இஸ்ரேலுக்கு ஆயுதங்கள் கொண்டு செல்ல மறுத்த அமெரிக்க விமானிகள் கைது என்று பரவும் வீடியோ உண்மையா?

இஸ்ரேலுக்கு ஆயுதங்கள் கொண்டு செல்ல இருந்த விமானத்தை இயக்க மறுத்த இரண்டு விமானிகளை அமெரிக்க அரசு கைது செய்தது என்று ஒரு வீடியோ சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

அமெரிக்க ராணுவ அதிகாரிகள் இரண்டு பேரை பேரை காவலர்கள் கைது செய்து அழைத்துச் செல்லும் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “இஸ்ரேலுக்கு” ஆயுதங்கள் நிரப்பப்பட்ட விமானங்களை ஓட்ட மறுத்த இரண்டு அமெரிக்க இராணுவ விமானிகள் கைது செய்யப்பட்டனர்” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

அமெரிக்காவிலிருந்து இஸ்ரேலுக்கு ஆயுதங்களை ஏற்றிக்கொண்டு செல்ல இருந்த விமானத்தை இயக்க மறுத்த அமெரிக்க விமானப்படை விமானிகள் கைது செய்யப்பட்டதாக வீடியோ ஃபேஸ்புக்கில் பதிவிடப்பட்டுள்ளது. ஆனால், கைது செய்யப்பட்டவர்களைப் பார்க்கும் போது விமானிகள் போலத் தெரியவில்லை. எனவே, இந்த வீடியோ தொடர்பாக ஆய்வு செய்தோம்.

வீடியோ காட்சியைப் புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். அப்போது இந்த வீடியோவை இந்த மாதம் (செப்டம்பர்) முதல் வாரத்தில் பலரும் தங்கள் சமூக ஊடக பக்கங்களில் பதிவிட்டிருந்ததைக் காண முடிந்தது. அதில், அமெரிக்காவின் செனட் சபையில் நடந்த விசாரணையின் போது காசா இனப்படுகொலைக்கு அமெரிக்கா துணை போவதாகக் கூறி முன்னாள் ராணுவ அதிகாரிகள் இடையூறு செய்தனர். அவர்களை காவலர்கள் கைது செய்து அழைத்துச் சென்றனர் என்று குறிப்பிடப்பட்டிருந்தது.

உண்மைப் பதிவைக் காண: Facebook I Archive

இதன் தகவலை அப்படியே கூகுளில் டைப் செய்து, இது தொடர்பாக செய்தி ஏதும் வெளியாகி உள்ளதா என்று தேடிப் பார்த்தோம். அப்போது, இது தொடர்பான சில செய்திகள் கிடைத்தன. அவற்றில், செனட் சபையின் வெளியுறவு கமிட்டி விசாரணையின் போது அமெரிக்க ராணுவத்தின் ஓய்வு பெற்ற உளவுப் பிரிவு அதிகாரி ஜோஸ்பின் கில்பியூ, ஓய்வுபெற்ற கிரீன் பெரெட் லெப்டினன்ட் கர்னல் அந்தோணி அகுய்லர் ஆகியோர் இஸ்ரேலுக்கு அமெரிக்கா உதவி செய்வதற்கு எதிர்ப்பு தெரிவித்தும் இனப்படுகொலைக்கு அமெரிக்கர்களின் வரிப்பணம் செலவு செய்யப்படுவதற்கும் எதிர்ப்பு தெரிவித்து இடையூறு செய்தனர். அவர்களை போலீசார் கைவிலங்கிட்டு அழைத்துச் சென்றனர் என்று குறிப்பிடப்பட்டிருந்தது.

இதன் மூலம் இஸ்ரேலுக்கு ஆயுதங்கள் கொண்டு செல்ல மறுத்த அமெரிக்க விமானப்படை விமானிகள் கைது செய்யப்பட்டனர் என்று பரவும் தகவல் தவறானது என்பது தெளிவாகிறது. இந்த ஆதாரங்கள் அடிப்படையில் நாம் ஆய்வுக்கு எடுத்துக்கொண்ட பதிவு தவறான தகவலைக் கொண்டுள்ளது என்று உறுதி செய்யப்படுகிறது.

முடிவு:

இஸ்ரேலுக்கு எதிர்ப்பு தெரிவித்து அமெரிக்க செனட் விசாரணையை இடையூறு செய்த முன்னாள் ராணுவ அதிகாரிகளை போலீசார் கைது செய்த வீடியோவை இஸ்ரேலுக்கு ஆயுதங்கள் கொண்டு செல்ல மறுத்த அமெரிக்க ராணுவ விமானிகள் கைது என்று தவறாக சமூக ஊடகங்களில் பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I X Post I Google News Channel I Instagram