மையா?

பிரான்ஸ் நாட்டுக்கு சென்ற மோடியை ஒரே ஒருவர் வரவேற்றார் என்று ஒரு வீடியோ சமூக ஊடகங்களில் பகிரப்பட்டு வருகிறது. அது பற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

மோடி பிரான்ஸ் நாட்டுக்கு சென்ற வீடியோ பகிரப்பட்டுள்ளது. ஒரே ஒருவர் அவரை வரவேற்பது போல் உள்ளது. நிலைத் தகவலில், “வடக்கன் வெச்சு செஞ்சுட்டான்ய்யா

எங்க ஜி யை பிரான்ஸ் ஏர்போர்ட்ல வரவேற்க்க ஒரு ஆளுதானா வேற யாரும் இல்லையா. அட பாவத்தே” என்று குறிப்பிடப்பட்டிருந்தது.

இந்த வீடியோ பதிவை Xavier Chinnappan என்ற ஃபேஸ்புக் ஐடி கொண்டவர் 2023 ஜூலை 14ம் தேதி பதிவிட்டுள்ளார். இதை பலரும் பகிர்ந்து வருகின்றனர்.

உண்மை அறிவோம்:

பிரான்சின் தேசிய தினத்தில் பங்கேற்க பிரதமர் நரேந்திர மோடி அந்நாட்டுக்குச் சென்றார். அவருக்கு அங்கு சிறப்பான வரவேற்பு அளிக்கப்பட்டது. ஜூன் 14, 2023 அன்று நடந்த பிரான்ஸ் தேசிய தினத்தில் சிறப்பு விருந்தினராக அவர் பங்கேற்றார். அந்நாட்டு அதிபர் இமானுவல் மேக்ரான் அழைப்பு விடுத்ததின் அடிப்படையில் நரேந்திர மோடி அந்நாட்டுக்கு சென்றார்.

இந்த நிலையில் மோடியை பிரான்ஸ் நாட்டில் ஒரே ஒரு நபர் வரவேற்றார் என்று சமூக ஊடகங்களில் பலரும் பதிவிட்டு வருகின்றனர். இந்த வீடியோ பிரதமர் நரேந்திர மோடி பிரான்சுக்கு சென்ற போது எடுக்கப்பட்டது தானா, அவரை ஒரே ஒருவர்தான் வரவேற்றாரா என்று ஆய்வு செய்தோம்.

கூகுளில், பிரான்சுக்கு சென்ற மோடி, பிரான்சுக்கு வருகை புரிந்த மோடிக்கு வரவேற்பு என சில கீ வார்த்தைகளைப் பயன்படுத்தி தேடினோம். அப்போது பிரான்ஸ் நாட்டு ஊடகம் வெளியிட்டிருந்த வீடியோ கிடைத்தது. பிரான்ஸ் நாட்டுக்கு வந்த நரேந்திர மோடியை வரவேற்ற வீடியோதான் இது என்பது உறுதியானது. மோடியை வரவேற்றது யார் என்று பார்த்தோம். பிரான்ஸ் நாட்டின் பிரதமர் எலிசபெத் பார்ன் (Élisabeth Borne) விமான நிலையத்துக்கு வந்து மோடியை வரவேற்றார் என்பது தெரிந்தது. அதைத் தொடர்ந்து வரிசையாக நின்று பலரும் மோடியை வரவேற்றதைக் காண முடிந்தது. அதைத் தொடர்ந்து ராணுவத்தினர் அளித்த மரியாதையையும் காண முடிந்தது.  

பிரதமர் நரேந்திர மோடி வெளியிட்டிருந்த ட்வீட்டில், “பாரீஸ் நகரம் சென்றடைந்தேன். என்னை விமான நிலையத்தில் பிரான்ஸ் பிரதமர் எலிசபெத் பார்ன் சிறப்பான முறையில் வரவேற்றார். சம்பிரதாய முறைப்படி வரவேற்பு அளிக்கப்பட்டது” என்று குறிப்பிட்டிருந்தார். இவை எல்லாம் பிரதமர் மோடிக்கு வழக்கமான வரவேற்பு அளிக்கப்பட்டது என்பதையும், ஒரே ஒரு நபர் வந்து வரவேற்றார் என்று பகிரப்படும் தகவல் தவறானது என்பதையும் உறுதி செய்தன.

PM @narendramodi arrived in Paris a short while ago.

He was warmly received by PM @Elisabeth_Borne at the airport.

The PM was accorded a ceremonial welcome upon his arrival. pic.twitter.com/2eCzp2Pjyw

— PMO India (@PMOIndia) July 13, 2023

Archive

முடிவு:

பிரான்ஸ் சென்ற பிரதமர் நரேந்திர மோடிக்கு அளிக்கப்பட்ட வீடியோவின் அளவைக் குறைத்து, மோடியை ஒரே ஒருவர்தான் வரவேற்க வந்தார் என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. மோடியை பிரான்ஸ் பிரதமர் உள்ளிட்டவர்கள் வரவேற்றது உறுதி செய்யப்பட்டுள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel