காஷ்மீரில் சிறுவனின் கண் முன்னே தந்தையை சுட்டுக் கொன்ற தீவிரவாதிகள் என்ற வீடியோ உண்மையா?

‘’காஷ்மீரில் சிறுவனின் கண் முன்னே தந்தையை சுட்டுக் கொன்ற தீவிரவாதிகள்’’, என்று கூறி, சமூக வலைதளங்களில் பகிரப்படும் ஒரு வீடியோ பற்றி ஆய்வு மேற்கொண்டோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’ இதற்கான தண்டனை கொடுரமாக இருக்கும்..

காஸ்மீர் சுற்றுலா சென்ற சிறுவனின் தந்தையை குழந்தை கண் முன்னால் சுட்டு கொன்று இருக்கானுங்க…

அந்த குழந்தை சொல்கிறது உன் தந்தை எந்த மதம் என்று கேட்டார்கள்..

ஹிந்து என்றதும் சுட்டு கொன்றார்களாம் ..😭😭😭,’’ என்று எழுதப்பட்டுள்ளது.

இதனுடன் ஒரு குழந்தை, சடலம் ஒன்றின் மீது அமர்ந்திருப்பது போன்ற காட்சிகளுடன் கூடிய வீடியோ ஒன்றும் இணைக்கப்பட்டுள்ளது.

Claim Link 1 l Claim Link 2

பலரும் இதனை உண்மை என நம்பி, சமூக வலைதளங்களில் ஷேர், கமெண்ட் செய்து வருகின்றனர்.

உண்மை அறிவோம்:

மேற்கண்ட தகவல் உண்மையா என்று நாம் ஆய்வு மேற்கொண்டோம். அப்போது, இந்த வீடியோ கடந்த 2020ம் ஆண்டு எடுக்கப்பட்ட ஒன்று எனவும், தற்போதைய Pahalgam தீவிரவாத தாக்குதலுக்கும், இதற்கும் எந்த தொடர்பும் இல்லை எனவும் தெரியவந்தது.

இதன்படி, கடந்த 2020ம் ஆண்டு ஜூலை மாதம் ஜம்மு காஷ்மீரில் உள்ள Baramulla மாவட்டத்தின் Sopore என்ற இடத்தில் CRPF வீரர்கள், ரோந்து சென்றனர். அப்போது, அவர்களை முற்றுகையிட்டு, தீவிரவாதிகள் துப்பாக்கிச் சூடு நடத்தியுள்ளனர். இதையடுத்து, பாதுகாப்புப் படையினர் திருப்பி சுட்டதில், ஒரு தீவிரவாதி கொல்லப்பட்டான். இந்த மோதலில், குறுக்கே வந்த பொதுமக்களில் இருந்த முதியவர் ஒருவரும் எதிர்பாராமல் குண்டு பாய்ந்து, உயிரிழந்தார். இறந்த அந்த முதியவரின் சடலம் மீது, அவரது பேரக்குழந்தை சோகமாக அமர்ந்திருந்தது. பின்னர் அந்த குழந்தையை பாதுகாப்புப் படையினர் பத்திரமாக மீட்டனர்.

கூடுதல் செய்தி ஆதாரம் இதோ…

ABP Live l Al Jazeera l Kashmir Zone Police l Innocent Kashmir

எனவே, 2020ம் ஆண்டு பதிவு செய்யப்பட்ட ஒரு காட்சியை எடுத்து, சமீபத்தில் நிகழ்ந்த பாகல்காம் தீவிரவாத தாக்குதலுடன் தொடர்புபடுத்தி, சமூக வலைதளங்களில் வதந்தி பரப்புகிறார்கள், என்று சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.