நடிகை திரிஷா வீட்டில் தவெக கொடி என்று பரவும் புகைப்படம் உண்மையா?

நடிகை திரிஷா படுக்கை அறையில் தவெக கொடி இருப்பது போன்று ஒரு புகைப்படம் சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: threads.com I Archive

நடிகை திரிஷா கண்ணாடி முன்பு செல்ஃபி எடுத்துக்கொண்ட புகைப்படத்தில், அவரது கட்டிலில் தவெக கொடி இருப்பதை சுட்டிக்காட்டும் வகையில் புகைப்படம் threads-ல் பகிரப்பட்டுள்ளது. நிலைத் தகவலில், ““மலையூர் மம்பட்டியான்” படத்துல ஹீரோ தியாகராஜன் வீட்டுல இருக்காரா இல்லையா என்பதை சரிதா ஒரு கொடி ஏற்றி சூசகமாக தெரிவிப்பார்.

பனையூர் மம்பட்டியான் கொடி ஏன் திரிஷா வீட்டுல கிடக்குதுன்னு தெரியல” என்று குறிப்பிடப்பட்டிருந்தது. இந்த படத்தை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

நடிகரும் தவெக தலைவருமான விஜய் அணியும் தவெக கொடி நடிகை திரிஷா வீட்டில் உள்ளது போன்று சமூக ஊடகங்களில் பலரும் பதிவிட்டு வருகின்றனர். பார்க்க எடிட் செய்யப்பட்ட புகைப்படம் போல இருந்ததால் இது தொடர்பாக ஆய்வு செய்தோம்.

உண்மைப் பதிவைக் காண: instagram.com

திரிஷாவின் செல்ஃபி புகைப்படம் உண்மையானதா அல்லது எடிட் செய்யப்பட்டுள்ளதா என்பதை அறிய, முதலில் இந்த புகைப்படத்தை திரிஷா வெளியிட்டிருந்தாரா என்று அறிய அவரது இன்ஸ்டாகிராம் பக்கத்தைப் பார்த்தோம். அதில், நவம்பர் 8, 2025 அன்று திரிஷா இந்த புகைப்படத்தை பதிவிட்டிருந்ததைக் காண முடிந்தது. ஆனால், அந்த புகைப்படத்தில் தவெக கொடி இல்லை.

தவெக தலைவர் மற்றும் திரிஷாவை இழிவுபடுத்தும் நோக்கில் திரிஷாவின் வீட்டில் விஜய்யின் கொடி இருக்கிறது என்று போட்டோஷாப் மூலம் கட்சிக் கொடியை வைத்து போலியான படத்தை உருவாக்கியிருப்பது இதன் மூலம் உறுதியானது. திரிஷா வெளியிட்டிருந்த படத்தில் தவெக கொடி இல்லை என்பதை அடிப்படையாக வைத்து சமூக ஊடகங்களில் பரவும் புகைப்படம் போலியானது, எடிட் செய்யப்பட்டது என்பது உறுதியாகிறது.

முடிவு:

நடிகர் விஜய்யின் தவெக கொடி நடிகை திரிஷா வீட்டிற்கு எப்படி வந்தது என்று விஷமத்தனத்துடன் பரவும் புகைப்படம் எடிட் செய்யப்பட்டது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.