ராஜினாமா அறிவிப்பு வெளியிட உள்ள மோடி என்று பரவும் விஷம நியூஸ் கார்டு! 

தன்னுடைய பதவி விலகல் தொடர்பாக நாளை காலை 9 மணிக்கு நாட்டு மக்களிடம் வீடியோ வெளியிட்ட உள்ளார் நரேந்திர மோடி என்று ஒரு பதிவு சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: x.com I Archive

நியூஸ் 7 தமிழ் வெளியிட்ட நியூஸ் கார்டுடன் புகைப்பட பதிவு உருவாக்கப்பட்டுள்ளது. அதில், “மீண்டும் பிரதமர் மோடி உரை! நாளை காலை 9 மணிக்கு நாட்டு மக்களிடம் வீடியோ மூலம் சிறிய செய்தியை பகிர இருக்கிறேன் – பிரதமர் நரேந்திர மோடி” என்று குறிப்பிடப்பட்டிருந்தது. 

நிலைத் தகவலில், “தனக்கு 75 வயது ஆகப்போகிறது என்பதால், அத்வானி, முரளி மனோகர் ஜோஷியை பின்பற்றி, தானும் பிரதமர் பதவியை இராஜினாமா செய்து விட்டு! பாஜகவின் முதியோருக்கான மார்க் தர்ஷக் மண்டலில் மோடியும் இணையப் போகிறார் என்பதை நாளை காலை 9 மணிக்கு அவரே சொல்ல இருக்கிறார்! போடுறா வெடியை!” என்று குறிப்பிடப்பட்டிருந்தது.

உண்மைப் பதிவைக் காண: Facebook I Archive

இதே புகைப்படத்தை வைத்து ஃபேஸ்புக் உள்ளிட்ட இதர சமூக ஊடக பக்கங்களிலும் பதிவுகள் பதிவிடப்பட்டுள்ளன. இதையும் பலமும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

பிரதமர் நரேந்திர மோடி பதவி விலகப் போகிறார் என்று சமூக ஊடகங்களில் பலரும் பதிவிட்டு வருகின்றனர். இதற்காக பழைய நியூஸ் கார்டை இப்போது பயன்படுத்தி சமூக ஊடகங்களில் வதந்தி பரப்பி வருகின்றனர். நாம் ஆய்வுக்கு எடுத்துக்கொண்ட நியூஸ் கார்டிலேயே தெளிவாக ஏப்ரல் 2, 2020 என்று உள்ளது. இதை 2025ல் வெளியான நியூஸ் கார்டு போல தவறாக பதிவிட்டுள்ளனர்.

2025ல் பொது மக்களுக்கு வீடியோ வெளியிட உள்ளதாக மோடி எந்த அறிவிப்பையும் வெளியிடவில்லை. இந்த நியூஸ் கார்டு 2020ல் வெளியானது என்பதை உறுதி செய்ய உண்மையான பதிவை தேடினோம். 

உண்மைப் பதிவைக் காண: Facebook I Archive

நியூஸ் 7 தமிழ் ஃபேஸ்புக் பக்கத்திற்குச் சென்று நாம் ஆய்வுக்கு எடுத்துக்கொண்ட நியூஸ் கார்டில் உள்ள தகவலை அப்படியே டைப் செய்து தேடினோம். அப்போது, 2020ல் நியூஸ் 7 தமிழ் வெளியிட்ட பதிவு நமக்கு கிடைத்தது. இதன் மூலம் இந்த தகவல் விஷமத்தைப் பரப்பும் வகையில் பதிவிடப்பட்டுள்ளது என்பது உறுதியாகிறது.

முடிவு:

2020 கொரோனா காலத்தில் நாட்டு மக்களுக்கு வீடியோ மூலம் பேச உள்ளதாக மோடி அறிவித்தது தொடர்பான நியூஸ் கார்டை 2025ல் மோடி ராஜினாமா செய்ய உள்ளதாக தவறான தகவல் சேர்த்து பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I X Post I Google News Channel I Instagram