லெபனான் தலைநகர் பெய்ரூட்டில் உள்ள கார் பார்க்கிங் ஒன்றின் மீது இஸ்ரேல் குண்டு வீசி தாக்குதல் நடத்தியதாக வீடியோ பதிவு சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.
தகவலின் விவரம்:
உண்மைப் பதிவைக் காண: Facebook I Archive I x.com I Archive
கார்கள் பற்றி எரியும் மற்றும் எரிந்த பின் வெறும் கூடுகளாக இருக்கும் கார்களின் இரண்டு வீடியோக்களை ஃபேஸ்புக்கில் பதிவிட்டுள்ளனர். நிலைத் தகவலில், “லெபனான் பெய்ரூட் கார் பார்க் ஒன்றில் இஸ்ரேல் மிக பெரிய குண்டு வீசி தாக்குதல் நடத்தி உள்ளது.
லெபனானில் இன்று மட்டும் பல தாக்குதல் இஸ்ரேல் நடத்தி உள்ளது. இதற்க்கு ஹிஸ்புல்லா, ஈரான் எவ்வாறு பதிலடி கொடுக்கும் என கேள்வி எழுந்துள்ளது..” என்று குறிப்பிடப்பட்டிருந்தது. இந்த பதிவை பலரும் சமூக ஊடகங்களில் பதிவிட்டு பகிர்ந்து வருகின்றனர்.
உண்மை அறிவோம்:
லெபனான் நாட்டில் உள்ள ஹிஸ்புல்லா பயங்கரவாத அமைப்பு மீது இஸ்ரேல் தாக்குதல் நடத்தி வருகிறது. இந்த நிலையில் இஸ்ரேல் மற்றும் ஹிஸ்புல்லா அமைப்பு நடத்திய தாக்குதல் காட்சி என்று பல உண்மை வீடியோக்களுடன் பழைய வேறு இடங்களில் எடுக்கப்பட்ட வீடியோக்களும் சமூக ஊடகங்களில் பகிரப்பட்டு வருகிறது. பெய்ரூட் கார் பார்க்கிங் மீது நடத்தப்பட்ட தாக்குதல் என்று ஒரு வீடியோ சமூக ஊடகங்களில் பகிரப்பட்டு வருகிறது. இது உண்மையா என்று அறிய ஆய்வு செய்தோம்.
வீடியோ காட்சியை புகைப்படமாக மாற்றி கூகுள் லென்ஸ் தளத்தில் பதிவேற்றித் தேடினோம். அப்போது கார் பார்க்கிங் இடத்தில் ஏற்பட்ட தீ விபத்து காரணமாக இந்த சம்பவம் நடந்தது என்று பலரும் சமூக ஊடகங்களில் பதிவிட்டிருந்தனர். அதில் உள்ள தகவல் அடிப்படையில் லெபனான் ஊடகங்களில் வெளியான செய்திகளைத் தேடினோம். LBCI Lebanon English என்ற லெபனான் தனியார் ஊடகத்தில் இது தீ விபத்து என்றே குறிப்பிடப்பட்டிருந்தது.
தொடர்ந்து தேடிய போது லெபனான் செய்தி – தகவல் துறை அமைச்சகத்தின் தேசிய செய்தி ஏஜென்சி வெளியிட்டிருந்த செய்தி நமக்குக் கிடைத்தது. அதிலும் கூட பார்க்கிங் பகுதியிலிருந்த மின்சார ஜெனரேட்டரில் ஏற்பட்ட தீ விபத்து காரணமாக இந்த சம்பவம் நடந்தது என்று குறிப்பிடப்பட்டிருந்தது. இதன் மூலம் இது இஸ்ரேல் நடத்திய வெடிகுண்டு தாக்குதல் என்று பரவும் தகவல் தவறானது என்பது உறுதியாகிறது.
உண்மைப் பதிவைக் காண: nna-leb.gov.lb I Archive
முடிவு:
பெய்ரூட்டில் பார்க்கிங் மின்சார ஜெனரேட்டரில் ஏற்பட்ட தீ விபத்து காரணமாக கார்கள் எரிந்த வீடியோவை இஸ்ரேல் தாக்குதலில் கார்கள் எரிந்தது என்று தவறாக சமூக ஊடகங்களில் பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.
சமூக ஊடகங்களில் எங்களை பின் தொடர விரும்பினால்…
Facebook I X Post I Google News Channel I Instagram
Title:பெய்ரூட் கார் பார்க்கிங் மீது இஸ்ரேல் தாக்குதல் என்று பரவும் தகவல் உண்மையா?
Written By: Pankaj IyerResult: False
