உத்தரப்பிரதேசத்தில் பா.ஜ.க பெண் வேட்பாளரை பொது மக்கள் விரட்டி அடித்தனர் என்று ஒரு வீடியோ சமூக ஊடகங்களில் பகிரப்பட்டு வருகிறது. அது பற்றி ஆய்வு செய்தோம்.
தகவலின் விவரம்:
உண்மைப் பதிவைக் காண: Facebook I Archive
பெண் ஒருவரை பொது மக்கள் விரட்டும் வீடியோ பகிரப்பட்டுள்ளது. வீடியோ தெளிவில்லாமல் உள்ளது. நிலைத் தகவலில் “உ.பியில் ஓட்டுக்கெட்டு சென்ற #பாஜக பெண் வேட்பாளரைக் கல்லால் அடித்து விரட்டிய ஊர் மக்கள் (இந்து விரோதி, தேச விரோதிகள்)…. தரமான சம்பவம்” என்று குறிப்பிடப்பட்டுள்ளது.
இந்த வீடியோ பதிவை ஆண்டி-இந்தியன் என்ற ஃபேஸ்புக் ஐடி கொண்ட நபர் 2022 ஜனவரி 30ம் தேதி பதிவிட்டுள்ளார். இவரைப் போல பலரும் இதை தங்கள் ஃபேஸ்புக் உள்ளிட்ட சமூக ஊடக பக்கங்களில் பதிவிட்டு வருகின்றனர்.
உண்மை அறிவோம்:
உத்தரப்பிரதேச சட்டமன்ற தேர்தல் சூடுபிடிக்கத் தொடங்கியுள்ள நிலையில், அங்கு பாரதிய ஜனதா கட்சி வேட்பாளர்களுக்கு எதிர்ப்பு கிளம்பியுள்ளது என்று பல செய்திகள், வீடியோக்கள் சமூக ஊடகங்களில் பகிரப்பட்டு வருகின்றன. பாஜக வேட்பாளர் ஒருவரை பொது மக்கள் விரட்டியடித்ததாக ஒரு வீடியோ முன்பு பகிரப்பட்டது. ஆனால் அது பஞ்சாபில் எடுக்கப்பட்ட பழைய வீடியோ என்று நம்முடைய ஃபேக்ட் கிரஸண்டோ தமிழில் கட்டுரை வெளியிட்டிருந்தோம்.
இந்த நிலையில், பெண் வேட்பாளர் ஒருவரை விடாமல் விரட்டி அடித்த பொது மக்கள் என்று வீடியோ பகிரப்பட்டுள்ளது. வீடியோ தெளிவில்லாமல் உள்ளது. எனவே, இந்த வீடியோ பற்றி ஆய்வு செய்தோம்.
வீடியோ காட்சியை InVid & WeVerify தளத்தின் உதவியுடன் புகைப்படங்களாக மாற்றி ரிவர்ஸ் இமேஜ் தேடலில் பதிவேற்றித் தேடினோம். பல்வேறு தேடலுக்குப் பிறகு இது தொடர்பான வீடியோக்கள் நமக்கு கிடைத்தன. ஜீ பெங்காலியில் வெளியிட்ட உண்மையான வீடியோவும் யூடியூபில் இருந்து நமக்கு கிடைத்தது. லாக்கெட் சாட்டர்ஜி என்று குறிப்பிட்டு வங்க மொழியில் பதிவு இருந்தது. எனவே, முக்கியமான கீ வார்த்தைகளை வைத்து கூகுளில் தேடினோம். அப்போது 2021ம் ஆண்டு மேற்கு வங்க சட்டமன்றத்துக்கு நடந்த நான்காம் கட்ட தேர்தலின் போது பா.ஜ.க பெண் எம்.பி லாக்கெட் சாட்டர்ஜி கார் மீது திரிணாமுல் காங்கிரஸ் கட்சியினர் தாக்குதல் நடத்தினர் என்று செய்திகள் கிடைத்தன.
ஜீ பெங்காலா தொலைக் காட்சி வீடியோ 2021 ஏப்ரல் 10ம் தேதி யூடியூபில் பதிவேற்றம் செய்யப்பட்டு இருந்தது. வீடியோவில் இருப்பது லாக்கெட் சாட்டர்ஜி என்று பல செய்திகள் தெரிவிக்கின்றன.
உத்தரப்பிரதேச சட்டமன்ற தேர்தல் 2022 ஜனவரியில் அறிவிக்கப்பட்டது. மார்ச் மாதம் தான் தேர்தல் முடிவடைகிறது. இதன் அடிப்படையில் ஓராண்டுக்கு முன்பு மேற்கு வங்கத்தில் எடுக்கப்பட்ட வீடியோவை, தற்போது நடைபெறும் உத்தரப்பிரதேச தேர்தலுடன் தொடர்புப்படுத்தி தவறான தகவல் சேர்த்துப் பகிர்ந்திருப்பது உறுதியாகிறது. இதன் அடிப்படையில் உத்தரப்பிரதேசத்தில் பெண் பாஜக வேட்பாளரை பொது மக்கள் விரட்டி அடித்தனர் என்று பகிரப்படும் தகவல் தவறானது என்று உறுதி செய்யப்படுகிறது.
முடிவு:
உத்தரப்பிரதேசத்தில் தேர்தல் பிரசாரத்துக்கு வந்த பா.ஜ.க பெண் வேட்பாளர்களை மக்கள் விரட்டி அடித்தனர் என்று பகிரப்படும் வீடியோ தவறானது என்பதை ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.
சமூக ஊடகங்களில் எங்களை பின் தொடர விரும்பினால்…
Facebook I Twitter I Google News Channel
Title:உ.பி-யில் பா.ஜ.க பெண் வேட்பாளரை விரட்டிய மக்கள் என்று பரவும் வீடியோ உண்மையா?
Fact Check By: Chendur PandianResult: False
