மதுரை தவெக மாநாட்டின் கார் பார்க்கிங் என்று பரவும் புகைப்படம் உண்மையா?

மதுரையில் நடந்த தமிழக வெற்றிக் கழக மாநாட்டின் கார் பார்க்கிங் என்று ஒரு புகைப்படம் சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

கார் பார்க்கிங் ஒன்றின் புகைப்படம் ஃபேஸ்புக்கில் பதிவிடப்பட்டுள்ளது. நிலைத் தகவலில், “தளபதி விஜய்யோட மதுரை மாநாடு Car Parking 🔥 தளபதி எப்பவுமே மாஸ் தான்” என்று குறிப்பிடப்பட்டிருந்தது. இந்த பதிவை பலரும் சமூக ஊடகங்களில் பகிர்ந்து வருகின்றனர்.

உண்மை அறிவோம்:

சமீபத்தில் தமிழக வெற்றிக் கழகத்தின் 2வது மாநாடு மதுரை அருகே நடந்தது. இந்த நாட்டில் லட்சக்கணக்கான விஜய் ரசிகர்கள் கலந்துகொண்டனர். இந்த மாநாட்டுக்கு வந்த வாகனங்கள் நிறுத்தி வைக்கப்பட்டிருந்த இடத்தின் புகைப்படம் என்று ஒரு படத்தை பலரும் சமூக ஊடகங்களில் பகிர்ந்து வருகின்றனர். ஆனால், இந்த புகைப்படம் மாநாட்டு பார்க்கிங் போல இல்லை. எனவே, இது தொடர்பாக ஆய்வு செய்தோம்.

#WATCH | Aerial view of the stockyard of Maruti Suzuki in Gujarat, showing just about 2–3% of the annual production. The plant that rolls out 7.5 lakh cars every year pic.twitter.com/ZK7t0a3mam
— ANI (@ANI) August 26, 2025

Archive

இந்த புகைப்படத்தை கூகுள் லென்ஸ் தளத்தில் பதிவேற்றித் தேடிய போது இது குஜராத்தில் உள்ள மாருதி கார் நிறுவனத்தில் தயாரிக்கப்பட்ட வாகனங்கள் நிறுத்தி வைக்கப்பட்டிருந்த இடம் என்பது தெரியவந்தது. செய்தி நிறுவனம் ஒன்று இந்த வீடியோவை வெளியிட்டிருந்தது தெரியவந்தது. அதை வைத்து செய்தி ஊடகங்களில் இந்த வீடியோ மற்றும் புகைப்படம் வெளியாகி உள்ளது.

உண்மைப் பதிவைக் காண: indiatoday.in I Archive

குஜராத்தில் உள்ள மாருதி நிறுவனத்தின் புதிய வாகனங்கள் நிறுத்தப்படும் பார்க்கிங் இடமும் நாம் ஆய்வுக்கு எடுத்துக்கொண்ட வீடியோவில் உள்ள இடமும் ஒன்றாக உள்ளதா என்பதை உறுதிசெய்துகொள்ள கூகுள் மேப்-ல் அந்த இடத்தை பார்த்தோம். அப்போது இரண்டும் ஒன்றாக இருப்பதைக் காண முடிந்தது. இதன் மூலம் இது மாருதி நிறுவனத்தின் கார் நிறுத்தும் இடம்தான் என்பது உறுதியாகிறது.

முடிவு:

குஜராத்தில் உள்ள மாருதி நிறுவனத்தின் கார்கள் நிறுத்தும் இடத்தின் புகைப்படத்தை தவெக மதுரை மாநாட்டின் கார் பார்க்கிங் என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.