பாஜக.,வுடன் மீண்டும் கூட்டணி வைப்பது தற்கொலைக்கு சமம் என்று செம்மலை கூறினாரா?

‘’பாஜக.,வுடன் மீண்டும் கூட்டணி வைப்பது தற்கொலைக்கு சமம்,’’ என்று அதிமுக முன்னாள் அமைச்சர் செம்மலை கூறியதாக, சமூக வலைதளங்களில் பகிரப்படும் ஒரு தகவல் பற்றி ஆய்வு மேற்கொண்டோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’எடப்பாடி பழனிசாமி மறுபரிசீலனை செய்ய வேண்டும்
அதிமுக பாஜகவுடன் மீண்டும் கூட்டணி என்பது த*கொலைக்கு சமம், எனவே பொதுச் செயலாளர் எடப்பாடி பழனிசாமி இதனை மறுபரிசீலனை செய்ய வேண்டும்; இல்லையேல் அதிமுகவை கடவுள்தான் காப்பாற்ற வேண்டும்- அதிமுக முன்னாள் அமைச்சர் செம்மலை,’’ என்று எழுதப்பட்டுள்ளது.

Claim Link

தந்தி டிவி லோகோ இடம்பெற்றுள்ளதால், பலரும் இதனை உண்மை என நம்பி, சமூக வலைதளங்களில் ஷேர், கமெண்ட் செய்து வருகின்றனர்.

உண்மை அறிவோம்:

சமீபத்தில் டெல்லி சென்ற அதிமுக பொதுச் செயலாளர் எடப்பாடி பழனிசாமி, பாஜக மூத்த தலைவரும், மத்திய உள்துறை அமைச்சருமான அமித் ஷாவை நேரில் சந்தித்துப் பேசினார். இதனால், வரும் தமிழ்நாடு சட்டமன்ற தேர்தலில் அதிமுக மற்றும் பாஜக இடையே கூட்டணி ஏற்பட வாய்ப்புள்ளதாகப் பலரும் கருத்து தெரிவித்து வருகின்றனர்.

The Hindu l India Today

இத்தகைய சூழலில், எடப்பாடி பழனிசாமிக்கு எதிராக முன்னாள் அமைச்சர் செம்மலை கருத்து வெளியிட்டது போன்று குறிப்பிட்டு, மேற்கண்ட வகையில், தந்தி டிவி லோகோவுடன் கூடிய நியூஸ் கார்டு ஒன்றை சமூக வலைதளங்களில் பகிர்வதைக் காண முடிகிறது.

இதில் உள்ளது போன்று, செம்மலை கருத்து தெரிவித்தாரா என்று, சேலத்தில் உள்ள அவரது அலுவலகத்தை தொடர்பு கொண்டு விளக்கம் கேட்டோம். ‘இவ்வாறு செம்மலை எதுவும் சமீப நாட்களில் கருத்து கூறவே இல்லை’, என்று அவர்கள் விளக்கம் அளித்தனர்.

அடுத்தப்படியாக, தந்தி டிவி டிஜிட்டல் பிரிவு நிர்வாகியிடம் இதுபற்றி விளக்கம் கேட்டோம். அவரும், ‘’இதுபோன்ற நியூஸ் கார்டு எதுவும் நாங்கள் வெளியிடவில்லை. யாரோ விஷமத்தனமாக எங்களது லோகோவை பயன்படுத்தி, இவ்வாறு வதந்தி பரப்புகிறார்கள்,’’ என்று தெரிவித்தார்.

இவற்றின் அடிப்படையில், நாம் ஆய்வுக்கு எடுத்துக் கொண்ட நியூஸ் கார்டு போலியானது என்று சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.