பாகிஸ்தான் போர் விமானத்தை வெறி கொண்டு தாக்கும் இந்தியா என்று பரவும் வீடியோ உண்மையா?

‘’ பாகிஸ்தான் போர் விமானத்தை வெறி கொண்டு தாக்கும் இந்தியா,’’ என்று கூறி, சமூக வலைதளங்களில் பகிரப்படும் ஒரு வீடியோ பற்றி ஆய்வு மேற்கொண்டோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’ ரஷ்யா காட்டாத வானவேடிக்கை இந்தியா காட்டுது தக்காலி பாத்து தெரிஞ்சுக்குங்கடா 😂😂😂

பாகிஸ்தானின் அவாக்ஸ் விமானம்

சுட்டு வீழ்த்தப்பட்ட நேரடி வீடியோ 🔥

பாரத் மாதாகி ஜெய் 🇮🇳

#OPERATIONSINDOOR
#INDIAPAKISTANWAR ,’’ என்று எழுதப்பட்டுள்ளது.

இதனுடன் போர் விமானம் ஒன்று குண்டு வீசுவது போன்றும், அதற்கு பீரங்கி ஒன்று பதிலடி தருவது போன்றும் காட்சிகள் கொண்ட ஒரு வீடியோ இணைக்கப்பட்டுள்ளது.

இதேபோன்று, ‘’நேரடிக் காட்சிகள் ,,இந்திய எல்லைக்குள் நுழையவிருந்த பாகிஸ்தானின் அவாக்ஸ் போர் விமானத்தை வெறி கொண்டு தாக்கி சுட்டு வீழ்த்திய இந்தியா 🔥🔥🔥,’’ என்று தலைப்பிட்டும் இதே வீடியோவை சிலர் பகிர்ந்து வருகின்றனர்.

Claim Link 1 l Claim Link 2 l Claim Link 3 l Claim Link 4

பலரும் இதனை உண்மை என நம்பி, சமூக வலைதளங்களில் ஷேர், கமெண்ட் செய்து வருகின்றனர்.

உண்மை அறிவோம்:

மேற்கண்ட தகவல் உண்மையா என்று நாம் ஆய்வு மேற்கொண்டோம். அப்போது, இந்த வீடியோவுக்கும், தற்போதைய இந்தியா – பாகிஸ்தான் மோதலுக்கும் எந்த தொடர்பும் இல்லை, என்று தெரியவந்தது.

ஆம், இது உண்மையான வீடியோ கிடையாது. வீடியோ கேம் ஒன்றின் பதிவு செய்யப்பட்ட காட்சி. இதில், கேமிரா இருக்கும் இடம் நோக்கி குண்டு வீசப்படுவது போன்றும், கேமிராவுக்கு எந்த பாதிப்பும் இல்லாமல், சிறு நடுக்கம் கூட இல்லாமல், தொடர்ந்து, காட்சிகளை பதிவு செய்வது போன்றும் காட்சி இடம்பெற்றுள்ளது. இது யதார்த்த போர்க்களத்தில் சாத்தியமற்ற செயல். கேமிராவை நோக்கி குண்டுவீசப்பட்டால், அதனை படம்பிடிக்கும் நபர் கண்டிப்பாக அலறி ஓடுவார் அல்லது அச்சத்தில் கூக்குரல் எழுப்புவார். தவிர, கேமிரா, நிலைதடுமாறி கீழே விழவும் நேரிடும். இது எதுவுமே இன்றி இயந்திரத்தனமாக, நாம் ஆய்வு செய்யும் வீடியோவில் காட்சிகள் இடம்பெற்றுள்ளன.

இதன் அடிப்படையில், நாம் தொடர்ந்து தகவல் தேடியபோது, இது ஆன்லைனில் ArmA 3 என்ற பெயரில் கற்பனையாக போர் செய்வது போன்று, விளையாடப்படும் வீடியோ கேம் என்று தெரியவந்தது.

இதுபோன்று ஏராளமான போர் கற்பனை வீடியோக்கள் ஆன்லைனில் காணக் கிடைக்கின்றன.

Link 1 l Link 2

இந்த வீடியோ கேம் வடிவமைத்து, வெளியிட்டு வருவது Bohemia Interactive என்ற நிறுவனமாகும். இது செக் குடியரசு நாட்டைச் சேர்ந்தது. இந்த நிறுவனம், ARMA சீரிஸ் முறையில், ARMA 1, ARMA 2, ARMA 3 என்ற வீடியோ கேம்களை வடிவமைத்து வெளியிட்டு வருகிறது. இந்த காட்சிகளில் ஒன்றுதான், நாம் மேலே கண்ட வீடியோவும். நமது Fact Crescendo Assamese பிரிவு இதுபற்றி ஃபேக்ட்செக் வெளியிட்டுள்ளது.

மேலும், இஸ்ரேல் – பாலஸ்தீனம் மோதல் தொடர்பாக, இதேபோன்று ஒரு வீடியோவை சமூக வலைதளங்களில் பரவியதும், நாம் அதுபற்றி ஃபேக்ட்செக் செய்ததும் இங்கே குறிப்பிடத்தக்கது.

எனவே, வீடியோ கேம் காட்சியை எடுத்து, இந்தியா – பாகிஸ்தான் போர்க்காட்சி என்று, தவறான தகவல் பரப்புகிறார்கள், என சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.