ரஷ்ய எண்ணெய்க் கப்பலைக் கைப்பற்றிய அமெரிக்கா என்று பரவும் வீடியோ உண்மையா?

ரஷ்ய எண்ணெய்க் கப்பலை அமெரிக்க கடற்படை கைப்பற்றிய காட்சி என்று ஒரு வீடியோ சமூக ஊடகங்களில் வைரலாக பகிரப்பட்டு வருகிறது. அது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

ஹெலிகாப்டரில் இருந்து ராணுவ வீரர்கள் கப்பலில் இறங்கும் வீடியோ ஃபேஸ்புக்கில் பதிவிடப்பட்டுள்ளது. அதில், “ரஷ்யாவின் எண்ணெய் கப்பலை கைப்பற்றிய அமெரிக்கா” என்று குறிப்பிடப்பட்டிருந்தது. நிலைத் தகவலில், “ரஷ்யாவை சண்டைக்கு அழைக்கும் ட்ரம்ப் ! ரஷ்ய எண்ணெய் கப்பலை கைப்பற்றிய அமெரிக்கா !

ரஷ்ய கொடியுடன் கூடிய எண்ணெய் டேங்கர் கப்பலை அமெரிக்கப் படைகள் கைப்பற்றியதாக வெள்ளை மாளிகை அறிவித்துள்ளது” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

சமீபத்தில் ரஷ்ய கப்பலை அமெரிக்கா கைப்பற்றியதாக செய்திகள் வௌியாகி இருந்தது. இந்த நிலையில் கப்பலை கைப்பற்ற அமெரிக்க ராணுவ வீரர்கள் ஹெலிகாப்டரில் இருந்து இறங்கும் வீடியோவை பதிவிட்டு, ரஷ்யாவின் எண்ணெய் கப்பலை கைப்பற்றிய அமெரிக்கா எனறு பலரும் பதிவிட்டு வருகின்றனர். இதைப் பார்க்கும் போது எண்ணெய்க் கப்பலை கைப்பற்றிய போது எடுக்கப்பட்ட வீடியோ என்ற எண்ணத்தையே ஏற்படுத்துகிறது. இது தொடர்பாக ஆய்வு செய்தோம்.

உண்மைப் பதிவைக் காண: gettyimages.in I Archive

வீடியோ காட்சிகளை புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். அப்போது, இந்த காட்சியுடன் கூடிய பதிவுகள் 2025 அக்டோபரில் இருந்து சமூக ஊடகங்களில் பதிவிட்டு வந்திருந்ததைக் காண முடிந்தது. அவற்றில், அமெரிக்க அதிபர் டிரம்ப் முன்னிலையில், அமெரிக்க கடற்படையின் சீல் பிரிவினர் கப்பலில் இறங்கி போர் ஒத்திகையில் ஈடுபட்ட காட்சி என்று குறிப்பிடப்பட்டிருந்தது.

உண்மைப் பதிவைக் காண: instagram.com I Archive

தொடர்ந்து தேடிய போது நாம் ஆய்வுக்கு எடுத்துக்கொண்ட அதே வீடியோ 2025 அக்டோபர் 6ம் தேதி இன்ஸ்டாகிராமில் பதிவிடப்பட்டிருந்ததைக் காண முடிந்தது. அதில், அமெரிக்க கடற்படையின் பெருமைகளைக் குறிப்பிட்டிருந்தனர். ரஷ்ய கப்பலை அமெரிக்கா கைப்பற்றியதாக வெளியான செய்தி 2026 ஜனவாியில் நடந்தது. ஆனால், இந்த வீடியோ 2025 அக்டோபர் 6ம் தேதி வெளியாகி உள்ளது. இதன் அடிப்படையில் இது ரஷ்ய கப்பலை அமெரிக்கா கைப்பற்றிய வீடியோ இல்லை என்பது உறுதியாகிறது.

முடிவு:

2025 அக்டோபரில் அமெரிக்காவில் நடந்த அமெரிக்க கடற்படையின் போர்ப் பயிற்சி நிகழ்வின் போது எடுக்கப்பட்ட வீடியோவை ரஷ்ய எண்ணெய்க் கப்பலை அமெரிக்க படைகள் கைப்பற்றிய காட்சி என்று தவறாக சமூக ஊடகங்களில் பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.