லக்னோவில் ஹக்கீம் சலாவுதீன் என்பவர் வீட்டிலிருந்து கைப்பற்றப்பட்ட 3000 துப்பாக்கிகள், 50 ஆயிரம் தோட்டா மற்றும் அமெரிக்க டாலர்கள் என்று ஒரு வீடியோ சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.
தகவலின் விவரம்:
உண்மைப் பதிவைக் காண: Facebook I Archive
ஒரு இடத்தில் ஏராளமான துப்பாக்கி உள்ளிட்ட பயங்கர ஆயுதங்கள், கட்டுக்கட்டாக பணம் அடுக்கி வைக்கப்பட்டிருக்கும் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “லக்னோவில் உள்ள ஹக்கீம் சலாவுதீனின் வீட்டிலிருந்து 3,000 துப்பாக்கிகள், 50,000 தோட்டாக்கள் மற்றும் 20 பைகள் நிறைய டாலர் பணம் கைப்பற்றப்பட்டன…!*
*இந்தப் பணமும் துப்பாக்கிகளும் யாருக்காக, எதற்காக வைக்கப்பட்டன????” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.
உண்மை அறிவோம்:
உத்தரப்பிரதேசத்தில் ஹக்கீம் சலாவுதீன் என்பவர் வீட்டிலிருந்து 3000 நாட்டு துப்பாக்கி உள்ளிட்ட ஆயுதங்களை போலீசார் கைப்பற்றினர். லக்னோவில் உள்ள மலிஹாபாத் (Malihabad) காவல் நிலையத்திற்கு 100 மீட்டர் தொலைவில் அமைந்திருந்த சலாவுதீன் வீட்டிலிருந்து இவ்வளவு ஆயுதங்கள் கைப்பற்றப்பட்டிருப்பது அதிர்ச்சியை ஏற்படுத்தியது. இந்த நிலையில் சலாவுதீன் வீட்டிலிருந்து கைப்பற்றப்பட்ட ஆயுதங்கள் என்று ஒரு வீடியோவை சிலர் சமூக ஊடகங்களில் பதிவிட்டு வருகின்றனர்.
வீடியோ தெளிவில்லாமல் உள்ளது. வீடியோவில் இருக்கும் நபர்களைப் பார்க்கும் போது பாகிஸ்தான், ஆப்கானிஸ்தானைச் சார்ந்தவர்கள் போல தெரிகின்றனர். எனவே, பழைய வீடியோவை எடுத்து சலாவுதீன் வீடு என்று தவறாகப் பகிர்ந்துள்ளார்களா என்று அறிய ஆய்வு செய்தோம்.
வீடியோ காட்சிகளைப் புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். அப்போது இந்த வீடியோ 2021ம் ஆண்டிலிருந்து சமூக ஊடகங்களில் பகிரப்பட்டு வந்திருப்பதைக் காண முடிந்தது. சந்தேகப்பட்டது போன்று இந்த வீடியோ ஆப்கானிஸ்தானைச் சார்ந்தது என்பதும் தெரியவந்தது.
2023ம் ஆண்டு ஆப்கானிஸ்தானை விட்டு அமெரிக்கா வெளியேறிய போது அங்கு வைத்திருந்த ஆயுதங்களை அப்படியே விட்டுவிட்டு வெளியேறியது. அந்த ஆயுதங்களைத் தாலிபான்கள் கைப்பற்றினர். அந்த வீடியோவைத்தான் உத்தரப்பிரதேசம் லக்னோவில் கைப்பற்றப்பட்ட ஆயுதங்கள் என்று தவறாகப் பகிர்ந்திருப்பது தெரியவந்தது. இதன் மூலம் நாம் ஆய்வுக்கு எடுத்துக்கொண்ட பதிவு தவறானது என்பது உறுதியாகிறது.
முடிவு:
ஆப்கானிஸ்தானில் அமெரிக்கா விட்டுச் சென்ற ஆயுதங்களை தாலிபான்கள் கைப்பற்றிய வீடியோவை உ.பி லக்னோவில் கைப்பற்றப்பட்ட ஆயுதங்கள் என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.
சமூக ஊடகங்களில் எங்களை பின் தொடர விரும்பினால்…
Facebook I X Post I Google News Channel I Instagram
Title:லக்னோவில் ஹக்கீம் சலாவுதீன் என்பவர் வீட்டில் துப்பாக்கிகள் கைப்பற்றப்பட்டதா?
Fact Check By: Chendur PandianResult: False
