‘வாரணாசியில் சிறுவனை நரபலி கொடுக்க முயன்ற அகோரிகள்’ என்று பரவும் வீடியோ உண்மையா?

‘’வாரணாசியில் சிறுவனை நரபலி கொடுக்க முயன்ற அகோரிகள்’’ என்று கூறி, சமூக வலைதளங்களில் பகிரப்படும் ஒரு தகவல் பற்றி ஆய்வு செய்தோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’ உத்திரபிரதேசம் வாரணாசியில் 2 அகோரிகள் சேர்ந்து ஒரு சிறுவனை நரபலி கொடுக்க முயற்சிக்கும்போது ஒரு வாலிபர் அதை தடுக்க முயற்சிக்கும் பதைபதைக்கும் காட்சி.’’ என்று எழுதப்பட்டுள்ளது.

Claim Link l Archived Link

இதனை பலரும் உண்மை என நம்பி, ஷேர், கமெண்ட் செய்து வருகின்றனர்.

உண்மை அறிவோம்:

மேற்கண்ட வீடியோவை மேலோட்டமாக பார்த்தால், சிறுவனை அகோரிகள் பலி கொடுக்க முயற்சிப்பது போன்றும், அதனை ஒரு இளைஞர் தடுத்து நிறுத்துவது போன்றும் காட்சிகள் இடம்பெற்றுள்ளன.

ஆனால், உற்று கவனித்தால், குறிப்பிட்ட சிறுவனை காப்பாற்றுவதாகக் கூறிக் கொண்டு, மேலும் சில இளைஞர்கள் குறுக்கே மறுக்கே ஓடுகின்றனர். அத்துடன் அவர்கள், அகோரி வேடமிட்ட நபர்களை வேண்டுமென்றே தாக்கி வம்பிழுக்கவும் செய்கிறார்கள்.

அடுத்தப்படியாக, சினிமாத்தனமாக ஒருவரை ஒருவர் தாக்கிக் கொள்வதையும் காண முடிகிறது. இவர்கள் யாருக்குமே காயம் ஏற்படவில்லை. எனவே, இது சித்தரிக்கப்பட்ட வீடியோவாக இருக்கலாம் என்றும் நமக்கு தோன்றியது.

இதன்பேரில், இந்த வீடியோ காட்சிகளை பயன்படுத்தி, கூகுள் உதவியுடன் ரிவர்ஸ் இமேஜ் தேடல் செய்தோம். அப்போது, நமக்கு ஒரு வீடியோ லிங்க் கிடைத்தது.

இந்த வீடியோவின் description பகுதியிலேயே இது பொழுதுபோக்கிற்காக எடுக்கப்பட்டது என்றும், உண்மையானதல்ல என்றும் தெளிவாகக் குறிப்பிட்டுள்ளதைக் கண்டோம்.

எனவே, பொழுதுபோக்கு வீடியோ ஒன்றை எடுத்து, வாரணாசியில் நரபலி கொடுக்க முயன்ற அகோரிகளை இளைஞர் ஒருவர் தடுக்கும் காட்சி எனக் கூறி வதந்தி பரப்புகிறார்கள் என்று சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.

எங்களது சமூக வலைதள பக்கங்களை பின்தொடர…

Facebook Page I Twitter Page I Google News Channel I Instagram