மோசமான ஶ்ரீபெரும்புதூர் சாலைகள் என்று பரவும் வீடியோ உண்மையா?

குண்டும் குழியுமாகப் பயன்படுத்த முடியாத அளவுக்கு மோசமான நிலையில் உள்ள சாலை ஒன்றின் வீடியோவை பகிர்ந்து, இது ஶ்ரீபெரும்புதூர் சாலை என்று சிலர் சமூக ஊடகங்களில் பகிர்ந்து வருகின்றனர். இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

மிகவும் குறுகிய மோசமான நிலையில் உள்ள சாலை ஒன்றின் வீடியோ ஃபேஸ்புக்கில் பதிவிடப்பட்டுள்ளது. சாலையில் உள்ள பள்ளங்களைச் சுற்றி வெள்ளை நிற பெயிண்ட் அடிக்கப்பட்டுள்ளது. வீடியோவின் மீது ‘Sriperumbuder Roads’ என்று ஆங்கிலத்தில் எழுதப்பட்டுள்ளது. இந்த வீடியோவை பலரும் சமூக ஊடகங்களில் பகிர்ந்து வருகின்றனர்.

உண்மை அறிவோம்:

ஶ்ரீபெரும்புதூரின் சாலைகள் மிகவும் மோசமான நிலையில் உள்ளது என்று தொடர்ந்து தவறான வீடியோக்கள் சமூக ஊடகங்களில் பகிரப்பட்டு வருகின்றன. உடுப்பியில் எடுக்கப்பட்ட வீடியோவை சில மாதங்களுக்கு முன்பு ஶ்ரீபெரும்புதூர் என்று பரப்பினர். தற்போது மீண்டும் ஒரு சாலை வீடியோவை பகிர்ந்து இது ஶ்ரீபெரும்புதூர் என்று குறிப்பிட்டுள்ளனர். வீடியோவைப் பார்க்கும் போது மலைப்பாங்கான, வனப் பகுதி போல் உள்ளது. பார்க்க ஶ்ரீபெரும்புதூர் போலத் தெரியவில்லை. எனவே, இந்த வீடியோ தொடர்பாக ஆய்வு செய்தோம்.

வீடியோ காட்சிகளைப் புகைப்படங்களாக மாற்றி கூகுள் லென்ஸ் தளத்தில் பதிவேற்றி தேடினோம். அப்போது கடந்த ஆகஸ்ட் 2024 முதல் பலரும் இந்த வீடியோவை சமூக ஊடகங்களில் பகிர்ந்து வந்திருப்பதைக் காண முடிந்தது. ஆனால் இந்த வீடியோ எங்கு எடுக்கப்பட்டது என்று குறிப்பிடப்படவில்லை. “Marka jalan spesial HUT RI 79” என்று குறிப்பிட்டு 2024 ஆகஸ்ட் 17ம் தேதி இன்ஸ்டாகிராமில் இந்த வீடியோவை ஒருவர் பதிவிட்டிருந்தார். அதை மொழிபெயர்த்துப் பார்த்த போது அது ஜாவானீஸ் என்ற மொழியில் எழுதப்பட்டிருப்பதாகக் கூகுள் டிரான்ஸ்லேட்டர் காண்பித்தது. “79வது குடியரசு தின சிறப்புச் சாலை டிசைன்” என்பதாகக் கூகுள் டிரான்ஸ்லேட்டர் மொழி பெயர்த்திருந்தது.

உண்மைப் பதிவைக் காண: instagram.com

நாம் ஆய்வுக்கு எடுத்துக்கொண்ட வீடியோவில் சாலையின் நடுவே கூட “HUT RI 79” என எழுதப்பட்டிருந்தது. எனவே, கூகுளில் அதை அப்படியே டைப் செய்து தேடிய போது, அது இந்தோனேஷிய குடியரசு தின விழா என்று தெரிந்தது. கடந்த ஆகஸ்ட் மாதம் இந்தோனேஷியா 79வது குடியரசு தினத்தைக் கொண்டாடிய போது இந்தோனேஷியர்கள் அதை HUT RI 79 என்று அழைத்ததாக செய்திகள் கிடைத்தன.

உண்மைப் பதிவைக் காண: merdeka.com I Archive

தொடர்ந்து தேடிய போது, இந்த சாலை தொடர்பாக மலே (Malay) மொழியில் வெளியான செய்தி ஒன்று கிடைத்தது. அதில், இந்தோனேஷியாவின் மத்திய ஜாவா தீவில் உள்ள ஜெபாரா (Jepara) என்ற கிராமத்தில் இந்தோனேஷியாவின் குடியரசு தினத்தையொட்டி சாலையில் அவல நிலையை வெளிப்படுத்த சாலையில் உள்ள குண்டு குழிகளைச் சுற்றி வெள்ளை நிற பெயிண்ட் அடித்த மக்கள் என்று குறிப்பிட்டிருந்தனர். இதன் மூலம் இந்த வீடியோ இந்தோனேஷியாவை சார்ந்தது என்பது உறுதியாகிறது.

நம்முடைய ஆய்வில், மோசமான சாலை என்று பகிரப்படும் வீடியோ இந்தோனேஷியாவைச் சார்ந்தது என்பது உறுதி செய்யப்பட்டுள்ளது. வீடியோவில் இடம் பெற்ற காட்சியில் இந்தோனேஷிய 79வது குடியரசு தினம் எழுதப்பட்டிருப்பது கண்டறியப்பட்டுள்ளது. இது தொடர்பாக வெளியான செய்திகள் கண்டறியப்பட்டுள்ளது. இந்த ஆதாரங்கள் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

இந்தோனேஷியாவின் மோசமான நிலையில் உள்ள ஒரு சாலையின் வீடியோவை தமிழ்நாட்டின் ஶ்ரீபெரும்புதூர் சாலை என்று தவறாக சமூக ஊடகங்களில் பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I X Post I Google News Channel I Instagram