காசாவில் ஹமாஸை வரவேற்ற மக்கள் என்று பரவும் வீடியோ உண்மையா?

காசா தெருக்களில் ஹமாஸ் நடத்திய வெற்றி அணிவகுப்பை பாலஸ்தீன மக்கள் வரவேற்றதாக ஒரு வீடியோ சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

கார்களில் துப்பாக்கி ஏந்திய பலர் அணிவகுத்து வர அதை ஒரு பெண் வரவேற்பது போன்று வீடியோ ஃபேஸ்புக்கில் பதிவிடப்பட்டுள்ளது. வீடியோவில் “காசாவின் தெருக்களில் மக்களின் அமோக வரவேற்புடன் ஹமாஸின் வெற்றி வாகன அணிவகுப்பு” என்று குறிப்பிடப்பட்டிருந்தது. நிலைத் தகவலில், “ஹமாஸின் வெற்றி வாகன பேரணி..” என்று குறிப்பிடப்பட்டிருந்தது.

உண்மை அறிவோம்:

இரண்டு ஆண்டுகளாக நடந்து வந்த ஹமாஸ் – இஸ்ரேல் இடையேயான போர் முடிவுக்கு வந்துள்ளது. எகிப்தில் அமெரிக்க அதிபர் டிரம்ப் தலைமையில் இதற்கான ஒப்பந்தம் கையெழுத்தானது. இதைத் தொடர்ந்து இஸ்ரேல் மற்றும் ஹமாஸ் அமைப்பினர் பிடித்து வைத்திருந்த பிணைக் கைதிகள் விடுதலை செய்யப்பட்டு வருகின்றனர். இந்த நிலையில் காசா தெருக்களில் ஹமாஸ் அமைப்பினர் வெற்றி அணிவகுப்பு நடத்தியதாகவும், அவர்களை பொது மக்கள் வரவேற்றதாகவும் ஒரு வீடியோ சமூக ஊடகங்களில் பகிரப்பட்டு வருகிறது. இது உண்மையா என்று அறிய ஆய்வு செய்து பார்த்தோம்.

يلعب الاطفال من حولهم وغدا يكبرون ويدافعون عن أرضهم وبلادهم ومقدساتهم جيلا يسلم جيل ،والصورة اكبر دليل ، من غزة اليوم🇵🇸🔻 pic.twitter.com/K0SOzRlf1W
— غزة الآن – Gaza Now (@nowgnna) January 25, 2025

Archive

வீடியோ காட்சிகளைப் புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். அப்போது இந்த ஆண்டு ஜனவரியில் இருந்து இந்த வீடியோ சமூக ஊடகங்களில் பகிரப்பட்டு வந்திருந்ததைக் காண முடிந்தது. பெரும்பாலான பதிவுகள் ஹமாஸை புகழ்ந்து அல்லது விமர்சித்து வெளியிடப்பட்டதாக இருந்தது. இந்த வீடியோ எப்போது எடுக்கப்பட்டது என்று அவற்றில் குறிப்பிடப்படவில்லை.

தொடர்ந்து தேடிய போது அரபு மொழியில் வெளியான எக்ஸ் தள பதிவுகள் நமக்கு கிடைத்தன. அதை மொழிமாற்றம் செய்து பார்த்தோம். அதில், “நான்கு இஸ்ரேலிய பெண் ராணுவ வீரர்களை ஹமாஸ் ஒப்படைக்கச் சென்ற போது ஹமாஸ் வீரர்களுக்கு பாலஸ்தீன பெண் வணக்கம் செலுத்தினார்” என்பது போல குறிப்பிடப்பட்டிருந்தது. இதன் அடிப்படையில் கூகுளில் தேடினோம். அப்போது 2025 ஜனவரி 25ம் தேதி வெளியான செய்திகள் நமக்கு கிடைத்தன. அதாவது, நாம் ஆய்வுக்கு எடுத்துக்கொண்ட வீடியோ முதன் முதலில் சமூக ஊடகங்களில் பதிவிடப்பட்டிருந்த நாளில் வெளியாகி இருந்த செய்திகள் அவை.

உண்மைப் பதிவைக் காண: thehindu.com I Archive

அந்த செய்திகளில், “இஸ்ரேல் சிறையிலிருந்து 200 பாலஸ்தீனிய கைதிகள் விடுதலை செய்யப்பட்டதைத் தொடர்ந்து, நான்கு இஸ்ரேலிய பெண் ராணுவ வீரர்களை விடுதலைச் செய்த ஹமாஸ் என்று” என்று குறிப்பிடப்பட்டிருந்தது. இதன் மூலம் இது 2025 அக்டோபரில் மேற்கொள்ளப்பட்ட போர் நிறுத்த ஒப்பந்தத்தைத் தொடர்ந்து ஹமாஸ் நடத்திய வெற்றி அணிவகுப்பு இல்லை என்பது உறுதியாகிறது.

பழைய வீடியோவை எடுத்து, இப்போதைய சூழலுக்கு ஏற்ப தவறான தகவல் சேர்த்து சமூக ஊடகங்களில் வீடியோவை வெளியிட்டிருப்பது தெளிவாகிறது. இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

2025 ஜனவரியில் இஸ்ரேலிய பெண் ராணுவ வீரர்களை ஒப்படைக்க சென்றபோது எடுக்கப்பட்ட வீடியோவை போர் நிறுத்த வெற்றிப் பேரணி என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.