காமராஜர் காரில் போனதே சீமானுடன்தான் என்று பரவும் நியூஸ் கார்டு உண்மையா?

காமராஜர் காரில் போனதே சீமானுடன்தான் என்று நாதக நிர்வாகி வெண்ணிலா தாயுமானவன் கூறியதாக ஒரு நியூஸ் கார்டு சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

விகடன் வெளியிட்டது போன்று நியூஸ் கார்டு ஒன்று ஃபேஸ்புக்கில் பதிவிடப்பட்டுள்ளது. அதில், “காமராஜர் காரில் போனதே சீமானுடன்தான். சிவகங்கைக்கு காமராஜர் காரில் போய்க் கொண்டிருந்தபோது, டவுசரோடு மாடு மேய்த்துக் கொண்டிருந்த பையனை பார்த்துதான் மதிய உணவுத் திட்டமே ஆரம்பித்தார். அந்த பையன் வேறு யாருமல்ல, அண்ணன் சீமான்தான். காமராஜர் படத்திலேயே இந்த காட்சி வந்திருக்கிறது. – நா.த.க வெண்ணிலா தாயுமானவன் (விகடன் பேட்டியில்)” என்று குறிப்பிடப்பட்டிருந்தது. இந்த நியூஸ் கார்டை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

நாம் தமிழர் கட்சி ஒருங்கிணைப்பாளர் சீமானை நையாண்டி செய்து பல பதிவுகள் சமூக ஊடகங்களில் பகிரப்பட்டு வருகின்றனர். அப்படிப்பட்ட ஒரு கருத்தை விகடன் ஊடகமே வெளியிட்டது போன்று நியூஸ் கார்டை பலரும் சமூக ஊடகங்களில் பதிவிட்டு வருகின்றனர். யாரோ விஷமி சீமானை நையாண்டி செய்யும் நோக்கத்தில் இந்த பதிவை உருவாக்கியிருக்கலாம் என்று தெரிகிறது. இதை உறுதி செய்ய ஆய்வு செய்தோம்.

முதலில் இப்படி ஒரு நியூஸ் கார்டை விகடன் வெளியிட்டதா என்பதை உறுதி செய்ய விகடன் சமூக ஊடக பக்கங்களைப் பார்வையிட்டோம். அதில் அப்படி எந்த ஒரு நியூஸ் கார்டும் இல்லை. எனவே, விகடன் டிஜிட்டல் பொறுப்பாளரின் வாட்ஸ்அப் எண்ணிற்கு இந்த நியூஸ் கார்டை அனுப்பினோம். அவரும் இது போலியானது என்று உறுதி செய்தார்.

உண்மைப் பதிவைக் காண: Facebook I Archive

சிறிது நேரத்தில் விகடன் சமூக ஊடக பக்கங்களில் நாம் ஆய்வுக்கு எடுத்துக்கொண்ட நியூஸ் கார்டு மீது “FAKE” முத்திரையுடன், “இது விகடன் வெளியிட்ட செய்தி அல்ல…” என்று குறிப்பிட்டுப் பதிவிட்டிருந்தனர். இவை எல்லாம் இந்த நியூஸ் கார்டு போலியானது என்பதை உறுதி செய்தன.

நன்றி @vikatan https://t.co/0K7b7vKzym
— வெண்ணிலா தாயுமானவன் (Vennila Thayumanavan) (@vennilaVT) July 17, 2025

Archive

நாதக நிர்வாகி இப்படி ஏதேனும் கூறியிருந்தாரா என்பதை உறுதி செய்துகொள்ள அவரது சமூக ஊடக பக்கத்தைப் பார்த்தோம். அதில், விகடன் வெளியிட்ட பதிவை ரீபோஸ்ட் செய்து, நன்றி விகடன் என்று குறிப்பிட்டிருந்தார். இதன் மூலம் இந்த நியூஸ் கார்டு மற்றும் தகவல் இரண்டுமே தவறானது என்பது உறுதியாகிறது.

முடிவு:

காமராஜர் காரில் போனதே சீமானுடன்தான் என்று நாதக நிர்வாகி பேட்டி அளித்ததாக பரவும் நியூஸ் கார்டு போலியானது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.