திருடனிடம் லாலிபாப் நீட்டிய சிறுமி என்று பரவும் வீடியோ உண்மையா?

கடையில் கொள்ளையடித்த திருடனிடம் தன்னிடமிருந்த லாலிபாப்பை வழங்கிய சிறுமி என்று ஒரு வீடியோ சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

கடை ஒன்றில் உரிமையாளரும் அவருக்கு அருகில் சிறுமி ஒருவரும் அமர்ந்திருக்க, கொள்ளையன் வந்து உரிமையாளரை அடித்து பணத்தைத் திருடுவது போன்று வீடியோ ஃபேஸ்புக்கில் பதிவிடப்பட்டுள்ளது. கொள்ளையனிடம் சிறுமி தன்னிடமிருந்த லாலிபாப்பை நீட்ட, திகைத்துப்போன கொள்ளையன் மனம் திருந்தி பணத்தை கொடுத்துவிட்டு, சிறுமியின் தலையில் முத்தமிட்டுவிட்டு வெளியேறுவது போன்று வீடியோவில் இடம் பெற்றிருந்தது. நிலைத் தகவலில், “திருட வந்த திருடனிடம் தன்னிடம் இதுதான் இருக்கிறது என்று லாலிபாப்பை நீட்டும் சிறுமி அந்த அன்பிற்கு அடிபணிந்த திருடன்” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

கடையில் கொள்ளையடிக்க வந்தவனிடம் சிறுமி தன்னிடம் இது மட்டும்தான் இருக்கிறது என்று லாலிபாப்பை நீட்ட, அந்த சிறுமியின் செயலால் மனம் திருந்திய திருடன் என்பது போன்று வீடியோ ஃபேஸ்பக்கில் பதிவிடப்பட்டுள்ளது. இந்த சம்பவம் எங்கு நடந்தது என்று குறிப்பிடப்படவில்லை. வீடியோ காட்சியைப் பார்க்கும் போது உண்மை சம்பவம் போல இல்லை. கடை உரிமையாளரும், சிறுமியும் கொள்ளையனைப் பார்த்து சிறிதும் பயமின்றி அமர்ந்திருப்பதைக் காண முடிகிறது. கடை உரிமையாளரை தாக்கும் காட்சிகள் எல்லாம் செயற்கையாக உள்ளது. எனவே, ஸ்கிரிப்டட் வீடியோவை உண்மை சம்பவம் போல பகிர்ந்திருக்கலாம் என்பதால் இது பற்றி ஆய்வு செய்தோம்.

வீடியோ காட்சிகளைப் புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். பலரும் இந்த வீடியோவை கடந்த சில நாட்களாக சமூக ஊடகங்களில் பதிவிட்டு வந்திருந்ததைக் காண முடிந்தது. நாம் ஆய்வுக்கு எடுத்துக்கொண்ட வீடியோவில் தேதி சரியாகத் தெரியவில்லை. ஆனால், இணையத்தில் தேடியபோது கிடைத்த வீடியோக்களில் தேதி சரியாகத் தெரிந்தது. அதில், நவம்பர் 12, 2025 என்று இருந்தது. அதனால், இது பழைய வீடியோ இல்லை என்பது தெளிவானது. தொடர்ந்து தேடிய போது நவம்பர் 16ம் தேதி யூடியூபில் ஒருவர் இதைப் பதிவிட்டிருந்ததைக் காண முடிந்தது.

அதில், “இது உண்மையான வீடியோ இல்லை. இந்த வீடியோவில் இடம் பெற்றவர்கள் உண்மையில் நடிகர்கள். வீடியோவில் காட்டப்படும் ஆயுதம் போலியானது. வெறும் பொழுதுபோக்குக்காக மட்டும் உருவாக்கப்பட்ட வீடியோ இது” என்று குறிப்பிடப்பட்டிருந்தது. Kamran Team Official என்ற யூடியூப் சேனல் இந்த வீடியோவை வெளியிட்டிருந்தது. 

அந்த யூடியூப் சேனலில் வெளியான வீடியோக்களை பார்த்தோம். இதே போன்று சிசிடிவி காட்சி வீடியோ போன்று பல வீடியோக்களை அவர்கள் பதிவிட்டிருந்தனர். பொழுதுபோக்குக்காக வெளியிடப்பட்ட வீடியோ, இது உண்மையானது இல்லை என்றே குறிப்பிட்டிருந்தனர். இதன் மூலம் நாம் ஆய்வுக்கு எடுத்துக்கொண்ட வீடியோ உண்மையானது இல்லை என்பது உறுதியாகிறது.

முடிவு:

திருட வந்தவனிடம் தன்னிடமிருந்த லாலிபாப்பை நீட்டிய சிறுமி என்று பரவும் வீடியோ ஸ்கிரிப்டட் வீடியோ என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I X Post I Google News Channel I Instagram