‘தவறுதலாக இளம் ஜோடி காலில் விழுந்த விஜய்’ – என்று பரவும் நியூஸ் கார்டு உண்மையா?

மாமல்லபுரம் நடந்த ஆறுதல் நிகழ்ச்சியின் போது தவறுதலாக அறை மாறிச் சென்று இளம் ஜோடி ஒன்றின் காலில் விஜய் விழுந்தார் என்று ஒரு நியூஸ் கார்டு சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

தவெக தலைவரும் நடிகருமான விஜய் புகைப்படத்துடன் புதிய தலைமுறை வெளியிட்டது போன்று நியூஸ் கார்டு ஃபேஸ்புக்கில் பதிவிடப்பட்டுள்ளது. அதில், “விஜய் இளம்ஜோடி காலில் விழுந்ததாக தகவல்! மகாபலிபுரத்தில் உள்ள நட்சத்திர ஹோட்டலில் நேற்று நடைபெற்ற ஆறுதல் கூறும் நிகழ்வில், பாதிக்கப்பட்ட மக்கள் உள்ள அறைக்கு பதிலாக இளம் ஜோடி இருந்த அறைக்குள் தவெக தலைவர் விஜய் தவறுதலாக நுழைந்து அவர்கள் காலில் விழுந்ததால் சிறுது நேரம் அங்கு பரபரப்பு ஏற்பட்டதாக தகவல்” என்று குறிப்பிடப்பட்டிருந்தது. இந்த நியூஸ் கார்டை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

கரூர் தவெக பிரசார நிகழ்ச்சியின் போது ஏற்பட்ட கூட்ட நெரிசலில் சிக்கி உயிரிழந்தவர்களின் குடும்பத்தினருக்கு விஜய் ஆறுதல் கூறும் நிகழ்ச்சி மாமல்லபுரத்தில் உள்ள ஒரு நட்சத்திர விடுதியில் வைத்து நடத்தப்பட்டது. இந்த நிகழ்ச்சியில் பத்திரிகையாளர்கள் அனுமதிக்கப்படவில்லை. இந்த நிலையில், ஹோட்டலில் தங்கியிருந்த இளம் ஜோடி ஒன்றின் அறைக்குள் தவறுதலாக நுழைந்து அவர்கள் காலில் விழுந்த விஜய் என்று பலரும் சமூக ஊடகங்களில் நியூஸ் கார்டு ஒன்றைப் பகிர்ந்து வருகின்றனர்.

இந்த நியூஸ் கார்டை பார்க்கும் போது புதிய தலைமுறை வெளியிட்டது போல இருந்தாலும் சிறிது என்பதை எழுத்துப் பிழையுடன் “சிறுது” என்று குறிப்பிட்டிருந்தது, இளம் ஜோடி தங்கியிருந்த அறைக்கு தவறாகச் சென்றார் என்ற தகவல் நையாண்டி கலந்ததாக இருந்தது எல்லாம் இது போலியாக இருக்கலாம் என்ற சந்தேகத்தை ஏற்படுத்தியது. எனவே, இந்த நியூஸ் கார்டு தொடர்பாக ஆய்வு செய்தோம்.

முதலில் இப்படி ஒரு நியூஸ் கார்டை புதிய தலைமுறை வெளியிட்டதா என்று அறிய அதன் சமூக ஊடக பக்கங்களைப் பார்வையிட்டோம். அதில், நாம் ஆய்வுக்கு எடுத்துக்கொண்டது போன்று எந்த நியூஸ் கார்டும் இல்லை. எனவே, இதை புதிய தலைமுறை டிஜிட்டல் பொறுப்பாளருக்கு அனுப்பினோம்.

உண்மைப் பதிவைக் காண: puthiyathalaimurai.com I Archive

நமக்கு பதில் அளித்த அவர், இந்த நியூஸ் கார்டு போலியானது என்று குறிப்பிட்டு, இது தொடர்பாக புதிய தலைமுறை இணையதளத்தில் வெளியிட்டிருந்த பதிவையும் அனுப்பினார். அதில், இந்த செய்தியை புதிய தலைமுறை வெளியிடவில்லை என்று குறிப்பிட்டு பதிவிட்டிருந்தனர். இந்த ஆதாரங்கள் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

மாமல்லபுரத்தில் நடந்த ஆறுதல் கூட்டத்தில் தவறுதலாக இளஞ்ஜோடி தங்கியிருந்த அறைக்குள் நடிகர் விஜய் நுழைந்து அவர்கள் காலில் விழுந்தார் என்று பரவும் நியூஸ் கார்டு போலியானது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I X Post I Google News Channel I Instagram