பாகிஸ்தானுக்கு பாடம் கற்பிக்க புறப்பட்ட வீரத்தாய் என்று பரவும் வீடியோ தற்போது எடுக்கப்பட்டதா?

‘’பாகிஸ்தானுக்கு பாடம் கற்பிக்க புறப்பட்ட வீரத்தாய்,’’ என்று கூறி, சமூக வலைதளங்களில் பகிரப்படும் ஒரு வீடியோ பற்றி ஆய்வு மேற்கொண்டோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’ *பாகிஸ்தானுக்கு பாடம் கற்பிக்க புறப்பட்டுவிட்டார் வீரத்தாய்* வாழ்க பாரதம் ,’’ என்று எழுதப்பட்டுள்ளது.

இதனுடன் இந்திய பாதுகாப்புப் படை சீருடை அணிந்த பெண் ஒருவர், தனது குடும்பத்தினருக்கு, கண்ணீர் மல்க விடை கொடுத்துவிட்டு, ரயில் ஏறி, பணிக்குச் செல்வது போன்ற காட்சிகள் கொண்ட ஒரு வீடியோவும் இணைக்கப்பட்டுள்ளது.

இதனை பார்க்கும்போது, இந்தியா – பாகிஸ்தான் இடையே ஏற்பட்டுள்ள மோதலில் பங்கேற்க, குறிப்பிட்ட வீராங்கனை புறப்பட்டுச் செல்வதைப் போன்று உள்ளது.

Claim Link 1 l Claim Link 2 l Claim Link 3 l Claim Link 4

பலரும் இதனை உண்மை என நம்பி, சமூக வலைதளங்களில் ஷேர், கமெண்ட் செய்து வருகின்றனர்.

உண்மை அறிவோம்:

மேற்கண்ட தகவல் உண்மையா என்று நாம் ஆய்வு மேற்கொண்டோம். அப்போது, இந்த வீடியோவுக்கும், தற்போதைய இந்தியா – பாகிஸ்தான் மோதலுக்கும் எந்த தொடர்பும் இல்லை, என்று தெரியவந்தது.

மேற்கண்ட வீடியோவின் தலைப்பில், இது தற்போதைய வீடியோ என்று குறிப்பிடப்பட்டுள்ளது. ஆனால், வீடியோவின் உள்ளடக்கத்தைப் பார்த்தபோது, தெளிவாக, இது கடந்த 2023ம் ஆண்டு AB Plus Photography (Source) சார்பாக பதிவு செய்யப்பட்ட காட்சி என்று, கூறப்பட்டுள்ளதைக் கண்டோம்.

BSF படைப் பிரிவில், மகாராஷ்டிரா மாநிலம், கோல்ஹாபூரில் பணிபுரியும் Varsha Patil என்பவர் பேறுகால விடுப்பு முடிந்து, தனது குடும்பத்தினரிடம் இருந்து விடைபெற்று, பணிக்குத் திரும்பிச் செல்வதாகவும், அந்த வீடியோவிலேயே அடுத்தடுத்த காட்சிகளில் தெளிவாகக் குறிப்பிட்டுள்ளனர்.

இதன்மூலமாக, வீடியோவை முழுவதும் பார்க்காமலேயே தற்போதைய அரசியல் சூழலுடன் தொடர்புபடுத்தி, புதியது போன்று பகிர்ந்து, சமூக வலைதளங்களில் வதந்தி பரப்புகிறார்கள், என்று தெரியவருகிறது.

இது மட்டுமின்றி கூடுதல் ஆதாரம் சிலவற்றையும் கீழே இணைத்துள்ளோம்.

Evidence 1 l Evidence 2 l Evidence 3 l Evidence 4

எனவே, நாம் ஆய்வுக்கு எடுத்துக் கொண்ட வீடியோ தற்போது எடுக்கப்பட்டதல்ல; கடந்த 2023ம் ஆண்டு மார்ச் மாதம் பதிவு செய்யப்பட்ட ஒன்று, என சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.