விஜய் பிரசார வாகனத்தின் Hard disk அழிப்பு என்று பரவும் நியூஸ் கார்டு உண்மையா?

விஜய் பிரசார வாகனத்தின் ஹார்ட் டிஸ்க் அழிக்கப்பட்டதாக ஒரு நியூஸ் கார்டு சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

தந்தி டிவி வெளியிட்டது போன்று நியூஸ் கார்டு ஃபேஸ்புக்கில் பதிவிடப்பட்டுள்ளது. அதில், “விஜய் பிரச்சார வாகனத்தின் Hard disk அழிப்பு. கரூர் கூட்ட நெரிசல் சம்பவங்கள் தொடர்பாக தவெக தலைவரின் பிரச்சார வாகனத்தின் சிசிடிவி கேமரா பதிவுகள் அடங்கிய ஹார்ட் டிஸ்க் பனையூர் தவெக அலுவலக வளாகத்தில் எரிக்கப்பட்டதாக தகவல்” என்று குறிப்பிடப்பட்டிருந்தது. இந்த நியூஸ் கார்டை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

தவெக தலைவரும் நடிகருமான விஜய் கரூரில் மேற்கொண்ட பிரசாரத்தின் சிசிடிவி காட்சிகள் அடங்கிய ஹார்ட் டிஸ்க் உள்ளிட்ட ஆதாரங்கள் அழிக்கப்பட்டதாக பலரும் சமூக ஊடகங்களில் பதிவிட்டு வருகின்றனர். சென்னை உயர்நீதிமன்றம் அமைத்த சிறப்பு புலனாய்வுக் குழு தங்கள் வசமிருந்த ஆதாரங்களை சிபிஐ-யிடம் ஒப்படைத்த நிலையில் தங்களிடமிருந்த ஆவணங்களை அழித்ததாக செய்தி வெளியாகி இருந்த நிலையில் இந்த நியூஸ் கார்டு சமூக ஊடகங்களில் பகிரப்பட்டு வரவே, இது தொடர்பாக ஆய்வு செய்தோம்.

இந்த நியூஸ் கார்டை பார்க்க தந்தி டிவி வெளியிட்ட நியூஸ் கார்டு போல இருந்தாலும், அதன் தமிழ் எழுத்துரு (Font) வழக்கமாக தந்தி டிவி வௌியிடும் நியூஸ் கார்டு போல இல்லாமல் இருந்தது. மேலும், விஜய் அலுவலகத்தில் ஆதாரங்கள் அழிக்கப்பட்டதாக எந்த செய்தியும் வெளியாகவில்லை. எனவே, இது போலியானதாக இருக்கலாம் என்று தெரிந்தது. இதை உறுதி செய்துகொள்ள ஆய்வு செய்தோம்.

முதலில் தந்தி டிவி இப்படி ஒரு நியூஸ் கார்டை வெளியிட்டதா என்று அறிய அதன் சமூக ஊடக பக்கங்களை பார்த்தோம். அதில் நாம் ஆய்வுக்கு எடுத்துக்கொண்டது போன்று எந்த நியூஸ் கார்டும் இல்லை. எனவே, இந்த நியூஸ் கார்டை தந்தி டிவி டிஜிட்டல் பொறுப்பாளருக்கு அனுப்பினோம். அவரும் இது போலியானது என்று உறுதி செய்தார். இந்த ஆதாரங்கள் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்பது உறுதியானது.

முடிவு:

விஜய் பிரசார வாகனத்தின் சிசிடிவி காட்சி பதிவு இருந்த ஹார்டு டிஸ்க் அழிக்கப்பட்டதாக பரவும் நியூஸ் கார்டு போலியானது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.