தவெக நடத்திய போராட்டம் லிம்கா சாதனைப் புத்தகத்தில் இடம்பெற்றதா?

‘’தவெக நடத்திய போராட்டம் லிம்கா சாதனைப் புத்தகத்தில் இடம்பெற்றது,’’ என்று கூறி, சமூக வலைதளங்களில் பகிரப்படும் ஒரு தகவல் பற்றி ஆய்வு மேற்கொண்டோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’ Limca Book of Records புத்தகத்தில் இடம்பெற்ற தவெகவின் ஆர்ப்பாட்டம்! நேற்று சென்னையில் தவெக தலைவர் விஜய் தலைமையில் காவலர்களால் தாக்கப்பட்டு உயிரிழந்த அஜித்குமார் மரணத்தை கண்டித்து ஆர்பாட்டம் நடைபெற்றது; வெறும் 26 நிமிடங்கள் மட்டுமே நடைபெற்ற இந்த ஆர்பாட்டம் மிகக்குறைந்த நேரத்தில் நடத்தி முடிக்கப்பட்ட அரசியல் கட்சியின் ஆர்ப்பாட்டம் என லிம்கா சாதனை புத்தகத்தில் இடம் பெற்றுள்ளது.,’’ என்று எழுதப்பட்டுள்ளது.

Claim Link 1 l Claim Link 2 l Claim Link 3

பலரும் இதனை உண்மை என நம்பி, சமூக வலைதளங்களில் ஷேர், கமெண்ட் செய்து வருகின்றனர்.

உண்மை அறிவோம்:

மேற்கண்ட தகவல் உண்மையா என்று நாம் ஆய்வு மேற்கொண்டோம். அப்போது, இது News 7 Tamil ஊடகத்தின் பெயரில் பகிரப்படும் போலியான நியூஸ் கார்டு, என்று தெரியவந்தது.

இதுபற்றி News 7 Tamil ஊடகத்தின் டிஜிட்டல் பிரிவு நிர்வாகியை தொடர்கொண்டு விளக்கம் கேட்டோம். அவர்,’’இதனை நாங்கள் வெளியிடவில்லை. இதுதொடர்பாக, எங்களது X சமூக வலைதள பக்கத்தில் மறுப்பு தெரிவித்துள்ளோம்,’’ என்றார்.

கூடுதல் ஆதாரத்திற்காக, தவெக., பொதுச் செயலாளர் ஆனந்த், அலுவலகத்தை தொடர்பு கொண்டு பேசினோம். அவர்களும், ‘’இது தவறான செய்தி, எங்கள் கட்சியை கேலி செய்வதற்காக, எதிர்க்கட்சிகள் இவ்வாறு வதந்தி பரப்புகிறார்கள். இதனை தவெக தொண்டர்களும் உண்மை என நம்பி, சமூக வலைதளங்களில் ஷேர் செய்வது வேதனையாக உள்ளது,’’ என்று தெரிவித்தனர்.

எனவே, நாம் ஆய்வுக்கு எடுத்துக் கொண்ட நியூஸ் கார்டு, உண்மையானதல்ல, என்று சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.