பாகிஸ்தான் மீது தாக்குதல் நடத்த முடியாது என்று இந்திய ராணுவம் மறுப்பு தெரிவித்ததா?

‘’பாகிஸ்தான் மீது தாக்குதல் நடத்த முடியாது என கலைந்து சென்ற ராணுவ அதிகாரிகள்’’ என்று கூறி, சமூக வலைதளங்களில் பகிரப்படும் ஒரு வீடியோ பற்றி ஆய்வு மேற்கொண்டோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’ *பாகிஸ்தான் மீது, தாக்குதல் நடத்த முடியாது.. என கலைந்து சென்ற ராணுவ அதிகாரிகள்.*

பாசிச அயோக்கிய பாஜக உடைய கேவலமான அரசியலால் எந்த அளவுக்கு ராணுவம் மனமொடிந்திருந்தால் இப்படி சொல்லி எழுந்து செல்வார்கள்.

தேர்தலுக்காக புல்வாமாவில் 44 ராணுவ வீரர்களை அன்றைக்கு பலி கொடுத்தோம் அதே தேர்தலுக்காக இன்றைக்கு 26 அப்பாவி பொதுமக்களை நாம் பலி கொடுத்திருக்கிறோம்.

இதன் பின் உள்ள உண்மை எல்லாம் ராணுவத்திற்கு தெரியாமல் இருக்குமா.

அதனால்தான் உங்கள் கேவலமான தேர்தல் அரசியலுக்கு நாங்கள் ஆட்கள் இல்லை என்று எழுந்து போகிறார்கள்.,’’ என்று எழுதப்பட்டுள்ளது.

Claim Link 1 l Claim Link 2 l Claim Link 3

பலரும் இதனை உண்மை என நம்பி, சமூக வலைதளங்களில் ஷேர், கமெண்ட் செய்து வருகின்றனர்.

உண்மை அறிவோம்:

மேற்கண்ட தகவல் உண்மையா என்று நாம் ஆய்வு மேற்கொண்டோம். அப்போது, இதற்கும், சமீபத்திய பாஹல்காம் தீவிரவாத தாக்குதலுக்கும் இடையே எந்த சம்பந்தமும் இல்லை என்று தெரியவந்தது.

இதன்படி, Government of Punjab யூடியுப் வலைதளத்தில் வெளியிட்ட வீடியோ பதிவு ஒன்றின் லிங்க் நமக்குக் கிடைத்தது.

இந்த செய்தியில், ராணுவ அதிகாரி கர்னல் புஷ்பிந்தர் சிங் என்பவர் சமீபத்தில் பஞ்சாப் மாநில போலீசார் மீது புகார் ஒன்றை வெளியிட்டார். அதில், பார்க்கிங் பிரச்னை ஒன்று தொடர்பாக, அவரையும், அவரது மகனையும் பஞ்சாப் போலீசார் தாக்கியதாகக் கூறியிருந்தார். இதன்பேரில், பஞ்சாப் மாநில டிஜிபி மற்றும் ராணுவ அதிகாரிகள், ஊடக சந்திப்பு ஒன்றை ஏற்பாடு செய்து, மேற்கண்ட விவகாரம் தொடர்பாக, விளக்கம் அளித்தனர். அந்த வீடியோவை எடுத்து, காஷ்மீர் விவகாரத்துடன் தொடர்புபடுத்தி சமூக வலைதளங்களில் வேண்டுமென்றே வதந்தி பரப்புகிறார்கள் என்று தெரியவருகிறது.

The Economic Times l ETV Bharat

எனவே, நாம் ஆய்வுக்கு எடுத்துக் கொண்ட வீடியோ பற்றிய தகவல் தவறானது, என்று சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.