மணிப்பூருக்கு வந்த பாஜக நிர்வாகிகளுக்கு அடி உதை என்று பரவும் வீடியோ உண்மையா?

மணிப்பூருக்கு வந்த பாஜக நிர்வாகிகளுக்கு அடி உதை விழுந்தது என்று ஒரு வீடியோ சமூக ஊடகங்களில் பகிரப்பட்டு வருகிறது. இது பற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

பாஜக துண்டு அணிந்த சிலரை மக்கள் விரட்டியடிக்கும் வீடியோ பகிரப்பட்டுள்ளது. நிலைத் தகவலில், “மணிப்பூருக்கு வந்த பாஜக தலைவர்களுக்கு கிடைத்த அமோக வரவேற்பு.

நாட்டில் கலவரத்தை தூண்டிவிட்டு அதில் குளிர்காய நினைத்தால் மக்களின் எதிர்வினை இப்படித்தான் இருக்கும் என்பதை பாஜக சங்கிகளுக்கு நாடெங்கும் மக்கள் புரிய வைப்பார்கள்.

மைத்தி இனமக்களின் வரவேற்பே இப்படி இருந்தால் குக்கி இன மக்களின் வரவேற்பு எப்படி இருக்கும் யோசித்துப் பாருங்கள்” என்று குறிப்பிடப்பட்டிருந்தது. இந்த பதிவை RT Arasu என்ற ஃபேஸ்புக் ஐடி கொண்டவர் 2023 ஆகஸ்ட் 7ம் தேதி பதிவிட்டுள்ளார். இவரைப் போல பலரும் இந்த வீடியோவை பகிர்ந்து வருகின்றனர்.

உண்மை அறிவோம்:

மணிப்பூரில் சில மாதங்களாக நிகழ்ந்து வரும் வன்முறைச் சம்பவங்களை வைத்து உண்மையுடன் வதந்திகளும் அதிக அளவில் சமூக ஊடகங்களில் பகிரப்பட்டு வருகின்றன. மணிப்பூர் வந்த பாஜக நிர்வாகிகளை பொது மக்கள் விரட்டியடித்ததாக வீடியோ பகிரப்பட்டு வருகிறது. இது இப்போது எடுக்கப்பட்டதா என்று ஆய்வு செய்தோம்.

வீடியோவை புகைப்படங்களாக மாற்றி கூகுள் ரிவர்ஸ் இமேஜ் தேடலில் பதிவேற்றித் தேடினோம். அப்போது, நாம் ஆய்வுக்கு எடுத்துக்கொண்ட அதே வீடியோவை 2017ம் ஆண்டு சில செய்தி ஊடகங்கள் வெளியிட்டிருப்பதைக் காண முடிந்தது.

அந்த செய்திகளில், மேற்கு வங்க மாநிலம் டார்ஜிலிங்கில் பாஜக மாநிலத் தலைவர் மீது தாக்குதல் நடந்தது என்று குறிப்பிடப்பட்டிருந்தது. இது தொடர்பான செய்திகளும் நமக்குக் கிடைத்தன. இவை எல்லாம் இந்த வீடியோவுக்கும் மணிப்பூருக்கும் தொடர்பில்லை என்பதை உறுதி செய்தன. 

2017ல் மேற்கு வங்கத்தில் பாஜக தலைவர் மீது நடத்தப்பட்ட தாக்குதல் வீடியோவை எடுத்து, 2023 மணிப்பூர் வன்முறையுடன் தொடர்புபடுத்தி தவறாகப் பகிர்ந்திருப்பதைத் தகுந்த ஆதாரங்கள் அடிப்படையில் உறுதி செய்துள்ளோம். இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

மணிப்பூர் வந்த பாஜக நிர்வாகிகளை பொது மக்கள் அடித்து உதைத்தனர் என்று பரவும் வீடியோ 2017ல் மேற்கு வங்கத்தில் எடுக்கப்பட்டது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel