“சென்னையின் சிங்கார கோலம்” என்று பரவும் மழை வெள்ள வீடியோ உண்மையா?

சென்னையின் சிங்கார கோலம் என்று சாலையில் மழை நீர் தேங்கியிருக்கும் வீடியோ ஒன்று சமூக ஊடகங்களில் வைரலாக பகிரப்பட்டு வருகிறது. இது தொடார்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

சாலையில் மழை வெள்ளம் போல் தேங்கியிருக்க, அதில் வாகனம் ஓட்டிச் செல்லும் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “தமிழ்நாட்டின் தலைநகரம் சென்னையின் சிங்காரகோலம்” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

சென்னையில் காற்றழுத்த தாழ்வு நிலை காரணமாக 2025 டிசம்பர் 1, 2ம் தேதிகளில் மழை பெய்தது. மழை பெய்து கொண்டிருக்கும் போதே வடியவில்லை என்று குற்றம்சாட்டி பலரும் சமூக ஊடகங்களில் பதிவிட்டு வருகின்றனர். இந்த நிலையில், சென்னை சாலைகளில் வெள்ளம் தேங்கியிருப்பதாக வீடியோ ஒன்றைப் பலரும் சமூக ஊடகங்களில் பதிவிட்டு வருகின்றனர்.

வீடியோவை பார்க்கும் போது சென்னையின் எந்த இடம் என்று தெரியவில்லை. தமிழில் எந்த பெயர் பலகையும் இல்லை. இந்தி எழுத்துக்கள் போன்று சில கடைகளில் எழுதப்பட்டிருப்பதை காண முடிந்தது. எனவே, சந்தேகத்தின் அடிப்படையில் இந்த வீடியோவை ஆய்வு செய்தோம்.

உண்மைப் பதிவைக் காண: instagram.com I Archive

வீடியோ காட்சிகளைப் புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். அதில் வீடியோவில் காட்டப்பட்டிருந்த Royal Indian Restaurant என்ற பெயரில் மேற்கு வங்க தலைநகர் கொல்கத்தாவில் உணவகம் இருப்பதாக தெரியவந்தது. அந்த கடையும் நாம் ஆய்வுக்கு எடுத்துக்கொண்ட வீடியோவின் கடையும் ஒன்றாக இருந்தது. மேலும் கடந்த அக்டோபர் மாதத்திலிருந்து இந்த வீடியோவை பலரும் சமூக ஊடகங்களில் பதிவிட்டு வந்திருந்ததையும் காண முடிந்தது. இதன் மூலம் இது சென்னை மழை வெள்ளத்தின் காட்சியில்லை என்பது உறுதியானது.

Google Street View

இந்த வீடியோ கொல்கத்தாவில் எடுக்கப்பட்டது என்பதை உறுதி செய்துகெகாள்ள அந்த சாலையில் கூகுள் ஸ்ட்ரீட் வியூவை பார்த்தோம். வீடியோவில் இடம் பெற்றிருந்த சாலையின் கடைகள் அனைத்தும் கூகுள் ஸ்ட்ரீட் வியூவில் காண முடிந்தது. இதன் மூலம் இந்த சாலை சென்னையில் இல்லை, கொல்கத்தாவில் உள்ளது என்பது உறுதியானது. இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

கொல்கத்தாவின் பழைய மழை வெள்ள பாதிப்பு வீடியோவை சென்னையின் மழை வெள்ள பாதிப்பு என்று தவறாக சமூக ஊடகங்களில் பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I X Post I Google News Channel I Instagram