‘தவாக’ தலைவர் வேல்முருகன் மீது போலீசார் தடியடி என்று பரவும் வீடியோ தற்போது எடுக்கப்பட்டதா?

‘’தமிழக வாழ்வுரிமைக் கட்சித் தலைவர் வேல்முருகன் மீது போலீசார் தடியடி,’’ என்று கூறி, சமூக வலைதளங்களில் பகிரப்படும் ஒரு வீடியோ தகவல் பற்றி ஆய்வு மேற்கொண்டோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’ சட்டத்தை மீறிய தலைவரை கவனித்த காவல்துறை… வாழ்த்துக்கள் தமிழக காவல்துறைக்கு..,’’ என்று எழுதப்பட்டுள்ளது.

இதனுடன் வீடியோ ஒன்றும் இணைக்கப்பட்டுள்ளது. அதில், தமிழக வாழ்வுரிமைக் கட்சி (தவாக) தலைவர் வேல்முருகன் உள்ளிட்டோர் மீது போலீசார் தடியடி நடத்துவது போன்ற காட்சிகள் இடம்பெற்றுள்ளன.

Claim Link 1 l Claim Link 2

பலரும் இதனை உண்மை என நம்பி, சமூக வலைதளங்களில் ஷேர், கமெண்ட் செய்வதைக் காண முடிகிறது.

உண்மை அறிவோம்:

மேற்கண்ட தகவல் உண்மையா என்று நாம் ஆய்வு மேற்கொண்டோம். அப்போது, இந்த வீடியோ கடந்த 2015ம் ஆண்டு எடுக்கப்பட்டது, என்று தெரியவந்தது.

One India Tamil l Hindu Tamil l Vikatan l DVK Periyar

கடந்த 2015ம் ஆண்டு நெல்லை மாவட்டம், கங்கைகொண்டான் சிப்காட் வளாகத்தில் தமிழக வாழ்வுரிமைக் கட்சியின் தலைவர் வேல்முருகன் தலைமையில், பன்னாட்டு குளிர்பான ஆலைகள் முன்பாக ஆர்ப்பாட்டம் நடைபெற்றது. அதில் கலந்துகொண்ட முன்னாள் சட்டமன்ற உறுப்பினர் காவேரி உள்பட பலர், காவல்துறையால் தாக்கப்பட்டனர். இதுபற்றி ஏற்கனவே பல்வேறு ஊடகங்களிலும் செய்தி வெளியாகியுள்ளது.

இதுதொடர்பான வீடியோவை எடுத்து, புதியது போன்று தகவல் பரப்புகிறார்கள். கூடுதல் ஆதாரத்திற்காக, தமிழக வாழ்வுரிமைக் கட்சியின் அலுவலகத்தில் பேசி, இது 2015ம் ஆண்டு அப்போதைய அதிமுக ஆட்சியில் எடுக்கப்பட்ட வீடியோ என்று, உறுதிப்படுத்தியுள்ளோம். இதற்கும், தற்போதைய திமுக ஆட்சிக்கும் தொடர்பில்லை.

எனவே, நாம் ஆய்வுக்கு எடுத்துக் கொண்ட வீடியோ 2015ம் ஆண்டு பதிவு செய்யப்பட்டது, என்று சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.