திருச்சி பிரசார கூட்டத்தில் பாடிய விஜய் என்று பரவும் வீடியோ உண்மையா?

திருச்சியில் நடந்த பிரசார கூட்டத்தில் பேச வேண்டியதை மறந்த தவெக தலைவரும் நடிகருமான விஜய் சினிமா பாடலை பாடினார் என்று ஒரு வீடியோ சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

நடிகர் விஜய் பிரசார கூட்டத்தில் சினிமா பாடல் பாடியது போன்று வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “தொட்டபெட்ட ரோட்டு மேல முட்டை புரோட்டா பாடிய விஜய்

ஒரு நடிகனிடம் இதை தவிர வேறு என்ன எதிர்பார்க்க முடியும்” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பகிர்ந்து வருகின்றனர்.

உண்மை அறிவோம்:

தமிழக வெற்றிக் கழகம் தலைவர் நடிகர் விஜய்யின், ‘மக்கள் சந்திப்பு பிரசாரம்’ திருச்சியில் செப் 13, 2025 அன்று தொடங்கியது. இந்த பிரசார நிகழ்ச்சியில் பேச வேண்டியதை மறந்ததால் பாடல் பாடினார் விஜய் என்று ஒரு வீடியோ சமூக ஊடகங்களில் பகிரப்பட்டு வருகிறது. வீடியோவை பார்க்கும் போதே எடிட் செய்யப்பட்டது என்று தெரிகிறது. இருப்பினும் எதிர்த் தரப்பினர் இதை அதிக அளவில் சமூக ஊடகங்களில் பதிவிட்டு வருவதால் இது தொடர்பாக ஆய்வு செய்தோம்.

நடிகர் விஜய் திருச்சியில் செய்த மக்கள் சந்திப்பு பிரசாரத்தின் நேரலையை பல தொலைக்காட்சிகளும் ஒளிபரப்பின. இதனால், விஜய் பேசிய வீடியோவை தேடி எடுப்பதில் அவ்வளவு சிரமம் இல்லை. ஊடகங்கள் வெளியிட்டிருந்த வீடியோக்களை யூடியூபில் இருந்து எடுத்தோம். வீடியோவை முழுவதுமாக பார்த்தோம். அதில், விஜய் பாடல் எதுவும் பாடவில்லை.

அடுத்ததாக இப்படி ஒரு வீடியோவை நியூஸ் தமிழ் வெளியிட்டதா என்று அறிய அதன் சமூக ஊடக பக்கங்களை பார்வையிட்டோம். ஆனால், அதில் அப்படி எந்த ஒரு பதிவும் வெளியாகவில்லை. எனவே, இந்த பதிவை அப்படியே நியூஸ் தமிழ் செய்திப் பிரிவுக்கு அனுப்பி உண்மையா என்று கேட்டோம். அவர்களும் இது போலியானது என்று உறுதி செய்தனர். இந்த ஆதாரங்கள் அடிப்படையில் நாம் ஆய்வுக்கு எடுத்துக்கொண்ட பதிவு தவறானது, எடிட் செய்யப்பட்டது என்று உறுதி செய்யப்படுகிறது.

முடிவு:

நடிகரும் தவெக தலைவருமான விஜய் பேசியதை எடிட் செய்து, பாடல் பாடியது போன்று தவறாக சமூக ஊடகங்களில் பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.