RAPID FACT CHECK: கனடாவை கண்டித்து கனரா வங்கி முன்பு பாஜக போராட்டமா?

கனடாவை கண்டித்து கனரா வங்கி முன்பு பாஜக போராட்டம் நடத்தியது என்று ஒரு பதிவு சமூக ஊடகங்களில் பகிரப்பட்டு வருகிறது. இது பற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

பாஜக-வினர் போராட்டத்தில் ஈடுபட்ட புகைப்படம் பகிரப்பட்டுள்ளது. நிலைத் தகவலில், “கனடாவை எதிர்த்து கனரா வங்கி வாசலில் சங்கி கூமுட்ட கூட்டம்  ஆர்ப்பாட்டம்…” என்று குறிப்பிடப்பட்டிருந்தது. இந்த பதிவை Madhar Syed என்ற ஃபேஸ்புக் ஐடி கொண்டவர் 2023 செப்டம்பர் 24ம் தேதி பதிவிட்டிருந்தார். இவரைப் போல பலரும் இந்த புகைப்படத்தைப் பகிர்ந்து வருகின்றனர்.

உண்மை அறிவோம்:

தனி காலிஸ்தான் நாடு கேட்டு போராடி வரும் அமைப்பின் தலைவர் ஹர்தீப் சிங் நிஜ்ஜார் கடந்த ஜூன் மாதம் சுட்டுக்கொல்லப்பட்டார். இந்த கொலையில் இந்தியாவுக்கு தொடர்பு இருப்பதாக கனடா பிரதமர் ஜஸ்டின் ட்ரூடோ தெரிவித்திருந்தார். இதைத் தொடர்ந்த இந்தியா – கனடா உறவு பாதிக்கப்பட்டது.

கனடா அரசைக் கண்டித்து பாஜக சார்பில் போராட்டங்கள் நடத்தப்பட்டு வருகின்றன. டெல்லியில் ஜந்தர் மந்தரில் போராட்டம் நடத்திய பாஜக-வினர் கோரிக்கை மனு ஒன்றைக் கனடா தூதரகத்தில் அளித்ததாக செய்தி வெளியாகி இருந்தது. இந்த சூழலில், கனடாவை கண்டித்து கனரா வங்கி முன்பு பா.ஜ.க-வினர் போராட்டம் நடத்தியதாக சிலர் சமூக ஊடகங்களில் பதிவிட்டு வருகின்றனர்.

இந்த புகைப்படம் சில ஆண்டுகளுக்கு முன்பு ஊட்டியில் எடுக்கப்பட்டது என்பதை நம்முடைய ஃபேக்ட் செக் மூலம் உறுதி செய்திருந்தோம். அந்த படத்தை வைத்து தற்போது பலரும் தவறாகப் பதிவிட்டு வருவதைக் காண முடிகிறது.

உண்மைப் பதிவைக் காண: maalaimalar.com I Archive

கடந்த 2020 ஆகஸ்ட் மாதம் நீலகிரி மாவட்டம் ஊட்டி ஏ.டி.சி பகுதியில் நகராட்சிக்கு சொந்தமான இடத்தில் பா.ஜ.க கொடிக்கம்பம் நடப்பட்டுள்ளது. இதற்கு அனுமதி பெறவில்லை என்பதால் நகராட்சி அதிகாரிகள் அதை அகற்றியுள்ளனர். கொடிக் கம்பத்தை மீண்டும் நடவேண்டும் என்று பா.ஜ.க-வினர் போராட்டம் நடத்தியதாக மாலைமலர் வெளியிட்டிருந்த செய்தியில் குறிப்பிடப்பட்டிருந்தது. 

பழைய படத்தை வைத்து இப்போது புதிதாக வதந்தி பரப்பியுள்ளனர். இப்போது கனடா அரசைக் கண்டித்து கனரா வங்கி முன்பு பாஜக போராட்டம் ஏதும் நடத்தியதா என்று தேடிப் பார்த்தோம். அப்படி எந்த ஒரு செய்தியும் கிடைக்கவில்லை. மேலும், கனரா வங்கி முன்பு பாஜக எங்கு, எப்போது போராட்டம் நடத்தியது என்று எந்த தகவலையும் நாம் ஆய்வுக்கு எடுத்துக்கொண்ட ஃபேஸ்புக் பதிவு வெளியிடவில்லை. இதன் மூலம் வதந்தி பரப்பும் நோக்கில் இந்த பதிவு வெளியிடப்பட்டிருப்பதாக, உறுதி செய்யப்படுகிறது.

முடிவு:

கனடாவை கண்டித்து கனரா வங்கி முன்பு பாஜக போராட்டம் நடத்தியது என்று பரவும் தகவல் தவறானது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel