பீகாரில் பாஜக-வுக்கு ஆதரவாகப் பிரசாரம் செய்த இஸ்லாமியர்கள் என்று பரவும் வீடியோ உண்மையா?

பீகாரில் 10 ஜமாத்தைச் சார்ந்தவர்கள் பாஜக-வுக்கு ஆதரவாகப் பிரசாரம் செய்தார்கள் என்று ஒரு வீடியோ சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

இஸ்லாமியர்கள் பாஜக கொடியுடன் பேரணியாகச் செல்லும் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “பீகாரில் 10 ஜமாத்தைச் சேர்ந்த 1000 இஸ்லாமியர் மட்டும் கலந்து கொண்டு #பிஜேபிக்காக செய்த பிரச்சாரம் தான் இது. பிஜேபிஉள்ளவந்துடும்னுனு தமிழ்நாட்டில் மட்டும்தான் #திராவிட கட்சிகளும் #பெரியாரிஸ்ட்டுகளும் பிஜேபிக்கு எதிரான #சித்தாந்தத்தை உருவாக்கி #இஸ்லாமிய சகோதரர்களை #மூளை சலவை செய்து #பிஜேபிக்கு எதிரான சிந்தனையை உருவாக்குகிறது.. #காத்திருங்கள்தமிழகத்தில் #திராவிடத்தை கருவறுப்போம்” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

பீகார் சட்டமன்ற தேர்தல் பிரசாரத்தில் பாஜக-வுக்கு ஆதரவாக இஸ்லாமியர்கள் பிரசாரம் செய்தார்கள் என்று வீடியோவை சிலர் சமூக ஊடகங்களில் பதிவிட்டு வருகின்றனர். அண்ணா பெயரில் உள்ள திராவிட கட்சியுடன் கூட்டணி வைத்துக்கொண்டே திராவிடத்தைக் கருவறுப்போம் என்று வெறுப்பு பிரசாரத்தை பரப்பியுள்ளனர். இந்த வீடியோ உண்மையா என்று அறிய ஆய்வு செய்தோம்.

உண்மைப் பதிவைக் காண: Facebook

வீடியோ காட்சிகளைப் புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். அப்போது இந்த வீடியோ 2024ம் ஆண்டு தேர்தல் நாடாளுமன்றத் தேர்தல் நேரத்தில் வெளியாகி இருந்ததைக் காண முடிந்தது. அதில், திரிபுராவில் பாஜக சார்பில் போட்டியிடும் பிப்லாப் குமாருக்கு ஆதரவாக இஸ்லாமியர்களும் பிரசாரம் மேற்கொண்டனர் என்று குறிப்பிடப்பட்டிருந்தது.

இதன் அடிப்படையில் தொடர்ந்து தேடிய போது திரிபுரா மேற்கு நாடாளுமன்றத் தொகுதியில் முன்னாள் முதலமைச்சர் பிப்லாப் குமார் தேவ் பாஜக சார்பில் போட்டியிட்டார். அவருக்கு ஆதரவாக இஸ்லாமியர்கள் பிரசாரம் செய்தார்கள் என்று இந்த வீடியோவுடன் பல பதிவுகள் வெளியாகி இருந்ததைக் காண முடிந்தது.

நம்முடைய ஆய்வில் இந்த வீடியோ 2024ம் ஆண்டிலிருந்து சமூக ஊடகங்களில் பகிரப்பட்டு வந்திருப்பது உறுதி செய்யப்பட்டுள்ளது. திரிபுரா மாநிலத்தில் பிப்லாப் குமாருக்கு ஆதரவாக இந்த பிரசாரம் மேற்கொள்ளப்பட்டிருப்பது தெரியவந்துள்ளது. இந்த ஆதாரங்கள் அடிப்படையில் பீகாரில் 10 ஜமாத்தைச் சார்ந்த இஸ்லாமியர்கள் ஒன்று கூடி பாஜக-வுக்கு ஆதரவாகப் பிரசாரம் செய்தார்கள் என்று பரவும் தகவல் தவறானது என்று உறுதி செய்யப்படுகிறது.

முடிவு:

2024ம் ஆண்டு திரிபுராவில் பாஜக வேட்பாளருக்கு ஆதரவாக இஸ்லாமியர்கள் பிரசாரம் செய்த வீடியோவை பீகாரில் பாஜக-வுக்கு ஆதரவாக பிரசாரம் என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.