“மலேசியாவில் திரிஷா” என்று பரவும் புகைப்படங்கள் – உண்மையா?

ஜனநாயகன் பட இசைவௌியீட்டு விழா மலேசியாவில் நடைபெறும் சூழலில் அதில் பங்கேற்க நடிகை திரிஷாவும் சென்றது போன்று புகைப்படங்கள் சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

நடிகை திரிஷா ரசிகர்கள் முன்னிலையில் செல்ஃபி எடுத்துக்கொண்ட புகைப்படம் ஃபேஸ்புக்கில் பதிவிடப்பட்டுள்ளது. நிலைத்தகவலில், “மலேசியாவில் அண்ணியார் ….” என்று குறிப்பிடப்பட்டிருந்தது. 

உண்மைப் பதிவைக் காண: Facebook I Archive

அதே போன்று புகைப்படத்திற்கு போஸ் கொடுத்தது போன்று மற்றொரு புகைப்படத்தை ஃபேஸ்புக்கில் பதிவிட்டு, “அண்ணியார் இல்லாமலா… 🐿️மிலேசியாவுல 3 ஷா” என்று குறிப்பிடப்பட்டிருந்தது. இந்த புகைப்படங்களை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

நடிகை திரிஷா வெளிநாட்டுக்கு சென்றதாக புகைப்படங்களை சமூக ஊடகங்களில் பதிவிட்டிருந்தால் பிரச்னை இல்லை. அண்ணியார் என்று விஷமத்தனத்துடன் குறிப்பிட்டுப் பதிவிட்டுள்ளனர். நடிகர் விஜய் மற்றும் திரிஷாவை இணைத்து கிசுகிசுக்கள் பரப்பப்பட்டு வருகின்றன. மலேசியாவில் ஜனநாயகன் இசை வெளியீட்டு விழா நடைபெற உள்ள சூழலில் அண்ணியார் என்று குறிப்பிட்டு பதிவிட்டிருப்பதன் மூலம் அந்த விழாவில் பங்கேற்க சென்றது போன்ற விஷம தகவலைப் பதிவிட்டுள்ளனர். எனவே, இது தொடர்பாக ஆய்வு செய்தோம்.

உண்மைப் பதிவைக் காண: Instagram I Archive

இந்த புகைப்படத்தை கூகுள் லென்ஸ் இணையதளத்தில் பதிவேற்றித் தேடினோம். அப்போது திரிஷா பெயர் கொண்ட இன்ஸ்டாகிராம் பக்கத்தில் தக் லைஃப் (Thug Life) திரைப்படத்தின் பிரமோஷனுக்காக மலேசியா சென்ற போது எடுக்கப்பட்டது என்று குறிப்பிடப்பட்டிருந்தது. அந்த புகைப்படமானது 2025 மே 31ம் தேதி இன்ஸ்டாகிராமில் பதிவிடப்பட்டிருந்தது. ஜனநாயகன் ஆடியோ லாஞ்ச் 2025 டிசம்பர் 27ம் தேதி நடந்தது. எனவே, ஜனநாயகன் படத்திற்காக நடிகை திரிஷா சென்ற புகைப்படம் இது இல்லை என்பது உறுதியாகிறது.

உண்மைப் பதிவைக் காண: Instagram I Archive

அடுத்ததாக புகைப்படத்திற்கு போஸ் கொடுத்த பதிவு தொடர்பாக ஆய்வு செய்தோம். அந்த படத்தை கூகுள் லென்ஸ் தளத்தில் பதிவேற்றித் தேடினோம். அதுவும் பல மாதங்களுக்கு முன்பு மும்பை விமானநிலையத்தில் எடுக்கப்பட்டதாக பதிவுகள் நமக்கு கிடைத்தன. அதுவும் தக் லைஃப் படத்தின் பிரமோஷனுக்காக மும்பை சென்ற போது எடுக்கப்பட்டது என்று galattadotcom மீடியாவின் இன்ஸ்டாகிராம் பக்கத்தில் வெளியாகி இருந்தது. மே 20, 2025 அன்று அந்த வீடியோ பதிவிடப்பட்டிருந்தது. 

galattadotcom வெளியிட்டிருந்த வீடியோவை ஸ்கிரீன்ஷாட் எடுத்து ஜனநாயகன் விழாவில் பங்கேற்க மலேசியா சென்றது போன்று இப்போது புகைப்படத்தை தவறாக பதிவிட்டுள்ளனர். இதன் மூலம் பழைய புகைப்படங்களை தவறாக பதிவிடப்பட்டிருப்பது உறுதி செய்யப்பட்டுள்ளது. இந்த ஆதாரங்கள் அடிப்படையில் நாம் ஆய்வுக்கு எடுத்துக்கொண்ட பதிவுகள் தவறானவை என்று உறுதி செய்யப்படுகின்றன.

முடிவு:

மலேசியாவில் ஜனநாயகன் பாடல்கள் வெளியீடு நடைபெறும் சூழலில் நடிகை திரிஷாவை அண்ணியார் என்று குறிப்பிட்டு அவரும் மலேசியாவுக்கு சென்றுள்ளதாக பரவும் புகைப்படங்கள் பழைய நிகழ்ச்சிகளின் போது எடுக்கப்பட்டவை என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I X Post I Google News Channel I Instagram