தமிழக பாஜக தலைவரானதும் அதிமுக-வை விமர்சித்தாரா நயினார் நாகேந்திரன்?

தமிழ்நாடு பாஜக தலைவராக பொறுப்பேற்றதும் அ.தி.மு.க-வை விமர்சித்த நயினார் நாகேந்திரன் என்று ஒரு வீடியோ சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

நிகழ்ச்சி ஒன்றில் நயினார் நாகேந்திரன் பேசிய வீடியோ ஃபேஸ்புக்கில் பதிவிடப்பட்டுள்ளது. அதில் அவர், “அண்ணா திமுக இன்றைக்கு கூட்டணியில் இருக்கு, இல்லைங்கிறது இரண்டாவது விஷயம். சட்டமன்றத்தில் தைரியமா ஒரு ஆண்மையோட முதுகெலும்போடு பேசக்கூடிய அண்ணா திமுக-வை பார்க்க முடியவில்லை” என்று பேசினார். நிலைத் தகவலில், “தலைமை ஏற்றவுடன் பாஜக தலைவர் அதிரடி பேச்சு அதிமுகவில் ஆண்மையுள்ள ஒருவரை கூட பார்க்க முடியவில்லை” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

தமிழ்நாடு பாஜக தலைவராக நயினார் நாகேந்திரன் நியமிக்கப்பட்டுள்ளார். அதே நேரத்தில் பாஜக-வுடன் அதிமுக கூட்டணியும் உறுதியாகி உள்ளது. மத்திய உள்துறை அமைச்சர் அமித்ஷா மற்றும் அதிமுக பொதுச் செயலாளர் எடப்பாடி பழனிசாமி ஆகியோர் இணைந்து பேட்டி அளித்துள்ளனர்.

தலைமை ஏற்றவுடன் பாஜக தலைவர் அதிரடி பேச்சு அதிமுகவில் ஆண்மையுள்ள ஒருவரை கூட பார்க்க முடியவில்லை 🔥🔥 pic.twitter.com/dYJUZO592r
— மெட்ராஸ் பையன் (@madraspaiyan_) April 11, 2025

Archive

இந்த நிலையில் கட்சித் தலைவராக நியமிக்கப்பட்ட உடனேயே அதிமுக-வுக்கு எதிராக நயினார் நாகேந்திரன் பேசியது போன்று வீடியோ சமூக ஊடகங்களில் பகிரப்பட்டு வருகிறது. உண்மையில் இது நயினார் நாகேந்திரன் தலைவரானதும் பேசியது இல்லை. சில ஆண்டுகளுக்கு முன்பு அவர் பேசியிருந்தார். அது அப்போது பரபரப்பாக பேசப்பட்டது. எனவே, இந்த வீடியோ உண்மை ஆனால் தலைவரான பிறகு பேசினார் என்று பரவும் தகவல் தவறானது என்பது நமக்கு தெரிந்தது. இதை உறுதி செய்துகொள்ள ஆதாரங்களைத் தேடினோம்.

இந்த வீடியோ காட்சியை புகைப்படமாக மாற்றி கூகுள் லென்ஸ் தளத்தில் பதிவேற்றித் தேடினோம். ஆனால் நமக்கு பழைய வீடியோ கிடைக்கவில்லை. நயினார் நாகேந்திரன் பேசியதை அப்படியே கூகுளில் டைப் செய்து தேடினோம். அப்போது 2022ம் ஆண்டு ஜனவரியில் அவர் அப்படி பேசியது தொடர்பான வீடியோக்கள் நமக்கு கிடைத்தன. சன் நியூஸ் வெளியிட்டிருந்த யூடியூப் வீடியோவின் 1.33வது நிமிடத்தில் அந்த பேச்சு வருகிறது.

“மதமாற்றக் கொடுமை காரணமாக மாணவி ஒருவர் இறந்தார்” என்று பாஜக நடத்திய போராட்டத்தின் போது அவர் அப்படி பேசியது நமக்கு தெரியவந்தது. 2022ம் ஆண்டு நயினார் நாகேந்திரன் பேசியதை எடுத்து, 2025ல் அவர் பாஜக தலைவர் ஆன பிறகு பேசியதாக தவறான தகவல் சேர்த்து சமூக ஊடகங்களில் பகிர்ந்திருப்பது இதன் மூலம் தெளிவாகிறது. இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

பதவியேற்றதும் அதிமுக-வை விமர்சித்த நயினார் நாகேந்திரன் என்று பரவும் வீடியோ 2022ல் எடுக்கப்பட்டது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.