பாஜக வேட்பாளரை விரட்டியடித்த உ.பி., மக்கள் என்று பரவும் பழைய வீடியோ!

உத்தரப்பிரதேசத்தில் பாஜக வேட்பாளரை மக்கள் விரட்டியடித்தார்கள் என்று ஒரு வீடியோ சமூக ஊடகங்களில் வைரலாக பகிரப்பட்டு வருகிறது. அது பற்றி ஆய்வு செய்தோம்.

தகவலின் விவரம்:

நம்முடைய ஃபேக்ட் கிரஸண்டோ தமிழ் வாசகர் ஒருவர் நம்முடைய வாட்ஸ் அப் சாட் பாட் எண்ணுக்கு வீடியோ ஒன்றை அனுப்பியிருந்தார். அதில் ஒரு நபரை பலர் துரத்துகின்றனர். அவரை போலீசார் பாதுகாப்பாக அழைத்துச் செல்கின்றனர். இதனுடன் பதிவு ஒன்றை அனுப்பியிருந்தார். அதில், “உ.பி பாஜக வேட்பாளரை காவல் அதிகாரிகள் பத்திரமாக அழைத்து வரும் காட்சி வேட்பாளர்களை மக்கள் விரட்டி விரட்டி அடிக்கிறார்கள் பா.ஜ.க.வுக்கு கிடைத்திருக்கும் வெகுமதி  2022 தேர்தல் நிலைமை” என்று குறிப்பிடப்பட்டிருந்தது. இந்த வீடியோ பதிவு உண்மையா என்று அவர் கேள்வி எழுப்பியிருந்தார்.

உண்மைப் பதிவைக் காண: Facebook I Archive

ஃபேஸ்புக்கில் இந்த பதிவு பகிரப்பட்டுள்ளதா என்று பார்த்தோம். MediaVoice – Tamil என்ற ஃபேஸ்புக் பக்கம் 2022 ஜனவரி 25ம் தேதி இதை பகிர்ந்திருந்தது. பலரும் இதை ஷேர் செய்து வருகின்றனர்.

உண்மை அறிவோம்:

உத்தரப்பிரதேச சட்டமன்ற தேர்தல் நடைபெற உள்ள நிலையில், பாஜக வேட்பாளரை மக்கள் விரட்டினார்கள் என்று கூறப்பட்டுள்ளது. ஆனால், வீடியோவில் சீக்கியர்கள் அதிக அளவில் இருப்பதைக் காண முடிகிறது. எனவே, பஞ்சாபில் எடுக்கப்பட்ட வீடியோவை உத்தரப்பிரதேசம் என்று கூறியிருக்கலாம் என்ற சந்தேகத்தில் ஆய்வு மேற்கொண்டோம்.

வீடியோ காட்சிகளை புகைப்படமாக மாற்றி ரிவர்ஸ் இமேஜ் தேடலில் பதிவேற்றித் தேடினோம். அப்போது, 2021ம் ஆண்டு பஞ்சாப் மாநிலத்தில் பாஜக நிர்வாகி ஒருவரை விவசாய அமைப்பைச் சார்ந்தவர்கள் விரட்டி அடித்த காட்சி என்று கூறி சில பதிவுகள் வெளியாகி இருப்பதைக் காண முடிந்தது.

Punjab BJP leader Bhupesh Aggarwal and other local leaders of the party were allegedly attacked by farmers earlier today in Patiala district's Rajpura. The leader alleges that the attack was carried out at the behest of the state Police. pic.twitter.com/niJVdFRXtL

— ANI (@ANI) July 11, 2021

Archive

தொடர்ந்து தேடிய போது ஏஎன்ஐ 2021 ஜூலை 11ம் தேதி வெளியிட்டிருந்த புகைப்படங்களுடன் கூடி ட்வீட் பதிவு கிடைத்தது. அந்த புகைப்படங்கள் நாம் ஆய்வுக்கு எடுத்துக்கொண்ட வீடியோவுடன் ஒத்துப்போயின. ஏஎன்ஐ வெளியிட்டிருந்த ட்வீட்டில், பஞ்சாப் மாநிலம் பாட்டியாலா மாவட்டம் ராஜ்புராவில் பாஜக தலைவர் பூபேஷ் அகர்வாலை விவசாயிகள் விரட்டியடித்தனர்” என்று இருந்தது.

பஞ்சாப், விவசாயிகள் போராட்டம், பாட்டியாலா, பூபேஷ் அகர்வால் உள்ளிட்ட வார்த்தைகளைப் பயன்படுத்தித் தேடிய போது இது தொடர்பான செய்தி மற்றும் வீடியோக்கள் நமக்குக் கிடைத்தன. 

இதன் மூலம் இந்த வீடியோ 2021ம் ஆண்டு ஜூலை மாதம் பஞ்சாப் மாநிலத்தில் எடுக்கப்பட்டது என்பது உறுதியாகிறது. இதன் அடிப்படையில் உத்தரப்பிரதேசத்தில் வாக்கு சேகரிக்கச் சென்ற பாஜக வேட்பாளரைப் பொதுமக்கள் விரட்டி அடித்த காட்சி என்று பகிரப்படும் தகவல் வீடியோ தவறானது என்று உறுதி செய்யப்படுகிறது.

முடிவு:

உத்தரப்பிரதேசத்தில் பாஜக வேட்பாளர்களை பொது மக்கள் விரட்டி அடித்தனர் என்று பகிரப்படும் வீடியோ தவறானது என்பதை ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel