பதவி மோகத்துடன் தேர்தலுக்கு தயாராவோம் என்று மு.க.ஸ்டாலின் கூறினாரா?

‘’பதவி மோகத்துடன் தேர்தலுக்கு தயாராவோம்,’’ என்று மு.க.ஸ்டாலின் கூறியதாக, சமூக வலைதளங்களில் பகிரப்படும் ஒரு தகவல் பற்றி ஆய்வு மேற்கொண்டோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’ Stalin Model Core 🤡 உண்மைய சொல்றதுக்கும் ஒரு மனசு வேணும். வாழ்த்துகள் வாழ்த்துகள் M. K. Stalin ! #DMKFailsTN #ByeByeStalin,’’ என்று எழுதப்பட்டுள்ளது. இதனுடன் வீடியோ ஒன்று இணைக்கப்பட்டுள்ளது.

இந்த வீடியோவில், ‘’ஏதோ ஆட்சிப் பொறுப்புக்கு வந்தோம்; பொறுப்பை மறந்து பதவி மோகத்தில் இருந்தோம்; சில கவர்ச்சித் திட்டங்களை செஞ்சோம்; மறுபடியும் பதவி மோகத்தோடு தேர்தலுக்கு தயாராவோம்,’’ என்று தமிழ்நாடு முதலமைச்சர் மு.க.ஸ்டாலின் பேசும் காட்சி இடம்பெற்றுள்ளது.

Claim Link 1 l Claim Link 2 l Claim Link 3

பலரும் இதனை உண்மை என நம்பி, சமூக வலைதளங்களில் ஷேர், கமெண்ட் செய்வதைக் காண முடிகிறது.

உண்மை அறிவோம்:

மேற்கண்ட தகவல் உண்மையா என்று நாம் ஆய்வு மேற்கொண்டோம். அப்போது, மு.க.ஸ்டாலின் பேசியதில் ஒரு பகுதியை மட்டும் எடிட் செய்து, இவ்வாறு வதந்தி பரப்புகிறார்கள், என்று தெரியவந்தது.

இதன்படி, கடந்த செப்டம்பர் 15, 2025 அன்று சென்னை, கலைவாணர் அரங்கத்தில் “அன்புக்கரங்கள்’’ என்ற சமூக நலத் திட்டத்தை தமிழ்நாடு முதலமைச்சர் மு.க.ஸ்டாலின் தொடங்கி வைத்தார்.

இந்த நிகழ்ச்சியில் பேசிய முதலமைச்சர் மு.க.ஸ்டாலின், ‘’ அரசியல் என்றால் பலர் என்ன நினைக்கிறார்கள் என்றால், ஏதோ ஆட்சிப் பொறுப்புக்கு வந்தோம்; பொறுப்பை மறந்து பதவி மோகத்தில் இருந்தோம்; சில கவர்ச்சித் திட்டங்களை செஞ்சோம்; மறுபடியும் பதவி மோகத்தோடு தேர்தலுக்கு தயாராவோம் என்று சிலர் நினைக்கிறார்கள்,’’ என்று குறிப்பிட்டார்.

ஆனால், மு.க.ஸ்டாலின் பேசியதில் ஒரு பகுதியை மட்டும் எடிட் செய்து, தவறான அர்த்தம் கற்பித்து, வேண்டுமென்றே வதந்தி பரப்புகிறார்கள்.

கூடுதல் செய்தி ஆதாரம் இதோ…

Polimer News l Hindu Tamil l Daily Thanthi

எனவே, நாம் ஆய்வுக்கு எடுத்துக் கொண்ட தகவல், அரசியல் உள்நோக்கத்துடன் பகிரப்படும் ஒரு வதந்தி, என்று சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.