இந்தியாவின் ரபேல் விமானம் பாகிஸ்தான் சென்று தீவிரவாதிகளின் முகாமில் குண்டு போடும் காட்சி இதுவா?

‘’இந்தியாவின் ரபேல் விமானம் பாகிஸ்தான் சென்று தீவிரவாதிகளின் முகாமில் குண்டு போடும் காட்சி,’’ என்று கூறி, சமூக வலைதளங்களில் பகிரப்படும் ஒரு வீடியோ பற்றி ஆய்வு மேற்கொண்டோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’இந்தியாவின் விமானம் ரபேல் பாகிஸ்தான் நாட்டுக்குள் தீவிரவாதிகளின் முகாமில் குண்டு போடும்போது பாகிஸ்தானின் ஏவுகணை தாக்குதலும் நடைபெறுகிறது அதிலிருந்து இந்திய விமானப்படை தப்பிப்பதை மிக துல்லியமாக காண முடிகிறது.,’’ என்று எழுதப்பட்டுள்ளது.

இதனுடன் ஜெட் விமானம் ஒன்று, பறந்து சென்று குண்டு போடுவது போன்ற காட்சிகள் கொண்ட ஒரு வீடியோவும் இணைக்கப்பட்டுள்ளது.

Claim Link 1 l Claim Link 2

பலரும் இதனை உண்மை என நம்பி, சமூக வலைதளங்களில் ஷேர், கமெண்ட் செய்து வருகின்றனர்.

உண்மை அறிவோம்:

மேற்கண்ட தகவல் உண்மையா என்று நாம் ஆய்வு மேற்கொண்டோம். அப்போது, இந்த வீடியோவுக்கும், தற்போதைய இந்தியா – பாகிஸ்தான் மோதலுக்கும் எந்த தொடர்பும் இல்லை, என்று தெரியவந்தது.

ஆம், இது ஒரு வீடியோ கேம் காட்சி; உண்மை கிடையாது.

BattleDragons என்ற யூடியுப் பக்கத்தில் Russian 5^th Generation Fighter Su-57- Military Simulation ArmA 3 எனும் தலைப்பில் இந்த வீடியோ கடந்த 2024ம் ஆண்டு டிசம்பர் மாதம் வெளியிடப்பட்டுள்ளது.

ஆனால், இந்தியா – பாகிஸ்தான் போர்ப்பதற்றம் 2025, ஏப்ரல், மே மாதங்களில் ஏற்பட்ட ஒன்றாகும். இதற்கும், மேற்கண்ட வீடியோவுக்கும் எந்த தொடர்பும் இல்லை என்று நமக்கு தெளிவாகிறது.

எனவே, 2024ம் ஆண்டு சமூக வலைதளங்களில் பகிரப்பட்ட வீடியோ கேம் ஒன்றின் கற்பனையான போர்க்காட்சியை எடுத்து, உண்மை போன்று குறிப்பிட்டு, வதந்தி பரப்புகிறார்கள், என்று சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.