கரூர் கூட்ட நெரிசலில் இறந்தவர்களைப் பார்த்து விஜய் ரசிப்பது போன்று கார்ட்டூன் வெளியிட்டதா விகடன்?

கரூர் கூட்ட நெரிசலில் இறந்தவர்களின் உடல்களைக் கண்டு தவெக தலைவரும் நடிகருமான விஜய் ரசிப்பது போன்று கார்ட்டூன் ஒன்றை விகடன் வௌியிட்டதாக பலரும் சமூக ஊடகங்களில் பதிவிட்டு வருகின்றனர். இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

இறந்தவர்களின் உடல்களை வைத்து கேள்விக்குறி உருவாக்கி, கேள்விக்குறிக்கு மேல் பிரசார வாகனத்தில் அமர்ந்து விஜய் ரசிப்பது போன்று ஓவியம் ஒன்று உருவாக்கி ஃபேஸ்புக்கில் பதிவிடப்பட்டுள்ளது.

உண்மைப் பதிவைக் காண: x.com I Archive

நிலைத் தகவலில், “உண்மைலேயே விகடன பாராட்டியாகணும்.. வாழ்த்துகள் விகடன்.. Cartoonist ஆசீப் கானுக்கு வாழ்த்துகள்…” என்று குறிப்பிடப்பட்டிருந்தது. இந்த ஓவியத்தைப் பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

கரூர் தவெக பிரசார கூட்டத்தில் ஏற்பட்ட கூட்ட நெரிசலில் சிக்கி 41 பேர் உயிரிழந்தனர். இந்த விவகாரம் தொடர்பாக நடிகரும் தவெக தலைவருமான விஜய்யை விமர்சித்து, கூட்ட நெரிசல் உயிரிழப்பை ரசித்தது போன்று கருத்துப் படத்தை வெளியிட்டதாகப் பலரும் சமூக ஊடகங்களில் பதிவிட்டு வருகின்றனர். படத்தைப் பார்க்க எடிட் செய்தது போல் இருந்ததால் இது உண்மையா என்று அறிய ஆய்வு செய்தோம்

#AVCartoon: ஜனநாயகன்..? #KarurStampede | #TVK | #Vijay | #AnandaVikatan pic.twitter.com/GbU7jmTLFL
— ஆனந்த விகடன் (@AnandaVikatan) September 29, 2025

Archive

முதலில் விகடன் வெளியிட்ட கருத்து படம் ஓவியத்தை அதன் சமூக ஊடக பக்கங்களிலிருந்து எடுத்தோம். அதில், நாம் ஆய்வுக்கு எடுத்துக்கொண்டது போன்று இல்லை. கேள்விக்குறி போல இறந்தவர்களின் உடல்கள் அடுக்கப்பட்டிருக்க, விஜய் அழுவது போன்று இருந்தது. அதற்கு இதுதான் ஜனநாயகனா என்று கேள்வி எழுப்புவது போன்று பதிவிட்டிருந்தனர். இந்த ஓவியத்தை எடிட் செய்து விஜய் ரசிப்பது போன்று மாற்றியிருப்பது தெரிந்தது.

இதை உறுதிசெய்துகொள்ள விகடன் டிஜிட்டல் பிரிவு பொறுப்பாளருக்கு நாம் ஆய்வுக்கு எடுத்துக்கொண்ட புகைப்படத்தை வாட்ஸ்அப் மூலம் அனுப்பினோம். அவரும் இது போலியானது என்று உறுதி செய்தார். இந்த ஆதாரங்கள் அடிப்படையில் உயிரிழந்தவர்களைப் பார்த்து விஜய் ரசிப்பது போன்று பரவும் கார்ட்டூன் போலியானது, எடிட் செய்யப்பட்டது என்று உறுதி செய்யப்படுகிறது.

முடிவு:

கரூர் கூட்டநெரிசல் உயிரிழப்புகளைக் கண்டு விஜய் ரசித்தது போன்று விகடன் வௌியிட்டது போன்று பரவும் கார்ட்டூன் போலியானது, எடிட் செய்யப்பட்டது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.