ரஷ்யாவில் நிலநடுக்கம் ஏற்பட்டதும் ஹவாய் நோக்கிச் சென்ற சுனாமி அலை என்று பரவும் வீடியோ உண்மையா?

ரஷ்யாவில் நிலநடுக்கம் ஏற்பட்ட பிறகு, ஹவாய் நோக்கி சுனாமி அலைகள் சென்ற காட்சி என்று ஒரு வீடியோ தொகுப்பு சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

கடலில் அலையில் சிக்கி சிறிய படகு ஒன்று கவிழும் வீடியோ உள்பட 10க்கும் மேற்பட்ட சிறிய வீடியோக்களை ஒன்றாகத் தொகுத்து ஃபேஸ்புக்கில் பதிவிட்டுள்ளது. நிலைத் தகவலில், “ரஷ்யாவின் கம்சாட்கா தீபகற்பத்தில் 8.7 பாரிய நிலநடுக்கம் ஏற்பட்ட பிறகு, சுனாமி அலைகள் ஹவாய் மற்றும் ஜப்பான் பரந்த பசிபிக் கடற்கரை நோக்கிச் செல்கிறது” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

ரஷ்யாவில் நிலநடுக்கம் ஏற்பட்டதைத் தொடர்ந்து சமூக ஊடகங்களில் பழைய வீடியோக்களை வைத்து பதிவுகள் பகிரப்பட்டு வருகின்றன. சுனாமி அலைகள் ஹவாய், ஜப்பான் கடற்கரையை நோக்கிச் சென்ற காட்சி என்று குறிப்பிட்டு ஒரு வீடியோ தொகுப்பு சமூக ஊடகங்களில் பகிரப்பட்டு வருகிறது. இது உண்மையா என்று அறிய ஆய்வு செய்தோம்.

படகு கவிழும் வீடியோ காட்சியைப் புகைப்படமாக மாற்றி கூகுள் லென்ஸ் தளத்தில் பதிவேற்றித் தேடினோம். இரண்டு ஆண்டுகளுக்கு முன்பு கார்டியன் என்ற முன்னணி ஊடகம் இந்த வீடியோவை யூடியூபில் வெளியிட்டிருந்தது. பிப்ரவரி 5, 2023ம் ஆண்டு வெளியான அந்த பதிவில் “மிகப்பெரிய அலையில் சிக்கிக் கவிழ்ந்த சிறிய கப்பலிலிருந்தவர்களை அமெரிக்கக் கடலோர காவல் படை வீரர்கள் பாதுகாத்த காட்சி” என்று குறிப்பிடப்பட்டிருந்தது.

உண்மைப் பதிவைக் காண: threads.com I Archive

அடுத்ததாக நிலநடுக்கத்தின் காரணமாக உயரமான கட்டிடம் ஆட, உச்சியிலிருந்த மக்கள் தடுமாறிய வீடியோவை புகைப்படமாக மாற்றித் தேடினோம். 2025 மார்ச் இறுதியில் தாய்லாந்து, மியான்மர், சீனாவில் ஏற்பட்ட நிலநடுக்கத்தின் போது தாய்லாந்து நாட்டில் அந்த வீடியோ பதிவு செய்யப்பட்டதாகத் தகவல் நமக்குக் கிடைத்தது.

மூன்றாவதாக மெட்ரோ ரயில் குலுங்கிய வீடியோ காட்சி தொடர்பாக ஆய்வு செய்தோம். அதுவும் கடந்த மார்ச் மாதம் தாய்லாந்தில் ஏற்பட்ட நிலநடுக்கத்தின் போது பதிவான காட்சி என்பது தெரியவந்தது. இதன் மூலம் இதுவும் ரஷ்யா நிலநடுக்கத்துடன் தொடர்புடையது இல்லை என்பது உறுதியானது.

