திமுக-வுக்கு எதிராகச் செய்தி பரப்ப செலவு செய்த பா.ஜ.க என்று பரவும் நியூஸ் கார்டு உண்மையா?

தி.மு.க-வுக்கு எதிரான செய்திகளை பரப்ப பா.ஜ.க லட்சக் கணக்கில் பணம் செலவழித்த வீடியோ வெளியானது என்று ஜூனியர் விகடன் நியூஸ் கார்டு ஒன்று சமூக ஊடகங்களில் பகிரப்பட்டு வருகிறது. இது பற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

ஜூனியர் விகடன் வெளியிட்டது போன்று நியூஸ் கார்டு பகிரப்பட்டுள்ளது. அதில், “லட்சக்கணக்கில் பணம், மோதிரம், ஸ்மார்ட்போன், உயர்தர மது பகீர் கிளப்பும் வீடியோ! தி.மு.க.வுக்கு எதிரான செய்திகளைப் பரப்ப லட்சக்கணக்கில் பணம் செலவழித்த பா.ஜ.க. சமூக வலைத்தளத்தில் வெளியான வீடியோ ஆதாரம்! ஆதன் தமிழ் மாதேஷ், ராஜவேல் நாகராஜன், ரவீந்திரன் துரைசாமி உள்ளிட்டோர் திமுகவுக்கு எதிராக பொய்ச் செய்திகளை பரப்ப பணம் பெற்றது அம்பலம்” என்று குறிப்பிடப்பட்டிருந்தது. இந்த நியூஸ் கார்டை Inba Raj என்ற ஃபேஸ்புக் ஐடி கொண்டவர் 2023 மார்ச் 16ம் தேதி வெளியிட்டுள்ளார். இதை பலரும் ஷேர் செய்து வருகின்றனர்.

உண்மை அறிவோம்:

யூடியூபர்கள் ஒரு கட்சிக்கு ஆதரவாக செயல்பட பணம் மற்றும் பொருட்களைப் பெற்றுக் கொண்டது போன்று வீடியோ சமூக ஊடகங்களில் வெளியாகி வைரல் ஆனது. இதன் நம்பகத்தன்மையை ஆய்வு செய்யவில்லை. அதே நேரத்தில் திமுக-வுக்கு எதிராக செயல்பட பா.ஜ.க லட்சக் கணக்கில் பணம் செலவு செய்தது என்று ஜூனியர் விகடன் செய்தி வெளியிட்டது போன்று நியூஸ் கார்டு பகிரப்பட்டு வரவே, அது உண்மையா என்று ஆய்வு செய்தோம்.

ஏற்கனவே, இதே போன்று புதிய தலைமுறை, தினமலர் லோகோவோடு வெளியான நியூஸ் கார்டுகள் போலியானவை என்று ஆய்வு செய்து உறுதி செய்திருந்தோம். தற்போது, ஜூனியர் விகடன் லோகோவுடன் நியூஸ் கார்டு வைரலாக பகிரப்பட்டு வருகிறது. 

இந்த நியூஸ் கார்டை ஜூனியர் விகடன் வெளியிட்டதா என்று அறிய அதன் சமூக ஊடக பக்கங்களை பார்வையிட்டோம். ஆனால், அதில் அப்படி எந்த நியூஸ் கார்டும் இல்லை. எனவே, இந்த நியூஸ் கார்டை விகடன் டிஜிட்டல் பிரிவு பொறுப்பாளருக்கு அனுப்பினோம். இதை விகடன் வெளியிட்டதா என்று அவரிடம் கேட்டபோது, இது போலியான நியூஸ் கார்டு என்று உறுதி செய்தார்.

யூடியூபர்கள் பணம் பெற்றது தொடர்பான ஸ்டிங் ஆபரேஷன் வீடியோக்கள் தொடர்ந்து வெளியாகிக்கொண்டே இருக்கின்றன. இதை மதன் ரவிச்சந்திரன் என்பவர் வெளியிட்டு வருகிறார். அதே நேரத்தில் இந்த நியூஸ் கார்டை ஜூனியர் விகடன் வெளியிடவில்லை. உண்மையை சொல்ல நினைப்பவர்கள் மதன் ரவிச்சந்திரன் மற்றும் யூடியூபர்கள் புகைப்படத்துடன் பதிவை உருவாக்கி பகிர்ந்திருக்கலாம். ஆனால், ஒரு ஊடகத்தின் லோகோவுடன் அந்த ஊடகம் வெளியிட்டது போன்று போலியாக நியூஸ் கார்டை உருவாக்கியுள்ளனர். இது தவறானது… போலியானது… இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

திமுக-வுக்கு எதிராக பொய் செய்தி பரப்ப யூடியூபர்கள் பணம் பெற்றார்கள் என்று ஜூனியர் விகடன் வெளியிட்டதாக பரவும் நியூஸ் கார்டு போலியானது என்பதை ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel