2018ம் ஆண்டு விஜய் போஸ்டரை எடிட் செய்து சமூக ஊடகங்களில் பரப்பும் திமுக-வினர்!

நடிகர் விஜய் போஸ்டரை எடிட் செய்து, உதயநிதி தலையை வைத்து தி.மு.க-வினர் பலரும் சமூக ஊடகங்களில் பகிர்ந்து வருகின்றனர்.

தகவலின் விவரம்:

உண்மைப் பதிவைக் காண: Facebook I Archive

உதயநிதி நடிகர் விஜய்யை தன் தோள்பட்டை மீது தூக்கி வைத்திருக்கும் விகடன் வெளியிட்டது போன்ற புகைப்படத்தை ஃபேஸ்புக்கில் பதிவிட்டுள்ளனர். நிலைத் தகவலில், “இது தான் நடக்க போகுது 2026…ல” என்று குறிப்பிடப்பட்டிருந்தது. இந்த புகைப்படத்தைப் பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

நடிகர் விஜய் தமிழக வெற்றிக் கழகம் என்ற அரசியல் கட்சியை ஆரம்பித்து ஆளும் தி.மு.க-வை விமர்சித்து வருகிறார். ஆளும் கட்சி தரப்பிலிருந்து சமூக ஊடகங்களில் நடிகர் விஜயை விமர்சித்து தொடர்ந்து பதிவுகள் வெளியாகி வருகிறது. இந்த நிலையில், நடிகர் விஜயை துணை முதலமைச்சர் உதயநிதி ஸ்டாலின் அழித்துவிடுவார் என்று அர்த்தம் வரும் வகையில் விகடன் புகைப்படம் வெளியிட்டது போன்று ஒரு புகைப்படத்தை தி.மு.க-வினர் சமூக ஊடகங்களில் பகிர்ந்து வருகின்றனர். இது தொடர்பாக ஆய்வு செய்தோம்.

நாம் ஆய்வுக்கு எடுத்துக்கொண்ட புகைப்படத்தை கூகுள் லென்ஸ் தளத்தில் பதிவேற்றி தேடிப் பார்த்தோம். சமீபத்தில் இப்படி ஒரு புகைப்படத்தை விகடன் வெளியிட்டதாக எந்த தகவலும் நமக்குக் கிடைக்கவில்லை. ஆனால், நடிகர் விஜய் வேறு ஒருவரை தன்னுடைய தோள்பட்டையில் தூக்கி வைத்திருப்பது போன்ற புகைப்படத்தை விஜய் ரசிகர்கள் பலரும் பல ஆண்டுகளாக சமூக ஊடகங்களில் பதிவிட்டு வந்திருப்பதைக் காண முடிந்தது. 2018ம் ஆண்டிலிருந்து விஜய் புகைப்படத்தை அவரது ரசிகர்கள் பதிவிட்டு வந்திருப்பதைக் காண முடிந்தது.

#Sarkar #ADMKProtest pic.twitter.com/kxqBFkJopU

— விகடன் (@vikatan) November 9, 2018

Archive

இதன் அடிப்படையில் தொடர்ந்து தேடிய போது 2018ம் ஆண்டு விகடன் வெளியிட்ட எக்ஸ் தள பதிவு நமக்குக் கிடைத்தது. சர்க்கார் என்ற நடிகர் விஜய்யின் திரைப்படம் வெளியான போது இந்த புகைப்படத்தை விகடன் வெளியிட்டிருப்பது தெரிந்தது. இதை உறுதிசெய்துகொள்ள விகடன் டிஜிட்டல் பிரிவு பொறுப்பாளருக்கு நாம் ஆய்வுக்கு எடுத்துக்கொண்ட புகைப்படத்தை வாட்ஸ்அப்-ல் அனுப்பினோம். 

அதை பார்த்து நமக்கு பதில் அளித்த விகடன் டிஜிட்டல் பொறுப்பாளர், “இந்த புகைப்படம் எடிட் செய்யப்பட்டது. இதை விகடன் வெளியிடவில்லை. 2018ம் ஆண்டு வெளியிட்ட விஜய் புகைப்படத்தை எடிட் செய்து சமூக ஊடகங்களில் பரப்பியுள்ளனர்” என்றார். இந்த ஆதாரம் அடிப்படையில் நாம் ஆய்வுக்கு எடுத்துக்கொண்ட புகைப்படம் எடிட் செய்யப்பட்டது என்று உறுதி செய்யப்படுகிறது.

முடிவு:

2018ம் ஆண்டு சர்க்கார் திரைப்படத்தை வைத்து விகடன் வெளியிட்ட போஸ்டரை எடிட் செய்து உதயநிதி நடிகர் விஜய்யை தூக்குவது போன்று புகைப்படத்தை உருவாக்கி பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I X Post I Google News Channel I Instagram