தி.மு.க ஆட்சியில் கட்டப்பட்ட திறந்தவெளி கழிப்பறை என்று பரவும் வீடியோ உண்மையா?

திமுக அரசு கட்டிய திறந்தவெளி கழிப்பறை என்று ஒரு வீடியோ சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

அருகருகே அமைக்கப்பட்டிருந்த ஏராளமான திறந்த வெளி கழிப்பறைகளின் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “விடியல் அரசு..விடிஞ்சாலும் போகமாட்டீங்குது 😝😂” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

தி.மு.க அரசு அமைத்த திறந்த வௌி கழிப்பறை என்பது போன்று வீடியோ ஃபேஸ்புக்கில் பதிவிடப்பட்டுள்ளது. ஆனால், இந்த கழிப்பறை எங்கு அமைக்கப்பட்டது என்று எந்த ஒரு தகவலையும் அளிக்கவில்லை. தமிழ்நாட்டில் தி.மு.க அரசு அமைத்த கழிப்பறை என்பதற்கு எந்த ஒரு ஆதாரத்தையும் அளிக்காமல் பதிவிடப்பட்டுள்ளது. தி.மு.க நடத்தும் மாநாட்டின் இந்த நிலை என்று சிலர் கமெண்ட் செய்திருப்பதையும் காண முடிந்தது. எனவே, இந்த பதிவை பற்றி ஆய்வு செய்தோம்.

வீடியோ காட்சிகளை புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். அப்போது இந்த வீடியோவை ஒருவர் கடந்த 2025 டிசம்பர் மாத இறுதியில் யூடியூபில் பதிவிட்டிருந்ததைக் காண முடிந்தது. Chinsurah என்ற இடத்தில் இந்த வீடியோ எடுக்கப்பட்டதாக குறிப்பிட்டிருந்தார். அந்த பெயரை அப்படியே கூகுளில் டைப் செய்து தேடினோம். அப்போது அது மேற்கு வங்கம் ஹூக்ளியில் உள்ள சின்சுரா என்ற ஊர் என்று தெரியவந்தது. அங்கு டிசம்பர் இறுதியில் இஸ்லாமிய கூட்டம் நடந்ததாக செய்திகளும் நமக்கு கிடைத்தன. அவர் வெளியிட்டிருந்த வீடியோவிலேயே இஸ்லாமியக் கூட்டம் நடைபெற்ற காட்சியையும் வெளியிட்டிருந்தார். அதை அகற்றிவிட்டு, கழிப்பறை திறந்த வெளியில் இருக்கும் காட்சியை மட்டும் தமிழ்நாட்டில் அமைக்கப்பட்டது போன்று தவறாக வெளியிட்டிருப்பது தெரியவந்தது.

அந்த நபர், இஸ்லாமியக் கூட்டம் தொடர்பாக பல காணொளிகளை வெளியிட்டிருந்தார். அதில் கழிப்பறைகள் அமைக்கப்படுவது, ஒவ்வொன்றுக்கும் தற்காலிக மறைப்புகள் அமைக்கப்படுவது என்று பல காட்சிகள் அதில் இடம் பெற்றிருந்தன. மேலும், அந்த காணொளியிலேயே கட்டுமானப் பணிகள் நடந்து கொண்டிருப்பதையும் காண முடிந்தது. மிகப்பெரிய அளவில் மக்கள் ஒன்று கூடி வழிபட்ட காட்சியையும் அவர் பதிவிட்டிருந்தார்.

இவை எல்லாம் இந்த வீடியோ தற்காலிக கழிப்பறைகள் அமைக்கப்படும் போது எடுக்கப்பட்டது என்பதும், இது தமிழ்நாட்டில் தமிழ்நாடு அரசால் அமைக்கப்பட்டது இல்லை என்பதையும் உறுதி செய்தன. இந்த ஆதாரங்கள் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

மேற்கு வங்கத்தில் மத நிகழ்வுக்காக கழிப்பறைகள் கட்டப்பட்ட போது எடுக்கப்பட்ட வீடியோவை, தமிழ்நாட்டில் தி.மு.க அரசு அமைத்த திறந்த வெளி மறைவுகளற்ற கழிப்பறை என்று தவறாக சமூக ஊடகங்களில் பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.