அடுத்ததாக கடற்கரையோரம் உள்ள பங்களா குடியிருப்புகளை ராட்சத அலை தாக்கும் காட்சி தொடர்பாக ஆய்வு செய்தோம். அமெரிக்காவின் மாசசூசெட்ஸில் உள்ள சிச்சுவேட் பகுதியை ராட்சத அலைகள் தாக்கியதாக இந்த வீடியோ 2020ம் ஆண்டு மார்ச் 4ம் தேதி யூடியூபில் பதிவிடப்பட்டிருந்தது. பல ஆண்டுகளாக இந்த வீடியோ சமூக ஊடகங்களில் பகிரப்பட்டு வருவதையும் காண முடிந்தது.

உண்மைப் பதிவைக் காண: instagram.com I Archive

அடுத்ததாக குடியிருப்பு பகுதி ஒன்று நிலநடுக்கத்தால் குலுங்கும் வீடியோவை ஆய்வு செய்தோம். 2024ம் ஆண்டில் தெற்கு ஜப்பானில் ஏற்பட்ட நிலநடுக்கத்தின் போது அந்த வீடியோ பதிவு செய்யப்பட்டதாக வெளியான சமூக ஊடக பதிவுகள் நமக்குக் கிடைத்தன.

அடுத்ததாக கடலோரம் உள்ள கட்டிடங்கள் மீது ராட்சத அலை தாக்கும் வீடியோ தொடர்பாக ஆய்வு செய்தோம். அந்த வீடியோவை 2021ம் ஆண்டு மே 2ம் தேதி சிஎன்என் ஊடகம் பயன்படுத்தி செய்தி வெளியிட்டிருந்ததைக் கண்டறிந்தோம். சிஎன்என் மட்டுமின்றி வேறு பல ஊடகங்களிலும் அந்த வீடியோ வெளியாகி இருந்தது. அதைத் தொடர்ந்த வந்த வீடியோக்கள் அனைத்துமே பழைய வீடியோக்களாகவே இருந்தன.

உண்மைப் பதிவைக் காண: cnn.com I Archive

அதில் சில வீடியோக்களில் ஜப்பானில் ஏற்பட்ட நிலநடுக்கம் என்று குறிப்பிடப்பட்டிருந்தது. இந்த ஆண்டு ஜூலை மாதம் முதல் வாரத்தில் ஜப்பானில் நிலநடுக்கம் ஏற்பட்டது. ஜப்பான் நிலநடுக்க சிசிடிவி பதிவுகளை தொகுத்து ஒன்றாக ரஷ்ய நிலநடுக்கம் என்று குறிப்பிட்டு வெளியிட்டிருந்தனர்.

கடைசியில் நிலநடுக்கம் ஏற்பட்டபோது அதிர்வுகளைச் சமாளித்து மருத்துவர்கள் அறுவைசிகிச்சை செய்த வீடியோவையும் வைத்திருந்தனர். அது ஒன்று மட்டுமே உண்மையானதாக இருந்தது. ரஷ்யாவில் நிலநடுக்கம் ஏற்பட்ட அன்றைய தினமே அனைத்து ஊடகங்களிலும் இந்த வீடியோ வெளியாகி இருந்தது. நிலநடுக்கத்தின் போதும் அறுவைசிகிச்சை செய்த மருத்துவர்களின் பேட்டியும் செய்தி ஊடகங்களில் வெளியாகி இருந்தது. இந்த ஒரு வீடியோவை தவிர்த்து வேறு எதுவும் ரஷ்ய நிலநடுக்கத்தின் போது எடுக்கப்பட்டது இல்லை என்பது உறுதி செய்யப்பட்டுள்ளது.

முடிவு:

பழைய ஜப்பான், மியான்மர், தாய்லாந்து நிலநடுக்கம் அமெரிக்க கடல் சீற்ற வீடியோக்களை ரஷ்யா நிலநடுக்கம் என்று தவறாக பதிவிட்டுள்ளதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.