பொது இடத்தில் பெண்ணிடம் அத்துமீறிய பா.ஜ.க நிர்வாகி என்று பரவும் வீடியோ உண்மையா?

பொதுவெளியில் பா.ஜ.க நிர்வாகி ஒருவர் பெண்ணிடம் அநாகரீகமாக நடந்துகொண்டார் என்று ஒரு வீடியோ சமூக ஊடகங்களில் பகிரப்பட்டு வருகிறது. இதுபற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

அரசியல்வாதி ஒருவர், பெண்மணி ஒருவருக்கு மாலை அணிவித்து சேட்டைகள் செய்யும் வீடியோ பகிரப்பட்டுள்ளது. வீடியோவில், அந்த நபர் மாலை அணிவித்ததும் அந்த பெண்மணியிடம் கைகுலுக்க முயல்கிறார். ஆனால், அந்த பெண்மணியோ வணக்கம் கூறி மறுக்கிறார். வலுக்கட்டாயமாக அந்த பெண்மணிக்கு அவர் கையை பிடித்து கைகுலுக்குகிறார். பின்னர் அந்த பெண்மணிக்கு அவர் ஃபிளையிங் கிஸ் (பறக்கும் முத்தம்) கொடுக்கிறார். 

நிலைத் தகவலில், “நாமளும் சங்கியா மாறி …பிஜேபில சேந்தாதான் நமக்கு ஒரு விடிவு காலம் பொறக்கும்போல ” என்று குறிப்பிடப்பட்டிருந்தது.

இந்த வீடியோ பதிவை Yashvhanth Yash என்ற ஃபேஸ்புக் ஐடி-யைக் கொண்டவர் 2023 பிப்ரவரி 6ம் தேதி பதிவிட்டுள்ளார். இதை ஆயிரக் கணக்கானோர் ஷேர் செய்து வருகின்றனர்.

உண்மை அறிவோம்:

பா.ஜ.க என்றாலே பாலியல் அத்துமீறல் என்பது போன்று சமூக ஊடகங்களில் கட்டமைக்கப்படுகிறது. தற்போதும், பாஜக நிர்வாகி ஒருவர் பெண்ணிடம் அத்துமீறி நடந்துகொள்வதாகக் குறிப்பிட்டு பலரும் பகிர்ந்து வருகின்றனர். வீடியோவில் உள்ள பேனரில் காங்கிரஸ் கட்சியின் முன்னாள் தலைவர் சோனியா காந்தியின் படம் இருப்பது போலவும் கைச் சின்னம் இருப்பது போலவும் உள்ளது. எனவே, இந்த நபர் பா.ஜ.க நிர்வாகிதானா என்று ஆய்வு செய்தோம்.

வீடியோவில் உள்ள பேனரில் ஒடியா மொழியில் ஏதோ எழுதப்பட்டிருந்தது. எனவே, கூகுளில் காங்கிரஸ், ஃபிளையிங் கிஸ், ஒடியா என சில கீ வார்த்தைகளைப் பயன்படுத்தி கூகுளில் தேடினோம். அப்போது நியூஸ் 18 ஒடியா வெளியிட்டிருந்த யூடியூப் வீடியோ நமக்கு கிடைத்தது. அதில் காங்கிரஸ் எம்.எல்.ஏ தாரா பிரசாத் பாஹினிபதி (Tara Prasad Bahinipati) மேடையில் ஃபிளையிங் கிஸ் கொடுத்தது பரபரப்பை ஏற்படுத்தியது என்று தலைப்பிட்டிருந்தனர். வீடியோவில் வேறு எதையும் குறிப்பிடவில்லை. அதே நேரத்தில் அவர் ஃபிளையிங் கிஸ் கொடுத்த போது நிகழ்ச்சிக்கு வந்திருந்தவர்கள் கை தட்டியது அதிர்ச்சியை ஏற்படுத்தியது.

இந்த வீடியோவை ஒடிஷா காங்கிரஸ் எம்.எல்.ஏ-வும் தன்னுடைய ஃபேஸ்புக் பக்கத்தில் பதிவிட்டிருந்தார். அதில் காங்கிரஸ் கட்சியின் 138வது நிறுவன தின விழாவின் போது இந்த நிகழ்ச்சி நடந்தது என்று குறிப்பிட்டிருந்தார். இதன் மூலம் வீடியோவில் இருப்பது பா.ஜ.க நிர்வாகி இல்லை என்பது தெளிவானது. அதே நேரத்தில் இவ்வளவு மோசமாக மேடையில் நடந்துகொண்ட காங்கிரஸ் எம்.எல்.ஏ மீது நடவடிக்கை எடுக்கப்பட்டதா என்று தேடினோம். 

கூகுளில் பல்வேறு கீ வார்த்தைகளைப் பயன்படுத்தி தேடிய போது இது தொடர்பான பல செய்திகள் நமக்கு கிடைத்தன. அதில், காங்கிரஸ் எம்.எல்.ஏ தன்னுடைய மனைவிக்கு பொது வெளியில் ஃபிளையிங் கிஸ் கொடுத்தார் என்று குறிப்பிடப்பட்டிருந்தது. சில யூடியூப் வீடியோக்களில் தன் மனைவிக்கு பறக்கம் முத்தம் கொடுத்த காங்கிரஸ் எம்.எல்.ஏ என்றும் குறிப்பிட்டிருந்தனர்.

 2019ம் ஆண்டில் ஒடிஷா சட்டப்பேரவைத் தலைவருக்கும் இவர் ஃபிளையிங் கிஸ் கொடுத்தார் என்றும் செய்திகள் நமக்கு கிடைத்தன. இவர் தன்னுடைய மனைவியுடன் மேடையில் ஆடியது உள்ளிட்ட பல்வேறு செய்திகள் நமக்கு கிடைத்தன. இதன் மூலம் வேறு ஒரு நிர்வாகியுடன் அவர் தவறாக நடந்துகொள்ளவில்லை, தன்னுடைய மனைவிக்குத்தான் ஃபிளையிங் கிஸ் கொடுத்துள்ளார் என்பது தெளிவாகிறது. 

ஒடிஷா காங்கிரஸ் எம்.எல்.ஏ தன்னுடைய மனைவிக்கு மேடையில் வைத்து ஃபிளையிங் கிஸ் கொடுத்த வீடியோவை எடுத்து, பா.ஜ.க நிர்வாகி பொது இடத்தில் பெண் நிர்வாகியிடம் தவறாக நடந்துகொள்கிறார் என்று தவறான தகவலை சேர்த்து பகிர்ந்திருப்பது தெளிவாகிறது. இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

ஒடிஷா காங்கிரஸ் எம்.எல்.ஏ தன்னுடைய மனைவிக்கு மேடையில் வைத்து ஃபிளையிங் கிஸ் கொடுத்த வீடியோவை எடுத்து, பாஜக நிர்வாகி பெண்ணிடம் தவறாக நடந்துகொள்கிறார் என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel