பீகார் வெற்றி கொண்டாட்டத்தில் பெண்ணிடம் தவறாக நடந்த பாஜக தொண்டர்கள் என்று பரவும் வீடியோ உண்மையா?

பீகார் தேர்தல் வெற்றி கொண்டாட்டத்தின் போது பெண் ஒருவரிடம் சில்மிஷம் செய்த பாஜக தொண்டர்கள் என்று ஒரு வீடியோ சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

பெண் ஒருவர் செய்தியாளர்களுக்கு பேட்டி அளிக்கும் போது, அவருக்கு நிற்கும் நபர், அந்த பெண்ணிடம் அத்துமீறல்களை மேற்கொள்ளும் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “பீஹார் தேர்தல் சங்கிகள் கொண்டாட்டம்! மோந்து பாத்துட்டே வெற்றி கொண்டாட்டத்த ஆரம்பிச்சிருக்கானுக எத்தன பேரோட கற்பு காணாம போக போகுதோ” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

பீகார் சட்டமன்ற தேர்தல் முடிவுகள் நவம்பர் 14, 2025 அன்று வெளியானது. இந்த தேர்தலில் பாஜக – ஐக்கிய ஜனதா தள கூட்டணி மிகப்பெரிய வெற்றியை பெற்றது. இந்த வெற்றிக் கொண்டாட்டத்தின் போது பெண்மணி ஒருவரிடம் சங்கி அதாவது பாஜக தொண்டர் தவறாக நடந்துகொண்டார் என்று ஒரு வீடியோவை சிலர் சமூக ஊடகங்களில் பதிவிட்டு வருகின்றனர்.

வீடியோவில் அந்த பெண்மணி வங்க மொழியில் பேசுவது போல இருக்கின்றது. வீடியோவில் உள்ளவர்களும் மேற்கு வங்கம், வங்கதேசத்தைச் சார்ந்தவர்கள் போல உள்ளனர். வீடியோவில் உள்ள யாரிடமும் பாஜக கொடியோ, சின்னமோ இல்லை. அந்த பெண்மணி பேசும் போது பாஜக என்று குறிப்பிடவும் இல்லை. எனவே, பழைய வீடியோவை பீகாருடன் தொடர்புபடுத்தி வெளியிட்டுள்ளார்களா என்று அறிய ஆய்வு செய்தோம்.

உண்மைப் பதிவைக் காண: instagram.com I Archive

வீடியோ காட்சியை புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். அப்போது நவம்பர் 1, 2025ல் இருந்து இந்த வீடியோவை பலரும் சமூக ஊடகங்களில் பதிவிட்டு வந்திருப்பதை காண முடிந்தது. ஆனால், இந்த வீடியோவில் இருப்பவர் யார், எங்கு இந்த வீடியோ எடுக்கப்பட்டது என்ற பின்னணி தகவல் எதுவும் கிடைக்கவில்லை.

zeenat_zoarder_ripa என்ற இன்ஸ்டாகிராம் ஐடி கொண்டவர் இந்த வீடியோவை நவம்பர் 1, 2025 அன்று தன்னுடைய இன்ஸ்டாகிராம் பக்கத்தில் பதிவிட்டிருந்தார். அதில் இந்த வீடியோ தொடர்பான எந்த தகவலும் இல்லை. அவரது சுய விவர குறிப்பை பார்த்தபோது அவர் வங்கதேசத்தைச் சார்ந்தவர் என்றும் நடிகை / மாடல் என்றும் குறிப்பிடப்பட்டிருந்தது.

வங்கதேசத்தைச் சார்ந்த பலரும் இந்த வீடியோவை நவம்பர் 1, 2025 அன்று பதிவிட்டிருந்ததை காண முடிந்தது. பீகார் தேர்தல் முடிவுகள் நவம்பர் 14ம் தேதி வெளியானது. தேர்தல் முடிவுகளுக்கு இரண்டு வாரங்களுக்கு முன்பாகவே இந்த வீடியோ சமூக ஊடகங்களில் பகிரப்பட்டு வந்துள்ளது. இதன் மூலம் இது பீகார் சட்டமன்ற தேர்தலில் வெற்றி பெற்ற பிறகு பாஜக தொண்டர்கள் நடந்துகொண்ட விதம் என்று பரவும் தகவல் தவறானது என்று உறுதியாகிறது.

முடிவு:

பழைய வீடியோவை எடுத்து பீகார் வெற்றியைக் கொண்டாடிய பாஜக தொண்டர் பெண்ணிடம் தவறாக நடந்துகொண்டார் எனறு தவறாக தகவல் சேர்த்து சமூக ஊடகங்களில் பதிவிட்டிருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.