மழை வெள்ளம்: சென்னையின் தற்போதைய நிலை என்று பரவும் வீடியோ உண்மையா?

சென்னையின் தற்போதைய நிலை என்று சாலையில் தேங்கி நிற்கும் மழை நீரிலிருந்து இருசக்கர வாகனங்களைத் தூக்கும் வீடியோ ஒன்று சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

மழை வெள்ளத்தில் இரு சக்கர வாகனங்கள் மூழ்கி இருக்கும் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “எங்க ஊருக்கு வாங்க சின்னதத்தி வரவேற்கிறார் 🤣 #chennaifloods #dmkmemes” என்று குறிப்பிடப்பட்டிருந்தது.

உண்மைப் பதிவைக் காண: Facebook I Archive

மற்றொருவர் வெளியிட்டிருந்த பதிவில், “சென்னையின் தற்போதைய நிலை” என்று குறிப்பிட்டிருந்தார். இந்த பதிவுகளை பலரும் சமூக ஊடகங்களில் பதிவிட்டும், பகிர்ந்தும் வருகின்றனர்.

உண்மை அறிவோம்:

சென்னையில் ஏற்பட்ட மழை வெள்ளத்தில் நகரமே மூழ்கிவிட்டது போன்று வீடியோக்கள் சமூக ஊடகங்களில் வைரலாக பகிரப்பட்டு வருகின்றன. பழைய வீடியோக்கள், வேறு மாநிலங்களில் எடுக்கப்பட்ட வீடியோக்களை எல்லாம் சென்னை மழை வெள்ள பாதிப்பு என்று பலரும் பகிர்ந்து வருகின்றனர். தற்போது, மழை நீரிலிருந்து இருசக்கர வாகனங்களை தூக்கும் வீடியோ ஒன்றை அதிமுக உள்ளிட்ட எதிர்க்கட்சிகளைச் சேர்ந்த பலரும் சமூக ஊடகங்களில் பதிவிட்டு வருகின்றனர்.

வீடியோ தெளிவில்லாமல் இருந்தது. சென்னையில் எந்த இடத்தில் எடுக்கப்பட்டது என்று எந்த ஒரு தகவலையும் அளிக்கவில்லை. எனவே, இந்த வீடியோ உண்மையா என்று அறிய ஆய்வு செய்தோம்.

உண்மைப் பதிவைக் காண: Instagram I Archive

வீடியோ காட்சியை புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். அப்போது, 2020ம் ஆண்டு இந்த வீடியோவை சிலர் வெளியிட்டிருந்ததைக் கண்டறிய முடிந்தது. ஆனால், அந்த பதிவிலும் கூட இந்த வீடியோ எங்கு எடுக்கப்பட்டது என்று குறிப்பிடப்படவில்லை. 2020ம் ஆண்டில் தமிழ்நாட்டை அதிமுக-வின் எடப்பாடி பழனிசாமி தலைமையிலான அரசு ஆட்சி செய்தது குறிப்பிடத்தக்கது.

2020ம் ஆண்டு பலரும் இந்த வீடியோவை சமூக ஊடகங்களில் பதிவிட்டிருந்தாலும், உண்மையில் இது சென்னையில் எந்த இடத்தில் எடுக்கப்பட்டது என்று குறிப்பிடவில்லை. இதனால், இந்த வீடியோ சென்னையில் எடுக்கப்பட்டதுதானா என்பதை நம்மால் உறுதி செய்ய முடியவில்லை.

2020ம் ஆண்டில் வெளியான வீடியோவை எடுத்துவந்து 2025ல் தி.மு.க ஆட்சியில் சென்னையின் நிலை என்று தவறாகப் பகிர்ந்திருப்பதை நம்முடைய தேடல் முடிவுகள் உறுதி செய்துள்ளன. இந்த ஆதாரத்தின் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

2020ம் ஆண்டு அதிமுக ஆட்சியின் போது எடுக்கப்பட்ட வீடியோவை 2025ல் தி.மு.க ஆட்சியில் சென்னை மழை வெள்ள பாதிப்பு நிலை என்று தவறாக சமூக ஊடகங்களில் பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.