மத்திய பிரதேச தேர்தல் பிரசாரத்தில் அகிலேஷ் யாதவ் என்று பரவும் வீடியோ உண்மையா?

மத்திய பிரதேச தேர்தல் பிரசாரத்தில் அகிலேஷ் யாதவ் பங்கேற்ற காட்சி என்று ஒரு வீடியோ சமூக ஊடகங்களில் பகிரப்பட்டு வருகிறது. இது பற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

சமாஜ்வாடி கட்சித் தலைவர் அகிலேஷ் யாதவ் பங்கேற்ற தேர்தல் பிரசார கூட்டத்தின் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “மத்திய பிரதேச தேர்தல் பிரச்சாரம்! மக்கள் வெள்ளத்தில் அகிலேஷ் யாதவ்ஜி!” என்று குறிப்பிடப்பட்டிருந்தது. நாம் ஆய்வுக்கு எடுத்துக்கொண்ட பதிவானது நவம்பர் 14ம் தேதி ஃபேஸ்புக்கில் பதிவிடப்பட்டிருந்தது.

உண்மை அறிவோம்:

ராஜஸ்தான், மத்திய பிரதேசம் உள்ளிட்ட ஐந்து மாநிலங்களுக்கான சட்டமன்ற தேர்தல் அறிவிக்கப்பட்டு நடந்து வருகிறது. மத்திய பிரதேசத்தில் காங்கிரஸ், பாஜக-வுக்கு போட்டியாக சமாஜ்வாடி கட்சியும் போட்டியிடுகிறது. இந்த நிலையில் மத்திய பிரதேசத்தில் தேர்தல் பிரசாரத்துக்கு வந்த அகிலேஷ் யாதவ் மக்கள் வெள்ளத்தில் மிதந்தார் என்று சிலர் சமூக ஊடகங்களில் வீடியோவை பதிவிட்டு வருகின்றனர்.

வீடியோவில் உள்ள பேனரில் 2022 என்று குறிப்பிடப்பட்டுள்ளது. 2023 சட்டமன்ற தேர்தலுக்கு எதற்காக 2022 என்று குறிப்பிட வேண்டும் என்ற கேள்வி எழுந்தது. மேலும், 2022ல் உத்தரப்பிரதேச மாநில சட்டமன்ற தேர்தல் நடந்தது. அந்த வீடியோவை தவறாக பகிர்ந்துள்ளார்களா என்ற சந்தேகத்தின் அடிப்படையில் இந்த வீடியோவை ஆய்வு செய்தோம்.

வீடியோ காட்சிகளைப் புகைப்படங்களாக மாற்றி கூகுள் ரிவர்ஸ் இமேஜ் தேடலில் பதிவேற்றித் தேடினோம். அப்போது 2021 நவம்பரில் இந்தி ஊடகம் ஒன்றின் யூடியூப் பக்கத்தில் நாம் ஆய்வுக்கு எடுத்துக்கொண்ட வீடியோ இருப்பதைக் காண முடிந்தது. காசிபூரில் இருந்து லக்னோ சமாஜ்வாடி விஜய் யாத்ரா நேரடி ஒளிபரப்பு என்று தலைப்பிடப்பட்டிருந்தது. வீடியோவின் 17.30வது நிமிடத்தில் நாம் ஆய்வுக்கு எடுத்துக்கொண்ட வீடியோவில் உள்ள காட்சிகள் அப்படியே வந்தன. 

நமக்கு சந்தேகத்தை ஏற்படுத்திய வீடியோவில் இடம் பெற்ற மிகப் பெரிய பேனரின் புகைப்படத்தை அகிலேஷ் யாதவ் தன்னுடைய இன்ஸ்டாகிராம் பக்கத்தில் பதிவிட்டிருந்ததும் நமக்கு கிடைத்தது.

உண்மைப் பதிவைக் காண: instagram.com

2022ல் நடந்த உ.பி சட்டமன்ற தேர்தலையொட்டி அகிலேஷ் யாதவ் மேற்கொண்ட பயணத்தின் வீடியோவை, 2023 மத்திய பிரதேச சட்டமன்ற தேர்தலில் அகிலேஷ் யாதவுக்கு கூடிய கூட்டம் என்று தவறாகப் பகிர்ந்திருப்பது இதன் மூலம் உறுதியாகிறது. இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

மத்திய பிரதேச சட்டமன்ற தேர்தல் பிரசாரத்தில் பங்கேற்ற அகிலேஷ் யாதவ் என்று பரவும் வீடியோ 2021ல் உத்தரப்பிரதேசத்தில் எடுக்கப்பட்டது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel