விராட் கோலியை வெறுப்பேற்ற ஃபேஸ்புக் புகைப்படத்தை மாற்றினாரா கவுதம் கம்பீர்?

‘‘விராட் கோலியை வெறுப்பேற்ற ஃபேஸ்புக் புகைப்படத்தை மாற்றிய கவுதம் கம்பீர்,’’ என்று கூறி சமூக வலைதளங்களில் பகிரப்படும் ஒரு புகைப்படம் பற்றி ஆய்வு செய்ய தீர்மானித்தோம். 

தகவலின் விவரம்:

இதனை வாசகர்கள் நமக்கு வாட்ஸ்ஆப் வழியே (+919049044263 & +919049053770) அனுப்பி, உண்மையா என்று சந்தேகம் கேட்டனர். 

Tweet Claim Link l Archived Link

பலரும் இதனை உண்மை என நம்பி ஷேர் செய்து வருகின்றனர். 

உண்மை அறிவோம்:

ஐபிஎல் 2023 சீசன் தற்போது தொடங்கி நடைபெற்று வருகிறது. இதையொட்டி, மே 1, 2023 அன்று நடைபெற்ற போட்டி ஒன்றில், லக்னோ சூப்பர் ஜெயண்ட்ஸ் மற்றும் ராயல் சேலஞ்சர்ஸ் ஆஃப் பெங்களூரு அணிகள் மோதின. இந்த போட்டியின் முடிவாக, லக்னோ அணியின் ஆலோசகராக உள்ள கவுதம் கம்பீருக்கும், பெங்களூரு அணியின் கேப்டன் கோலிக்கும் இடையே கடும் வாக்குவாதம் ஏற்பட்டு, மோதலாக வெடித்தது. இதுபற்றிய வீடியோ மற்றும் செய்திகள் வெளியாகி பெரும் பரபரப்பை ஏற்படுத்தியுள்ளன. 

hindutamil link l tamil.news18 link l dailythanthi link 

இந்த சூழலில், கோலியை கிண்டல் செய்யும் நோக்கில் கவுதம் கம்பீர், கொல்கத்தா அணியின் கேப்டனாக இருந்தபோது சாம்பியன் கோப்பை வென்றதை சுட்டிக்காட்டும் வகையில், தனது ஃபேஸ்புக் பக்கத்தின் முகப்புப் புகைப்படத்தை மாற்றினார் என்று குறிப்பிட்டு, சிலர் சமூக வலைதளங்களில் பதிவிட்டு வருகின்றனர். ஏனெனில், கோலி தலைமையிலான ஆர்சிபி அணி இதுவரை ஒரு கோப்பை கூட ஐபிஎல் தொடரில் வென்றதில்லை. இதனைக் குறிப்பிட்டே இவ்வாறு தகவல் பகிர்கின்றனர். 

ஆனால், கம்பீர் இதுபோல புகைப்படம் எதையும் மாற்றவில்லை. அவரது ஃபேஸ்புக் பக்கத்தின் முகப்புப் பகுதியை கீழே இணைத்துள்ளோம். 

மேலும், அவரது ஃபேஸ்புக் பக்கத்தின் Edited History உள்ளிட்டவற்றையும் நன்கு தேடிப்பார்த்தோம். எந்த மாற்றமும் இவர்கள் கூறுவதுபோல செய்யப்படவில்லை.

மேலும், நாம் ஆய்வு செய்யும் ட்வீட் பதிவை வெளியிட்ட நபர் இது ஒரு எடிட் செய்த புகைப்படம் என்று கமெண்ட் பகுதியில் ஒப்புக் கொண்டிருக்கிறார். அதனையும் ஆதாரத்திற்காகக் கீழே இணைத்துள்ளோம். 

எனவே, வேண்டுமென்றே எடிட் செய்த புகைப்படம் ஒன்றை ட்விட்டர் பயனாளர் ஒருவர் பகிர்ந்துள்ளார். இதனை உண்மை என நம்பி மற்றவர்களும் பகிர்ந்து வருகின்றனர் என்று சந்தேகமின்றி உறுதி செய்யப்படுகிறது. 

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம். 

எங்களது சமூக வலைதள பக்கங்களை பின்தொடர…

Facebook Page I Twitter PageI Google News Channel I Instagram