பாகிஸ்தானுக்கு ஆதரவாக வந்த துருக்கி கடற்படை என்று பரவும் வீடியோ உண்மையா?

பாகிஸ்தானுக்கு ஆதரவாக துருக்கி அனுப்பிய கடற்படை கப்பல்கள் என்று ஒரு வீடியோ சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

கப்பல்கள் அணிவகுத்து வரும் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “பாகிஸ்தானுக்கு ஆதரவாக #துருக்கி கப்பற்படை இந்தியாவை நோக்கி வந்து கொண்டு இருப்பதாக சமூக ஊடகங்கள் வழியே செய்திகள் வருகிறது….

வரும் செய்தி உண்மையா பொய்யான்னு தெரியல…. ஆனா அப்படி நமக்கு எதிரா வந்தா அவனுங்களுக்கு INS – VIKRANT பாடை கட்ட போவது உறுதி” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டுள்ளனர்.

உண்மை அறிவோம்:

இந்தியாவில் பயங்கரவாத தாக்குதல் நடத்திய பாகிஸ்தான் பயங்கரவாதிகளுக்கு பதிலடி அளிக்கும் வகையில் ஆபரேஷன் சிந்தூர் என்ற தாக்குதலை இந்தியா நடத்தியது. அப்போது, பாகிஸ்தானுக்கு ஆதரவாக துருக்கி அரசு தன்னுடைய கடற்படையை அனுப்பியது என்று ஒரு வீடியோவை சிலர் சமூக ஊடகங்களில் பதிவிட்டிருந்தனர்.

100 years of the Turkish Republic: UDC L400 Anadolu in a festive column of 100 warships in the Bosphorus. #Turkey #Turkiye #Erdogan pic.twitter.com/0VPWcWMrLO
— ℂ𝕙𝕖 𝔾𝕦𝕖𝕧𝕒𝕣𝕒 ★ (@cheguwera) October 29, 2023

Archive

2024ம் ஆண்டு லெபனான் மீது இஸ்ரேல் தாக்குதல் நடத்திய போது இதே வீடியோவை லெபானுக்கு ஆதரவாக கடற்படையை அனுப்பிய துருக்கி என்று சிலர் பதிவிட்டிருந்தனர். இந்த வீடியோவை அப்போது ஃபேக்ட் செக் செய்திருந்த நினைவு இருந்தது. எனவே, நாம் ஆய்வுக்கு எடுத்துக்கொண்ட பதிவில் உள்ள வீடியோ பழையது தானா என்பதை மீண்டும் உறுதி செய்துகொள்ள ஆய்வு செய்தோம்.

உண்மைப் பதிவைக் காண: dailysabah.com I Archive I iletisim.gov.tr I Archive

பழைய கட்டுரையைத் தேடி எடுத்துப் பார்த்த போது, இரண்டு பதிவுகளிலும் ஒரே வீடியோவைத் தான் பதிவிட்டுள்ளனர் என்பது தெளிவானது. 2023ம் ஆண்டு துருக்கி அரசு குடியரசாக மாறியதன் 100ம் ஆண்டை கொண்டாடும் விதத்தில் தன்னுடைய கடற்படை மற்றும் விமானப்படையின் சாகச நிகழ்ச்சியை நடத்தியது. அப்போது எடுக்கப்பட்ட வீடியோவை பாகிஸ்தானுக்கு ஆதரவாக கடற்படையை அனுப்பிய துருக்கி என்று தவறாகப் பகிர்ந்திருப்பது உறுதியானது.

முடிவு:

2023ல் துருக்கியில் நடந்த கடற்படை சாகச நிகழ்ச்சியின் போது எடுக்கப்பட்ட வீடியோவை பாகிஸ்தானுக்கு ஆதரவாக வந்த துருக்கி நாட்டு கடற்படை என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.